ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދިރިއުޅުއްވާ ގ. ކެނެރީގެ ހުންނަ ނީލޯފަރުހިނގުމުގައި މާދަމާއިން ފެށިގެން ޕާކު ނުކުރެވޭ ގޮތް ހަދާނެ ކަމަށް މާލޭ ސިޓީ ކައުންސިލުން މިއަދު ބުނެފި އެވެ.
ނަޝީދު އަވަހާރަކޮށްލަން ޓެރަރިސްޓް ހަމަލާއެއް ދިނީ ނީލޯފަރުހިނގުމުގައި ހުރި ސައިކަލެއްގައި އައިއީޑީއެއް ހަރުކޮށްގެންނެވެ. އެ ހަމަލާގައި ނަޝީދުގެ ފުރާނަ ސަލާމަތްވީ ކިރިޔާ އެވެ.
ނީލޯފަރުހިނގުމަށް ކާރުކޮޅު ނުވެއްދޭތީ ނަޝީދު ކެނެރީގެއިން ނުކުމެވަޑައިގެން ކާރުކޮޅަށް އަރާ ވަޑައިގަންނަވަނީ ހިންގަވާފައި މަޖީދީމަގުންނެވެ. އެ ގޯޅީގައި ސައިކަލް ޕާކުކުރާތީ އެއީ ނަޝީދުގެ ސެކިއުރިޓީއަށް ރައްކާތެރިކަމެއް ނޫން ކަން ފާހަގަކޮށް އެ ސައިކަލް ޕާކިން ޒޯން ބަންދު ކޮށްދޭން މިދިޔަ އަހަރު ސިފައިން ވަނީ އެދިފަ އެވެ.
މާލޭގެ މޭޔަރު ޝިފާ މުހައްމަދު މިއަދު "އަދަދު" އަށް ވިދާޅުވީ ނީލޯފަރުހިނގުމުގެ ޕާކިން ޒޯން ބަންދުކޮށް، ބިއްލޫރިޖެހިގޭ ހުސްބިމުގައި ޕާކިން ޒޯން ހެދުމުގެ މަސައްކަތް ކުރަމުން އަންނަ ކަމަށެވެ. ބިއްލޫރިޖެހިގޭގައި ހަދާ ޕާކިން ޒޯން މާދަމާއަށް ނިންމާލެވޭނެ ކަމަށް ޝިފާ ވިދާޅުވި އެވެ. އެތަނުގައި 300 ސައިކަލް ޕާކުކުރެވޭނެ އެވެ.
ބިއްލޫރިޖެހިގޭގައި ޕާކިން ޒޯން ހެދުމުގެ މަސައްކަތް ކުރަނީ: އެއީ 300 އެއްހާ ސައިކަލް ޕާކް ކުރެވޭ ޒޯނެއް-- ފޮޓޯ: ހުސައިން ޝަޔާހް
"ދެ ދުވަސް ކުރިން މިނިސްޓަރު[ޕްލޭނިން މިނިސްޓަރު މުހައްމަދު އަސްލަމް] ގުޅުއްވާ އެތަން އަޅުގަނޑުމެންނަށް ދިނީ. އެހާ ހިސާބުން މަސައްކަތް ފަށައިފިން. އަޅުގަނޑުމެން މިބަލަނީ މަޖީދީމަގުގެ އެ ސަރަހައްދުގެ ޕާކިން ޒޯންތައް އެތަނަށް ބަދަލު ކުރެވޭނެ ކަމަށް،" މިނިސްޓަރު ވިދާޅުވި އެވެ.
ނަޝީދުގެ ސެކިއުރިޓީއަށްޓަކައި ނީލޯފަރު ހިނގުން ޕާކު ނުކުރެވޭ މަގަކަށް ހެދުމަށް އެދި މާލޭ ސިޓީ ކައުންސިލުން މިދިޔަ މާޗް މަހުގެ 23 ވަނަ ދުވަހު ވަނީ ޕްލޭނިން މިނިސްޓްރީއަށް ސިޓީއެއް ފޮނުވައިފަ އެވެ. ޕްލޭނިން މިނިސްޓްރީއަށް އެ ސިޓީ ފޮނުވީ ޑިފެންސް މިނިސްޓްރީން ސިޓީ ކައުންސިލްގައި އެކަމަށް އެދުމުންނެވެ. ނަމަވެސް އެ ސިޓީއަށް ޕްލޭނިން މިނިސްޓްރީން އޮތީ މިހާތަނަށް ޖަވާބު ނުދީ އެވެ.
މަޖީދީމަގުގައި ހުންނަ ބިއްލޫރިޖެހިގޭގައި ޕާކިން ޒޯނެއް ހެދުމަށް މިދިޔަ އަހަރުގެ އޮގަސްޓް މަހު ޕްލޭނިން މިނިސްޓްރީން އޮތީ ނިންމައިފަ އެވެ. ނަމަވެސް އެކަން ސިޓީ ކައުންސިލަށް ތަންފީޒު ނުކުރެވި އޮތީ ބިއްލޫރިޖެހިގޭ ހުސްބިން އެ ކައުންސިލާ ހަވާލު ނުކުރާތީ އެވެ.
