ކޮވިޑުގެ ހާލަތު އިންތިހާއަށް ގޯސްވެ މިއަދު އަނެއްކާވެސް ތުންތުން މަތިން އަޑުއިވެނީ ލޮކްޑައުންގެ ވާހަކަ އެވެ. ފާއިތުވި ހަފްތާއެއްހާ ދުވަހުގެ ތެރޭގައި ރާއްޖޭގައި ރެކޯޑް މިންވަރަކަށް ކޭސްތައް ފެންނަމުންދާތީ ސިއްހީ މާހިރުން ކެނޑިނޭޅި ދޭ އިންޒާރަކީ އެއީ އެވެ.
ރާއްޖޭގައި ބަލީގެ ހާލަތު މި މިންވަރަށް ގޮސްފައިވަނީ ބޭރުގެ ގިނަ ގައުމުތަކުން ފެންނަމުންދާ ބަލީގެ އާ ވޭރިއަންޓުތަކުގެ ސަބަބުން ކަމަށް ސިއްހީ މާހިރުން ލަފާކުރެ އެވެ.
އެއާ އެކު އުފެދޭ ސުވާލަކީ މިހާރު ކުރިމަތިވެގެން އުޅޭ ކޮވިޑުގެ ބިޔަ ރާޅުން އަރައިގަތުމަށް، ރާއްޖޭގެ ބޯޑަރު އަނެއްކާ ވެސް ބަންދުކުރަން ޖެހޭ ހެއްޔެވެ؟
ރާއްޖެއިން ކޮވިޑް ޖެހިގެން ރިޕޯޓްކުރާ އަދަދު
ރާއްޖޭގެ ހާލަތު މި ވަގުތު އޮތީ މި ބަލިމަޑުކަމުގެ ތެރޭގައި ވެއްޓުނު އެންމެ ނާޒުކު ފައްތަރުގަ އެވެ.
ދުވާލަކު އަލަށް ބަލިޖެހޭ މީހުންގެ އަދަދު މިހާރު ހާހަކުން މައްޗަށް އަރާފައިވާ އިރު، ފާއިތުވި ހަފުތާގެ ތެރޭގައި އެކަނިވެސް 3000 އަށް ވުރެ ގިނަ މީހުންނަށް ކޮވިޑް ޖެހުނެވެ. މިކަމުގެ ނުރައްކާތެރިކަން ވަޒަންކޮށްލާއިރު، ރާއްޖޭން ކޮވިޑް ފެނުނެ ފަހުން ފުރަތަމަ 3000 އަށް އަަރަށް ތިން މަސް ދުވަސް ނެގި އެވެ.
ބަލި ޖެހޭ މީހުންގެ އިތުރަށް މި ބަލީގައި މަރުވާ މީހުންގެ އަދަދުތައް ވެސް ރެކޯޑް މިންވަރަކަށް އުފުލިއްޖެ އެވެ.
ކުރީގެ ހާލަތާ ހިލާފަށް މިހާރު އަތޮޅު ތެރެއަށް ވެސް ބަލި ވަނީ އިންތިހާއަށް ފެތުރިފަ އެވެ.
މި ވަގުތު 30 އަށް ވުރެ ގިނަ ރަށުގައި މި ބައްޔަށް ޕޮޒިޓިވް މީހުން ތިބި މީހުން އޭގެ ތެރެއިން ގިނަ ރަށްތަކަށް އަރައިފޭބުން މަނަލެވެ.
އެއާއެކު ސިއްހީ މަސައްކަތްތެރިންނަށް ލޯޑު ބޮޑުވެ، މުޅި ސިއްހީ ނިޒާމަށް ވަނީ ލޮޅުން އައިސްފަ އެވެ. މީހުންނަށް ފަރުވާދޭ ކެޕޭސިޓީ އިތުރުކުރުމުގެ ގޮތުން ބައެއް ހޮސްޕިޓަލުތަކާއި އެހެން ފެސިލިޓީތައް އަންނަނީ ކޮވިޑް ފަރުވާއަށް ހާއްސަކުރަމުންނެވެ.
ރާއްޖޭގެ ހާލަތު ގޯސްވެގެން އުޅޭ ސީދާ ސަބަބެއް ކަމާބެހޭ ފަރާތްތަކުން ހާމަ ނުކުރި ނަމަވެސް، އަވައްޓެރި އިންޑިއާއިން ފެނިގެން އުޅޭ ކޮވިޑުގެ އާ ވޭރިއަންޓާއި، ރާއްޖޭގައި އަޅާފައިވާ ފިޔަވަޅުތަކަށް ދޫ ދޭން ނިންމި ނިންމުން ހިމެނެ އެވެ. ހާލަތު ގޯސްވި ފަހުން ކާފިއު ހިންގަން ފެށި ނަމަވެސް، އަދަދުތަކުން އެ ނިންމުމުގެ ބަދަލު އަދި ފެންނާކަށް ނުފަށަ އެވެ.
ޓޫރިސްޓުންނަށް ހިދުމަތްދޭ ތަންތަނުން ޕޮޒިޓިވްވާ އަދަދު
ރާއްޖޭގެ ބޯޑަރުތައް ހުޅުވާލި ދުވަހުން ފެށިގެން މިއަދާ ހަމައަށް ރާއްޖެއަށް އާދެވެނީ ކޮވިޑް ނެތްކަން ޔަގީން ކޮށްގެންނެވެ. އަދި ފުރައިގެން ދާން ޖެހެނީ ވެސް ކޮވިޑް ނެތްކަން ޔަގީން ކުރުމަށް ފަހުގަ އެވެ.
ރާއްޖޭން ޓޫރިސްޓުންގެ ކަންކަމުގައި އެކުލަވާލާފައިވާ ޕްރޮޓޮކޯލަކީ ބައިނަލްއަގްވާމީ ފެންވަރުގައި ބަލައިގެންފައި އޮތް މިންގަނޑެކެވެ.
މިފަދަ ރައްކާތެރިކަމުގެ ފިޔަވަޅުތައް ހުރި ނަމަވެސް، މަދުން ނަމަވެސް ރިސޯޓްތަކާއި ގެސްޓްހައުސްތަކާއި ސަފާރީތަކުން ޕޮޒިޓިވް ކޭސްތައް ރިޕޯޓް ކުރި އެވެ.
ޓޫރިޒަމް މިނިސްޓްރީގެ ހިސާބުތަކުން ދައްކާ ގޮތުގައި މިދިޔަ އަހަރު ޖުލައި 15 ގައި ބޯޑަރު ހުޅުވާލު ފަހުން އެ އަހަރުގެ ނިޔަލަށް ޒިޔާރަތްކުރި ފަތުރުވެރިން ތެރެއިން ޕޮޒިޓިވްވީ އެންމެ 0.19 ޕަސެންޓު މީހުންނެވެ.
މި އަހަރުގެ މިހާތަނަށް މި ނަމްބަރު ކުޑަކޮށް އުފުލުނު ނަމަވެސް، ޕޮޒިޓިވްވާ އަދަދުތައް ހުރީ 0.28 ޕަސެންޓުގައި ހިފެހެއްޓިފަ އެވެ.
ރާއްޖެއަށް ޒިޔާރަތްކުރި ޓޫރިސްޓަކު އެއާޕޯޓުގައި. -ފޮޓޯ: ހުސެއިން ވަހީދު/ އަދަދު
ސީދާ އަދަދެއް ބުނާނަމަ ކޮވިޑު ބަލިމަޑުކަމުގެ ހާލަތުގެ ފަހުން ރާއްޖެއަށް ޒިޔާރަތްކުރި ހަ ލައްކައަށް ވުރެ ގިނަ ޓޫރިސްޓުންގެ ތެރެއިން ރާއްޖޭގައި ހުއްޓާ ކޮވިޑަށް ޕޮޒިޓިވްވީ 1،500 އެއްހާ މީހުންނެވެ.
މިއީ މި މުއްދަތުގެ ތެރޭގައި ރާއްޖެއަށް ޒިޔާރަތްކުރި ޓޫރިސްޓުންގެ އަދަދުތަކާއި ރާއްޖެއިން ޕޮޒިޓިވްވީ އަދަދުތަކާ އަޅާ ބަލާނަމަ، ނިސްބަތުން ކުޑަ އަދަދެކެވެ.
ޓޫރިޒަމް މަސައްކަތްތެރިންގެ ވެކްސިނޭޝަން ޕްރޮގްރާމު
ދިވެހި ސަރުކާރުން ވަނީ ޓޫރިޒަމް ދާއިރާގައި ހަރަކާތްތެރިވާ މުވައްޒަފުންނަކީ އަސާސީ ހިދުމަތްތެރިންގެ ގޮތުގައި ކަނޑައަޅާފަ އެވެ. މިއީ ރާއްޖޭގެ އިގުތިސޯދުގައި ޓޫރިޒަމް އަދާކުރާ ދައުރަށް ބަލާފައި ވެކްސިން ޖަހަން އެ ދާއިރާގެ މުވައްޒަފުންނަށް އިސްކަން ދޭން ވެގެން ނިންމި ނިންމުމެކެވެ.
ޓޫރިޒަމް ދާއިރާގެ ވެކްސިނޭޝަން ޕްރޮގްރާމުގެ ތެރެއިން މިދިޔަ ބުދަދުވަހުގެ ނިޔަލަށް 40،161 ޓޫރިޒަމް މަސައްކަތްތެރިންނަށް ކޮވިޑް ވެކްސިންގެ ފުރަތަމަ ޑޯޒް ޖަހައިފި އެވެ. އެއީ ދާއިރާގައި ހަރަކާތްތެރިވާ މަސައްކަތްތެރިންގެ 99 އިންސައްތަ އެވެ.
މީގެ ތެރޭގައި ރިސޯޓްތަކާއި، ގެސްޓްހައުސްތަކާއި، ސަފާރީތަކުގައި މަސައްކަތްކުރާ މުވައްޒަފުންގެ އިތުރުން ޕާފޯމިން އާޓްސް މީހުންނާއި ޓްރެވަލް އެޖެންސީތަކުގައި މަސައްކަތް ކުރާ މުވައްޒަފުން ހިމެނެ އެވެ.
ޓޫރިޒަމް ސެކްޓާ ވެކްސިނޭޝަން ޕްރޮގްރާމް އަޕްޑޭޓް -- މަސްދަރު: ޓޫރިޒަމް މިނިސްޓްރީ
މިހާތަނަށް ފުރަތަމަ ޑޯޒް ޖެހި މަސައްކަތްތެރިންގެ ތެރެއިން 25 ޕަސެންޓު މީހުން ވެކްސިން ފުރިހަމަކޮށްފި އެވެ. ރާއްޖެ އިޝްތިހާރު ކުރުމުގައި އިސްކޮށް ހަރަކާތްތެރިވާ އެމްއެމްޕީއާރްސީ އާއި ޓޫރިޒަމް މިނިސްޓްރީ ގުޅިގެން ވަނީ ރާއްޖޭގެ ޓޫރިޒަމް އިންޑަސްޓްރީގެ ސައްތައިން ސައްތަ މުވައްޒަފުން ކޮވިޑް ވެކްސިން ޖެހުމުގެ ޕްރޮގްރާމެއް މިދިޔަ މަހު ފަހުކޮޅު ފަށާފަ އެވެ.
މިއީ ޓޫރިޒަމް އިންޑަސްޓްރީ "ފުލް އިމިއުނިޓީ" ލިބިފައިވާ ފުރަތަމަ ގައުމަށް ރާއްޖެ ހެދުމަށް އަމާޒު ހިފައިގެން ފެށި މަސައްކަތެކެވެ.
ރާއްޖޭގައި ކޮވިޝީލްޑް ވެކްސިންގެ ސްޓޮކް ދަށް ނަމަވެސް، އަސާސީ މަސައްކަތްތެރިންގެ ގޮތުގައި ކަނޑައަޅާފައިވާތީ ޓޫރިޒަމް މަސައްކަތްތެރިންނަށް ވެކްސިން ޖެހުން ހުއްޓާލާފައެއް ނުވެ އެވެ.
ސިނޮފާމް ވެކްސިން ޖެހުމުގެ ޕްރޮގްރާމު ވެސް ރިސޯޓްތަކުގައި އަންނަނީ ހުއްޓާލުމެއް ނެތި ބާރު ދުވެލީގައި ކުރިޔަށެވެ.
ވެލާނާ އެއާޕޯޓުގައި ޓޫރިސްޓުންތަކެއް ގޮވައިގެން ރިސޯޓެއްގެ މުވައްޒަފެއް: އެއާޕޯޓުގައި އަޅާފައިވާ ފިޔަވަޅުތަކަށް ގިނަ މީހުން އަމަލުކުރޭ -- ފޮޓޯ: ހުސެއިން ވަހީދު/އަދަދު
މިހާތަނަށް ލިބެން ހުރި މައުލޫމާތަށް ބަލާއިރު އަދި ލޮކްޑައުން ކުރުމާ ދޭތެރޭ ގޮތެއް ނުނިންމެ އެވެ. އެކަމަކު އެކަމާ ގުޅޭ މަޝްވަރާތަކެއް ދަނީ ކުރެވެމުންނެވެ. އިތުބާރު ހުރި މަސްދަރަކުން ބުނީ އެ މަޝްވަރާތަކުގެ ތެރޭގައި ބޯޑަރު ބަންދުކުރުމުގެ ވާހަކަތަކެއް ނުދެކެވޭ ކަމަށާއި، ލޮކްޑައުން ކުރިޔަށް ކުރިން އޮތް ފުލް ލޮކްޑައުންއަކަށް ނުދާނެ ކަމަށެވެ.
