ރައްޔިތުންގެ މަޖިލީހުގެ ރައީސް އަދި ރައީސް މުހައްމަދު ނަޝީދަށް ދިން ޓެރަރިސްޓް ހަމަލާއާ ގުޅިގެން މިހާތަނަށް ލިބުނު މައުލޫމާތަށް ބަލާއިރު ހަރުކަށި ފިކުރުގެ ވިސްނުމާ ގުޅޭ ކަމަށް ޕްރޮސެކިއުޓާ ޖެނަރަލް ހުސެއިން ޝަމީމް ވިދާޅުވެއްޖެ އެވެ.
ނަޝީދު އަވަހާރަކޮށްލަން އައިއީޑީ ގޮއްވާލީ ދިރިއުޅުއްވާ ގެކޮޅު ކައިރީގައި ހުރި ސައިކަލުގެ މަޑިދަށުގައި ބާއްވައިގެންނެވެ. ކެނެރީގެ ހުންނަ ނީލޯފަރުހިނގުމުން އެމަނިކުފާނު ހިންގަވާފައި މަޖީދީ މަގުގައި އޮތް ކާރުކޮޅާ ހަމައަށް 8:27 ގައި ފޯރުމާ އެކު އައިއީޑީ ގޮއްވާލުމުން ލިބުނު ޒަހަމްތަކާ އެކު ބިންމައްޗަށް ވެއްޓިވަޑައިގަތީ އެވެ. އެކުގައި ތިއްބެވި ސެކިއުރިޓީންނަށް ވެސް އަނިޔާވި އެވެ.
އެ ހަމަލާއާ ގުޅިގެން އެކަމުގައި ބައިވެރިވާ ކަމަށް ތުހުމަތުވާ މީހަކާއި ސައިކަލްގެ ވެރިޔާ ވަނީ ހައްޔަރުކޮށްފަ އެވެ. މީގެއިތުރުން އެހެން މީހަކު ހޯދުމަށް ފޮޓޯ ވެސް ފުލުހުން އާންމުކޮށްފައިވެ އެވެ.
ތަހުގީގާ ގުޅޭ ގޮތުން މައުލޫމާތު ހާމަކުރަން މިއަދު ފުލުހުން ބޭއްވި ނޫސްވެރިންގެ ބައްދަލުވުމުގައި ބައިވެރިވެވަޑައިގެން، ޕްރޮސިކިއުޓާ ޖެނަރަލް ޝަމީމް ވިދާޅުވީ ހަމަލާއާ ގުޅިގެން ލިބިފައިވާ މައުލޫމާތުތަކަށް ބަލާއިރު ހަރުކަށި ފިކުރުގެ ވިސްނުމާ ގުޅުން ހުރި ކަންތައްތަކެއް ފެންނަ ކަމަށާއި އެކަން އިތުރަށް ބަލާނެ ކަމަށެވެ.
ނަމަވެސް، ހަމަލާއަކީ ހަމައެކަނި ހަރުކަށި ފިކުރުގެ ވިސްނުމާ ގުޅޭ ކަމެއްގެ ގޮތުގައި ނިންމީ ނޫންކަން ޝަމީމް ފާހަގަ ކުރެއްވި އެވެ.
"ލިބިފައިވާ މައުލޫމާތުތަކަށް ބަލާއިރު އޭގައި ހަރުކަށި ފިކުރުގެ ވިސްނުމާ ގުޅުންތަކެއް ހުރި ކަމަށް އެބަ ބެލޭ، އޭގެއިތުރުން ވެސް އެހެން ކަންތައްތަކެއް ހުރެދާނެތީ އެކަންކަން ފުލުހުން ބައްލަވަމުން ދާނެ، އަޅުގަނޑުމެން ވާނެ ފުލުހަށް އިރުޝާދު ވެސް އަރުވާފައި،" ޝަމީމް ވިދާޅުވި އެވެ.
ޝަމީމް ވިދާޅުވި ގޮތުގައި ހަމަލާއާ ހަރުކަށި ފިކުރުގެ ވިސްނުމާ ގުޅޭ މައުލޫމާތުތަކެއް ލިބިފައިވުމަކީ އެކަން ވަރަށް ސީރިއަސްކޮށް ނަގަން ޖެހޭ ކަމެއް ކަމަށެވެ.
"މިއީ ވަރަށް ސީރިއަސްކޮށް ބަލަން ޖެހޭ، ސީރިއަސްކޮށް އަޅުގަނޑުމެން ބަލާނެ ކަމެއް،" ޝަމީމް ވިދާޅުވި އެވެ.
ޓެރަރިޒަމްގެ ގާނޫނުގައިވާ ގޮތުގައި އެފަދަ އަމަލެއް ފުރިހަމަވުމަށްޓަކައި މަގުސަދެއް އޮންނަން ޖެހެ އެވެ. އެއީ ވަކި ސިޔާސީ ފިކުރެއް ނުވަތަ ޝުއޫރެއް ޕްރޮމޯޓްކުރުމަށް ހިންގި ފަދަ އަމަލަކަށްވާން ޖެހެ އެވެ.
ޝަމީމް ވިދާޅުވި ގޮތުގައި، މައްސަލާގެ ތަހުގީގު ކުރިއަށް ދަނީ އިޖުރާއަތްތަކުގެ މަތިން ރަނގަޅަށް ކަމަށް ގަބޫލު ކުރައްވާ ކަމަށާއި، ތަހުގީގުގެ މައުލޫމާތުތައް ފުލުހުން ޕީޖީއަށް ހިއްސާ ވެސް ކުރަމުންދާ ކަމަށެވެ.
މިހާރު ހައްޔަރުކޮށްފައިވާ މީހުންގެ މައްޗަށް ދައުވާ އުފުލޭ މިންވަރަށް މައުލޫމާތާއި ގުޅުން ހުރި ކަންކަން އެބަހުރި ކަމަށް ގަބޫލު ކުރައްވާ ކަމަށް ވެސް ޝަމީމް ފާހަގަ ކުރެއްވި އެވެ.
ރައީސް ނަޝީދަށް ދިން ހަމަލާއަކީ ނުރައްކާތެރި ޓެރަރިޒަމްގެ ހަމަލާއެއް ކަމަށް ފުލުހުންނާއި ސިފައިން ވެސް ވަނީ ކަނޑައަޅާފަ އެވެ.
ޗީފް އޮފް ޑިފެންސް ފޯސް އަބްދުﷲ ޝަމާލު ރޭ ވިދާޅުވި ގޮތުގައި، ރައީސް ނަޝީދަށް ހަމަލާދިނީ ކޮމާންޑް ޑެޓޮނޭޝަނަކުންނެވެ. އެއީ، މީހެއްގެ މޫވްމަންޓް ބަލާފައި ރިމޯޓް ކޮންޓްރޯލް ޑިވައިސަކުން ގޮއްވާލުމެވެ.
"މިއީ ޓައިމްކޮށްފައި އޮތް އައިއީޑީއެއް ނޫން. ފޯނަކަށް ވުރެން ބޮޑަށް ލަފާކުރެވެނީ ގޭމްކުޅޭށާއި އެކި ކަހަލަ ކަންކަމަށް ބޭނުންކުރާ ޑިވައިސަކުން ގޮއްވާލީ ކަމަށް." އޭނާ ވިދާޅުވި އެވެ.
މި އައިއީޑީގެ ބާރު، ޝަމާލް ވިދާޅުވި ގޮތުގައި، 2007 ގައި ސަލްޓަންޕާކުގައި ގޮއްވާލި އައިއީޑީއަށް ވުރެ އެތައް ގުނައެއް ބާރުގަދަ އެވެ. ބްލާސްޓް އިފެކްޓާއި އަޑު ވެސް ބާރުގަދަ ކަމަށާއި އޭގެ ތެރެއަށް ލާފައި ހުރީ ރޭޒާ ފުށްތަކެކެވެ. އެއީ ހަމަލާ އަމާޒުކުރާ މީހާއަށް ގެއްލުން ބޮޑު ކުރުމަށް ލާފައި ހުންނަ އެއްޗިއްސެވެ.
