ޓެރަރިސްޓް ހަމަލާއާ ގުޅިގެން ފަރުވާ ހޯއްދަވަމުން ގެންދަވާ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ އެކްސްރޭ ސޯޝަލް މީޑިއާގައި ލީކްކޮށްލި މައްސަލައެއް ފެންމަތިވެއްޖެ އެވެ.
ބާރުގަދަ ގޮވުމާ އެކު، ރައީސް ނަޝީދުގެ ހަށިކޮޅަށް ރޭޒާ ފުއްތަކެއް ވަދެފައިވާއިރު އެ ޒަހަމްތައް ލިބުނު ތަންތަން ފެންނަން ހުރި އެކްސްރޭއެއް ރޭ މީހަކު ވަނީ ޓްވިޓާގައި ލީކްކޮށްލައިފަ އެވެ.
ސޯޝަލްމީޑިއާގައި ލީކްކޮށްލާފައި ވަނީ ރައީސް ނަޝީދުގެ އެކްސްރޭއެއްކަން އެމަނިކުފާނުގެ އާއިލާ މެންބަރަކު "އަދަދު"އަށް ވަނީ ކަށަވަރުކޮށްދެއްވައިފަ އެވެ. އަދި، އެކަން ކުރީ އާއިލާގެ ރުހުން ހޯދައިގެން ނޫންކަން ވެސް ވަނީ އެނގިފަ އެވެ.
އޭޑީކޭ ހޮސްޕިޓަލުން އާއިލާގެ ރުހުމާ އެކު، ރައީސް ނަޝީދުގެ ސާޖަރީތަކާ ގުޅޭ މައުލޫމާތާއި އެމަނިކުފާނަށް ލިބިފައިވާ އަނިޔާގެ ކޮންމެ ވެސް ވަރެއްގެ ތަފްސީލް ދިނެވެ. ނަމަވެސް އޭގެ ބޭރުން، އޭޑީކޭ ހޮސްޕިޓަލްގެ ތެރެއިން އެކްސްރޭ ލީކްވެފައިވަނީ ކިހިނެއް ކަމެއް ނޭނގެ އެވެ. ނަމަވެސް، އެއީ ރަސްމީކޮށް އާއްމުކޮށްފައިވާ އެއްޗެއް ނޫނެވެ.
އެމަނިކުފާނުގެ ހަށިކޮޅަށް ލިބިފައިވާ ޒަހަމްތަކުގެ ތަފްސީލެއް ވެސް ހޮސްޕިޓަލުން މިހާތަނަށް އާއްމެއް ނުކުރެ އެވެ.
މިއީ، ކިހިނެއް ހިނގައިދިޔަ ކަމެއްތޯ އަދި އެކަމުގައި އެއްވެސް ފިޔަވަޅެއް އަޅާފައިވޭތޯ ސާފުކުރުމަށް އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލްއަށް "އަދަދު"ން ގުޅައި، މެސެޖް ކުރުމުން އަދި ޖަވާބެއް ނުދެއްވަ އެވެ.
ސިއްހީ ހިދުމަތުގެ ގާނޫނުގައި ބުނެފައިވާ ގޮތުގައި، ސިއްހީ ހިދުމަތް ލިބިގަންނަ ފަރާތުގެ ސިއްހީ ހާލަތާއި އޭނާއަށް ދީފައިވާ ނުވަތަ ދެވޭނެ ފަރުވާ އާއި އެ ނޫން ވެސް އޭނާގެ ސިއްހީ ހާލަތާއި އޭނާ ލިބިގަތް ހިދުމަތާ ގުޅުންހުރި އެންމެހައި، މައުލޫމާތަކީ ސިއްރު އަދި އިމްތިޔާޒު ލިބިފައިވާ މައުލޫމާތެވެ.
ހިދުމަތް ލިބިގަންނަ ފަރާތުގެ ހުއްދަ އާއި އަދި އެހެން ވެސް ބައެއް އިސްތިސްނާއީ ހާލަތެއްގައި މެނުވީ ސިއްހީ އެއްވެސް ރެކޯޑެއް ހާމަކޮށްގެން ނުވާނެކަން އެ ގާނޫނުގައިވެ އެވެ. މިފަދަ ސިއްހީ ރެކޯޑްގެ ތެރޭގައި ސްކޭންތަކާއި އެކްސްރޭ ފަދަ ތަކެތި ވެސް ހިމެނެ އެވެ.
މިއާ ހިލާފަށް އަމަލު ކުރުމަކީ ޖޫރިމަނާ ވެސް ކުރެވޭ ކުށެކެވެ.
ގާނޫނުގައިވާ ގޮތުން މި ކުށް ކޮށްފި މީހެއްގެ އަދަބަކީ 10،000 ރުފިޔާ އާއި 100،000 ރުފިޔާއާ ދެމެދު އަދަދަކުން ޖޫރިމަނާ ކުރެވޭނެ ކަމަށެވެ. އަދި، ތަކުރާރުކޮށް ކުށް ކޮށްފިނަމަ އެއް އަހަރަށްވުރެ ދިގު ނޫން މުއްދަތަކަށް ޖަލަށް ލެވިދާނެ ކަމަށް ވެސް ގާނޫނުގައިވެ އެވެ.
