ކޮވިޑް ބައްޔަށް ޕޮޒިޓިވްވާ މީހުންގެ ފުއްޕާމޭއަށް އަސަރު ކުރާ މިންވަރު ބޮޑުވެފައިވާ ކަމަށް އެ ބަލީގެ މީހުންނަށް ފަރުވާދިނުމަށް އިސްކޮށް އުޅުއްވާ ޑރ. މުހައްމަދު އަލީ ވިދާޅުވެއްޖެ އެވެ.
ކޮވިޑްގެ ހާލަތު ރާއްޖޭގައި މީގެކުރިން ގޯސް ނުވާ މިންވަރަށް ގޮސްފައިވާއިރު މިދިޔަ 24 ގަޑިއިރު ތެރޭގައި ވެސް 700 އަށްވުރެ ގިނަ މީހުންނަށް ބަލި ޖެހިފައިވެ އެވެ. މި ރޭޓްގައި ބަލި ޖެހޭތާ މިހާރު ދެތިން ދުވަސް ވަނީ ވެފަ އެވެ.
މާލޭގެ އިތުރުން ރަށްރަށުގައި ވެސް ބަލި ފެތުރެމުންދާއިރު، ޖުމްލަ 29 ރަށެއް މިހާރު ވެސް އޮތީ އަރާފޭބުން މަނާކޮށް މޮނީޓަރިންގެ ހާލަތުގަ އެވެ. މާލެ އާއި ފަސް ރަށެއްގައި ކާފިއު ވެސް ދަނީ ހިންގަމުންނެވެ.
ޑރ. މުހައްމަދު އަލީ މިރޭ ކުރެއްވި ޓްވީޓްގައި ވިދާޅުވި ގޮތުގައި، ރާއްޖޭގައި މިވަގުތު ފެތުރެމުންދަނީ އާ ވޭރިއެންޓެއް ކަމަށް ކްލިނިކަލީ ފެންނަ ފެނުމުން ބެލެވޭ ކަމަށެވެ. ނަމަވެސް، އެކަމުގެ ޓެސްޓްތަކާއި ނަތީޖާތައް ހާމަ ކުރާނީ އެޗްޕީއޭން ކަމަށެވެ.
ނަމަވެސް ޑރ. މުހައްމަދު ވިދާޅުވީ މިހާރު ބަލި ފެތުރޭ މިންވަރު އިތުރުވެފައި، ނުރައްކާތެރި ކަމަށެވެ.
"ފުއްޕާމޭއަށް މި ވޭރިއެންޓުން މާބޮޑަށް އަސަރު ކުރުވާ،" ޑރ. މުހައްމަދު އަލީ ވިދާޅުވެފައިވެ އެވެ.
ޑރ. މުހައްމަދު އަލީ ވިދާޅުވި ގޮތުގައި، ރައްކާތެރިވުމަށް އޮތީ މާސްކު އެޅުމާއި ކޮންޓެކްޓް ބަބުލް ކުޑަކުރުން އަދި އަތް ދޮވުން ކަމެވެ.
އާ ވޭރިއެންޓާ ގުޅޭ ގޮތުން މިހާތަނަށް އެޗްޕީއޭން ރަސްމީކޮށް އެއްވެސް އެއްޗެއް ނުބުނާއިރު، ވޭރިއެންޓްތައް ދެނެގަތުމަށް ބައެއް ސާމްޕަލްތައް ނަގައި ޓެސްޓް ކުރަމުންދާ ކަމަށް ވަނީ ބުނެފަ އެވެ. އޭގެ ނަތީޖާތައް ލިބުނު ކަމެއް ހާމައެއް ނުކުރެ އެވެ.
އަވަށްޓެރި އިންޑިއާގައި ވެސް ހާލަތު ގޯސްވެގެން ގޮސްފައިވަނީ ނުރައްކާތެރި، އާ ވޭރިއެންޓެއް އުފެދިގެންނެވެ. ރާއްޖޭގައި ވެސް އެ ވޭރިއެންޓް ފެތުރިފައިވާ ކަމަށް ބެލެވޭ ކަމަށް މީގެކުރިން ބައެއް ޑޮކްޓަރުން ވެސް ވިދާޅުވެފައިވެ އެވެ.
މިފަހުން އިންޑިއާއިން ރާއްޖެއަށް ގިނަ ޓޫރިސްޓުން އަޔެވެ. އޭގެ ތެރޭގައި މެދުއިރުމައްޗަށް ދިޔުމުގެ ކުރިން ކަރަންޓީނުވުމަށް އައިސް، ރަށްރަށުގެ ގެސްޓްހައުސްތަކުގައި 14 ދުވަހު މަޑުކުރި ގިނަ ބަޔަކު ހިމެނެ އެވެ.
އެފަދަ މީހަކު، އއ. ރަސްދޫގައި ކޮވިޑް ބަލީގައި ވަނީ މަރުވެސްވެފަ އެވެ.
