ކޮވިޑް ބަލީގައި އިތުރު މީހަކު މަރުވެއްޖެ އެވެ.
އެޗްޕީއޭން އާންމުކުރި ގޮތުގައި، ބަލީގައި މަރުވެފައިވަނީ މިރޭ 11:15 ހާއިރު އައިޖީއެމްއެޗްގެ އެމެޖެންސީއަށް ގެނައި އުމުރުން 83 އަހަރުގެ އަންހެނަކެވެ.
މިއީ މިއަދު މަރުވި ހަތަރުވަނަ މީހާ އެވެ.
އިއްޔެ ވެސް ކޮވިޑް ބަލީގައި ހަ މީހަކު މަރުވެފައިވާއިރު، މިއީ ކޮވިޑް ފެތުރެން ފެށިފަހުން ރާއްޖޭގައި އެންމެ ގިނަ މީހުން ކައިރިކައިރީގައި މަރުވި ފަހަރެވެ.
ކޮވިޑްގެ ހާލަތު ރާއްޖޭގައި މީގެކުރިން ގޯސް ނުވާ މިންވަރަށް ގޮސްފައިވާއިރު މިދިޔަ 24 ގަޑިއިރު ތެރޭގައި ވެސް 700 އަށްވުރެ ގިނަ މީހުންނަށް ބަލި ޖެހިފައިވެ އެވެ. މި ރޭޓްގައި ބަލި ޖެހޭތާ މިހާރު ދެތިން ދުވަސް ވަނީ ވެފަ އެވެ.
މާލޭގެ އިތުރުން ރަށްރަށުގައި ވެސް ބަލި ފެތުރެމުންދާއިރު، ޖުމްލަ 29 ރަށެއް މިހާރު ވެސް އޮތީ އަރާފޭބުން މަނާކޮށް މޮނީޓަރިންގެ ހާލަތުގަ އެވެ. މާލެ އާއި ފަސް ރަށެއްގައި ކާފިއު ވެސް ދަނީ ހިންގަމުންނެވެ.
ބަލީގެ މީހުންނަށް ފަރުވާދިނުމުގައި އިސްކޮށް ހަރަކާތްތެރިވާ ޑރ. މުހައްމަދު އަލީ މިރޭ ކުރެއްވި ޓްވީޓްގައި ވިދާޅުވި ގޮތުގައި، ރާއްޖޭގައި މިވަގުތު ފެތުރެމުންދަނީ އާ ވޭރިއެންޓެއް ކަމަށް ވަރަަށް ބޮޑަށް ބެލެވޭ ކަމާއި، އެ ފެތުރޭ މިންވަރު އިތުރުވެފައި ނުރައްކާތެރި ކަމަށެވެ.
"ފުއްޕާމޭއަށް މި ވޭރިއެންޓުން މާބޮޑަށް އަސަރު ކުރުވާ،" ޑރ. މުހައްމަދު އަލީ ވިދާޅުވެފައިވެ އެވެ.
ޑރ. މުހައްމަދު އަލީ ވިދާޅުވި ގޮތުގައި، ރައްކާތެރިވުމަށް އޮތީ މާސްކު އެޅުމާއި ކޮންޓެކްޓް ބަބުލް ކުޑަކުރުން އަދި އަތް ދޮވުން ކަމެވެ.
އާ ވޭރިއެންޓާ ގުޅޭ ގޮތުން މިހާތަނަށް އެޗްޕީއޭން ރަސްމީކޮށް އެއްވެސް އެއްޗެއް ނުބުނާއިރު، ވޭރިއެންޓްތައް ދެނެގަތުމަށް ބައެއް ސާމްޕަލްތައް ނަގައި ޓެސްޓް ކުރަމުންދާ ކަމަށް ވަނީ ބުނެފަ އެވެ. އޭގެ ނަތީޖާތައް ލިބުނު ކަމެއް ހާމައެއް ނުކުރެ އެވެ.
އަވަށްޓެރި އިންޑިއާގައި ވެސް ހާލަތު ގޯސްވެގެން ގޮސްފައިވަނީ ނުރައްކާތެރި، އާ ވޭރިއެންޓެއް އުފެދިގެންނެވެ. ރާއްޖޭގައި ވެސް އެ ވޭރިއެންޓް ފެތުރިފައިވާ ކަމަށް ބެލެވޭ ކަމަށް މީގެކުރިން ބައެއް ޑޮކްޓަރުން ވެސް ވިދާޅުވެފައިވެ އެވެ.
މިފަހުން އިންޑިއާއިން ރާއްޖެއަށް ގިނަ ޓޫރިސްޓުން އަޔެވެ. އޭގެ ތެރޭގައި މެދުއިރުމައްޗަށް ދިޔުމުގެ ކުރިން ކަރަންޓީނުވުމަށް އައިސް، ރަށްރަށުގެ ގެސްޓްހައުސްތަކުގައި 14 ދުވަހު މަޑުކުރި ގިނަ ބަޔަކު ހިމެނެ އެވެ.
އެފަދަ މީހަކު، އއ. ރަސްދޫގައި ކޮވިޑް ބަލީގައި ވަނީ މަރުވެސްވެފަ އެވެ.
