ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދުގެ ހާލު ކްރިޓިކަލް ކަމަށާއި އެމަނިކުފާނު މިހާރު އޮންނެވީ އައިސީޔޫގައި ކަަމަށް އޭޑީކޭ ހޮސްޕިޓަލުން ބުނެފި އެވެ.
އޭޑީކޭ ހޮސްޕިޓަލުން ކުރި ޓްވީޓެއްގައި ބުނީ ފާއިތުވި 16 ގަޑިއިރުގެ ތެރޭގައި ރައީސް ނަޝީދުގެ ފުރާނަ ސަލާމަތް ކުރުމަށް އެމަނިކުފާނުގެ ބޮލަށާއި، މެޔަށް، ބަނޑަށް އަދި އަތަށާއި ފަޔަށް ލިބިފައިވާ ޒަހަމްތަކަށް ސާޖަރީތައް ހެދި ކަމަށެވެ.
"ރައީސް ނަޝީދުގެ ހާލު އަދިވެސް ކްރިޓިކަލް، އެމަނިކުފާނު އޮންނެވީ އިންޓެންސިވް ކެއާ ޔުނިޓްގައި،" އޭޑީކޭގެ ޓްވީޓްގައިވެ އެވެ.
ނަޝީދަށް އަމާޒުކޮށް ހަމަލާދިނީ އެމަނިކުފާނު ދިރިއުޅުއްވާ ގެކޮޅު ކައިރީގައި ސައިކަލެއް ގޮއްވާލައިގެންނެވެ. މިއީ އެމަނިކުފާނުގެ ފުރާނައަށް ނުރައްކާކުރަން ދިން ޓެރަރިސްޓު ހަމަލާއެއްގެ ގޮތުގައި ފުލުހުން ވަނީ ތަހުގީގު ފަށައިފަ އެވެ. އެ ހަމަލާއަށް ޝައްކު ކުރެވޭ ހަތަރު މީހަކު ދެނެގަނެވިފައިވާ ކަމަށް ފުލުހުން ބުންޏެވެ.
ނަޝީދުގެ ހާލުކޮޅާ ގުޅޭ ގޮތުން "އަދަދު"އަށް ރޭ ވާހަކަ ދެއްކެވި މައުލޫމާތު އެނގިވަޑައިގަންނަވާ ބޭފުޅަކު ވިދާޅުވެފައި ވަނީ ބޭރުފުށުން ލިބިވަޑައިގެންނެވި ޒަހަމްތައް ގިނަ ކަމަށާއި ފަރުވާ ދެމުން އަންނަނީ ހޭނައްތައިގެންނެވެ. އެމަނިކުފާނުގެ އެއް އަތަށް ފުން ޒަހަމެއް ލިބިފައިވާ ކަމަށް ވެ އެވެ.
ބާރު ގަދަ އެ ގޮއްވާލުމުގައި ނަޝީދު ހިމެނިވަޑައިގަންނަވާ ގޮތުން ހަ މީހަކަށް ވަނީ އަނިޔާވެފަ އެވެ. އެއީ ތިން ސިފައިންނާއި އާއްމު މީހެއްގެ އިތުރުން ބިދޭސީއަކަށެވެ.
ސީރިއަސްކޮށް މައްސަލަ ތަހުގީގު ކުރަމުން އަންނަ އިރު ރާއްޖެ އިން ބޭރުގެ އެހީ ހޯދަން ވެސް ވަނީ ނިންމައިފަ އެވެ.
