ރައީސް މުހައްމަދު ނަޝީދަށް އަމާޒުކޮށް މިރޭ މާލޭގައި ދިން ޓެރަރިސްޓް ހަމަލާ ކުރީގެ ރައީސް މައުމޫން އަބްދުލްގައްޔޫމާއި ޑރ. މުހައްމަދު ވަހީދު ހަސަން މަނިކު ކުށްވެރިކުރައްވައިފި އެވެ.
ރައީސް ނަޝީދުގެ ގެކޮޅު، ގ. ކެނެރީގޭ ކައިރިން ކާރުކޮޅަށް އަރާވަޑައިގަންނަވަނިކޮށް މީހަކު އެއްޗެއް ގޮވާލައިގެން ދިން މި ހަމަލާގައި ލިބިވަޑައިގެންނެވި ޒަހަމުތަކަށް އެމަނިކުފާނު އަންނަނީ އޭޑީކޭގައި ފަރުވާ ހޯއްދަވަމުންނެވެ. އެކަމަކު މިވަގުތު އެމަނިކުފާނުގެ ހާލުކޮޅު ސީރިއަސް އެއް ނޫނެވެ. އެމަނިކުފާނުގެ ބޮޑީގާޑަކު ވެސް ޒަހަމްވެ އަންނަނީ ފަރުވާ ހޯދަމުންނެވެ.
ރައީސް މައުމޫން ކުރެއްވި ޓްވީޓެއްގައި ވިދާޅުވީ އަނިޔާވެރިކަމާއި ޓެރަރިޒަމްގެ ހުރިހާ އަމަލެއް އެންމެ ހަރުކަށީ އިބާރާތަކުން ކުށްވެރިކުރާ ކަމަށެވެ.
"އަޅުގަނޑު އުއްމީދުކުރަން އަދި ދުއާކުރަން ރައީސް ނަޝީދަށް ގެއްލުންނުވެ ހެޔޮހާލުކޮޅުގައި ހުންނެވުމަށް،" މައުމޫން ޓްވީޓްކުރެއްވި އެވެ.
ރައީސް ވަހީދު ކުރެއްވި ޓްވީޓެއްގައި ވިދާޅުވީ އެމަނިކުފާނުގެ ކުރީގެ ރަނިންމޭޓް އަދި ކުރިން ރައީސްކަން ކުރެއްވި ނަޝީދަށް އަމާޒުކޮށް ދިން ހަމަލާ އެންމެ ހަރުކަށި އަޑުން، އިހުލާސްތެރިކަމާ އެކު ކުށްވެރިކުރައްވާ ކަމަށެވެ.
"ރާއްޖޭގެ ސިޔާސީ ކަންކަމުގައި އުފެދެމުންދާ ނަފުރަތު ނިމެން އެބަޖެހޭ. އަދި އަޅުގަނޑުމެން އެބަޖެހޭ ވަކިވެގަތުމުގެ ބަދަލުގައި އެކުވެރިކަމާ އެކު މަސައްކަތްކުރެވޭނެ މަގު ހޯދަން. އަޅުގަނޑުގެ ދުއާ ވަނީ އެމަނިކުފާނާއި އެސްޕީޖީ އަދި އެ ބޭފުޅުންގެ އާއިލާއާ އެކު،" ރައީސް ވަހީދު ޓްވީޓްކުރެއްވި އެވެ.
