ރާއްޖޭގެ ހާލަތު މި ވަގުތު އޮތް ގޮތުން، ދަތުރު ކުރުން ރައްކާތެރި ނޫން ކަމަށް ބުނެ އެމެރިކާއިން އެ ގައުމުގެ ރައްޔިތުންނަށް ޓްރެވެލް އެޑްވައިޒަރީއެއް ނެރެފި އެވެ.
އެމެރިކާގެ ސެންޓާސް ފޯ ޑިޒޯސް ކޮންޓްރޯލް އެންޑް ޕްރިވެންޝަން (ސީޑީސީ)ން ނެރުނު އެޑްވައިޒަރީގައިވާ ގޮތުން ރާއްޖެ މިވަގުތު އޮތީ ކޮވިޑްގެ އެންމެ ގޯސް ހާލަތުގައި ކަމާއި އެހެންވެ، ރާއްޖެއަށް ދަތުރު ނުކުރުމަށް އިރުޝާދު ދޭ ކަމަށެވެ.
ވެކްސިން ފުރިހަމަ ކުރުމަށްފަހު ވެސް ރާއްޖެއަށް މި ވަގުތު ދަތުރުކުރުން ރައްކާތެރި ނޫން ކަމާއި ވައިރަހުގެ އާ ވޭރިއެންޓްތައް ފެތުރެމުން ދިޔުމުގެ ފުރުސަތު ބޮޑު ކަމަށް އެޑްވައިޒަރީގައި ބުނެފައިވެ އެވެ.
އެޑްވައިޒަރީގައި އިތުރަށް ބުނީ، ރާއްޖެއަށް ކޮންމެހެން ދާން ޖެހިއްޖެ ހާލަތެއްގައި ވެސް ދަތުރު ކުރަން ވާނީ، ވެކްސިން ފުރިހަމަކުރުމަށްފަހުގައި ކަމަށެވެ. އަދި، ރާއްޖޭގައި އުޅޭއިރު މާސްކު އެޅުމާއި ގައިދުރުކުރުމަށް ސަމާލުކަން ދޭން ޖެހޭނެ ކަމަށެވެ.
މި އެޑްވައިޒަރީގެ ކުރިން ރާއްޖެ އޮތީ އެމެރިކާގެ ކޮވިޑް ލޯ ރިސްކް ގައުމުގެ ތެރޭގަ އެވެ.
ރާއްޖެއަށް ދަތުރު ނުކުރުމަށް އެމެރިކާއިން އެ ގައުމުގެ ރައްޔިތުންނަށް އެންގިއިރު، އެމެރިކާއަކީ މި ވަގުތު ރާއްޖެއަށް ހަތަރު ވަނައަށް އެންމެ ގިނައިން ޓޫރިސްޓުން އަންނަ ގައުމެވެ.
ކޮވިޑާއެކު ރާއްޖޭގެ ހާލަތު ގޯސްވެފައިވާއިރު، އަވަށްޓެރި އިންޑިއާގެ ހާލަތު ވެސް ގޯސްވެފައިވާތީ، އެ ގައުމުން ވެސް ގެސްޓްހައުސްތަކަށް ޓޫރިސްޓުން އައުން ސަރުކާރުން ވަނީ މަނާކޮށްފަ އެވެ. މި ފިޔަވަޅުތަކާއެކު، ޓޫރިޒަމަށް ގެއްލުންތަކެއްވާނެ ކަމަށް ބެލެވެ އެވެ.
ކޮވިޑްގެ ހާލަތު އިތުރަށް ގޯސްވެ، އިއްޔެ އެކަނި ވެސް 700 އަށްވުރެ ގިނަ މީހުން ވަނީ ޕޮޒިޓިވްވެފަ އެވެ. އެއާއެކު، މާލޭ ސަރަހައްދަށް ވަނީ ފިޔަވަޅުތަކެއް އަޅައި، ކާފިއު ވެސް އިއުލާންކޮށްފަ އެވެ. މި ހާލަތުން އަރައިގަތުމަށް ސަރުކާރުން ވަނީ އެޗްއީއޯސީގެ އޮޕަރޭޝަންތައް ފުޅާކޮށްފަ އެވެ.
