ކޮވިޑުން ރައްކާތެރިވާން ސިއްހީ ދާއިރާ ހިމެނޭ ގޮތުން ކުރާ މަސައްކަތްތަކުގައި ވޮލަންޓިއާކޮށް ބައިވެރިވެވަޑައިގަތުމަށް ރައީސް އިބްރާހިމް މުހައްމަދު ސޯލިހްގެ އަނބިކަނބަލުން، ފަޒްނާ އަހްމަދު މިއަދު ޝައުގުވެރިކަން ފާޅުކުރައްވައިފި އެވެ.
ކޮވިޑުގެ ތިން ވަނަ ރާޅުން އަރައިނުގަނެވި އުޅެނިކޮށް ކުރިމަތިވި އާ ރާޅާ އެކު ރާއްޖޭގެ ހާލަތު ގޯސްވެ، ސިއްހީ ހިދުމަތްތެރިންނަށް ވަނީ ބުރަ ބޮޑުވެފަ އެވެ. ޑޮކްޓަރުންނާއި ނަރުހުން އަދި ސިއްހީީ އެހެން ހިދުމަތްތެރިން އަންނަނީ ދުވާލަކު ދެ ޝިފްޓުގައި ވެސް މަސައްކަތް ކުރަމުންނެވެ. ސިއްހީ ދާއިރާ އަށް ކުރިމަތިވެފައިވާ އުނދަގޫ މި ހާލަތާ ގުޅިގެން ވޮލަންޓިއާކޮށް މަސައްކަތްކޮށްދޭން ސިއްހީ ހިދުމަތްތެރިން ހޯދަން ހެލްތު މިނިސްޓްރީން މިއަދު ވަނީ އިއުލާން ކޮށްފަ އެވެ.
މިކަމުގައި އިސް ނަންގަވަމުން، ފަޒްނާ ފޭސްބުކްގައި ލިއުއްވާފައިވާ ގޮތުގައި، ފުރުސަތު ލިބިވަޑައިގެންފި ނަމަ ބަލިން އަރައިގަތުމަށް ކުރާ މަސައްކަތްތަކުގައި އެހީތެރިވެދޭން އެކަމަނާ ތައްޔާރެވެ.
އެކަމަނާ ދާދި ފަހުން ވަނީ މި ބަލި ތަޖުރިބާކުރައްވައިފަ އެވެ. އެކަން ފާހަގަކުރައްވަމުން ވިދާޅުވީ ބަލިން ފަސޭހަވެ މިހާރު ހުންނެވީ ރައްކާތެރި މަރުހަލާގައި ކަމަށެވެ.
ބަލީގައި އެކަހެރިވެގެން ހުންނެވި މުއްދަތުގައި ވެސް ފަޒްނާ ވަނީ މި ބައްޔާ ދެކޮޅަށް ކުރި މަސައްކަތްތަކުގައި އެހީތެރިކަން ފޯރުކޮށްދެއްވައިފަ އެވެ.
ފަޒްނާ ވިދާޅުވީ އޭރު މަސައްކަތް ކުރެއްވީ ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އާއި ޔުނިސެފްއާ ގުޅިގެން އޮންލައިންކޮށް ކަމަށެވެ. އެ މުއްދަތުގައި، އެހީތެރިކަން ބޭނުންވާ އާއިލާތައް ހޭލުންތެރި ކުރުވުމަށް ވީޑިއޯ މެސެޖްތަކެއްގައި ބައިވެރިވެވަޑައިގެންނެވި ކަމަށް ފަޒްނާ ވިދާޅުވި އެވެ.
ކޮވިޑާ ދެކޮޅަށް ހިލޭސާބަހަށް މަސައްކަތްކޮށްދެއްވަން ޝައުގުވެރިވެވަޑައިގަތްއިރު، އެކަމަނާ ގެންދަވަނީ ގާލްގައިޑުގެ މަސައްކަތްތަކުގައި ވެސް އެހީތެރިވެދެއްވަމުންނެވެ.
އަހަރެންގެ ބޭނުމަކީ، އަހަރެން ކުރާ ކަންތައްތަކުގެ ވާހަކަ ދެއްކުމެއް ނޫން. އެކަމަކު، އަހަރެން ފަދައިން އާއްމު ހިދުމަތުގައި މަސައްކަތްކޮށްފައިވާ މީހުންނަށް ގައުމު ބޭނުންވެއްޖެ ހިނދެއްގައި ހިލޭ ސާބަހަށް ނުކުތުމަށް ބާރު އެޅުން. -- ފަޒްނާ
ތައުލީމީ ދާއިރާގައި ގިނަ ދުވަސްތަކެއް ވަންދެން ހިދުމަތް ކުރެއްވި ފަޒްނާގެ ފޭސްބުކް ސްޓޭޓަސް ނިންމާލައްވަމުން ވިދާޅުވީ ﷲގެ އިރާދަފުޅުން ކޮވިޑްގެ ވަބާއިން އަރައިގަނެވޭނެ ކަމަށެވެ.
ރާއްޖޭން ކޮވިޑަށް ޕޮޒިޓިވްވާ މީހުންގެ އަދަދު އިތުރުވާން ފަށާފައިވާއިރު ހޮސްޕިޓަލްތައް ފުރި ހިދުމަތް ދޭނެ މީހުން މަދުވެދާނެ ކަމުގެ ބިރު ވަނީ ހީވެފަ އެވެ. ރެއާ ހަމައަށް ވެސް ދަރުމަވަންތަ ހޮސްޕިޓަލުގެ އައިސީޔޫ ވަނީ ފުރިފަ އެވެ.
މިވަގުތު ރާއްޖޭގައި ކޮވިޑް-19ގެ އާ ރާޅެއް އުފުލެމުންދާއިރު، އެ ހާލަތު ކޮންޓްރޯލްކޮށް ފިޔަވަޅުތައް އަޅަން އަވަސް ކުރަން ހެލްތު އެމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ އޮޕަރޭޝަންތައް ވެސް މިއަދު ވަނީ ފުޅާކޮށްފަ އެވެ.
އެޗްއީއޯސީގެ އޮޕަރޭޝަންތައް ފުޅާކޮށްފައިމިވަނީ ކުރިން ނުވެއްޓޭހާ ގޯސް ހާލަތަކަށް ރާއްޖެ ވެއްޓިފައިވާ ދަނޑިވަޅެއްގަ އެވެ. ކޮންމެ ދުވަހަކު އަލަށް ބަލި ޖެހޭ މީހުން ރެކޯޑް އަދަދުތަކުން އިތުރުވަމުން އައިސް، އިއްޔެ ވަނީ ފުރަތަމަ ފަހަރަށް އެ ނަމްބަރު 600 ހުރަސްކޮށްފަ އެވެ.
