ސަރުކާރުން ކަންކަން ކޮށްދޭއިރު ވަކި ކުޅިވަރެއް ތަފާތުނުކުރާނެ ކަމަށާއި އެކަމަކު ފެންނަން އޮތް ހަގީގަތަކީ އަދިވެސް ފުޓްބޯޅައާ އެއްވަރަށް އެހެން ކުޅިވަރެއް ކުރިއަރާފައިނުވާކަން ކަމަށް ޔޫތު މިނިސްޓަރު އަހުމަދު މަހުލޫފް ވިދާޅުވެއްޖެ އެވެ.
ގަލޮޅު ދަނޑުގެ ވީއައިޕީ ރޫމްގައި މިއަދު މެންދުރު ބޭއްވި ނޫސްވެރިންގެ ބައްދަލުވުމުގައި "އަދަދު" އިން ކުރި ސުވާލަކަށް ޖަވާބު ދެއްވަމުން މިނިސްޓަރު މަހުލޫފް ވިދާޅުވީ ކުޅިވަރުތައް ތަފާތު ނުކުރާނެ ކަމުގެ އެއް ހެއްކަކީ އަންހެން ކުޅުންތެރިންނާއި ފިިރިހެން ކުޅުންތެރިންނަށް ބަރާބަރަށް މުސާރަ ދިނުން ކަމަށެވެ. އަދި އިންފްރާސްޓްރަކްޗާ ތަރައްގީ ކުރުމުގެ ކަންކަން ކުރިއަށްދާ ގޮތުން ވެސް އެކަން ސާފުވާނެ ކަމަށެވެ.
"އެކަަމަކު ފުޓްބޯޅައާ އެއްވަރަކަށް މިއަދު އެހެން ކުޅިވަރެއް ކުޅޭ ތަން ވެސް ނޫންނަމަ ސަޕޯޓްކުރާ ތަން ވެސް ވަރަށް ނުވާ ވަރެއްގައި އޮތް ކަމެކޭ ބުންޏަސް ޔަގީން ރާއްޖޭގައި ދޮގަކަށް ނުވާނެ. ދެ ވަނަ އަށް ފެންނަނީ އެންމެ ފޯރީގައި ވޮލީ ކުޅޭތަން. އެކަމަކު ވޮލީ އާއި ފުޓްބޯޅަ ހުންނަ ތަފާތު މުޅި ރާއްޖެ އަށް ބެލިޔަސް ފެންނާނެ،" މިނިސްޓަރު ވިދާޅުވި އެވެ.
"ރަށްރަށުން ވެސް ވޮލީ ކޯޓެއްގެ ކުރިން އެ ދައްކަނީ ފުޓްބޯޅަ ދަނޑެއްގެ ވާހަަކަ. ސާފް ޓްރެކެއްގެ ވާހަކަ ނޫނީ ބިލިއާޑްގެ ވާހަކައިގެ ކުރިން އެ އަންނަނީ ފުޓްބޯޅަ ވާހަކަ،"
މި ސަރުކާރުން ކުޅިވަރު އިންފްރާސްޓްރަކްޗާތައް ތަރައްގީ ކުރުމަށް އަންނަނީ ގިނަ މަސައްކަތްތަކެއް ކުރަމުންނެވެ. އެ ގޮތުން މި ސަރުކާރުގެ އެއް ސިޔާސަތު ކަމަށްވާ ބައިނަލްއަގުވާމީ ކުޅިވަރު މުބާރާތްތައް ރާއްޖޭގައި ބޭއްވޭ މިންވަރު އިތުރު ކުރުމުގެ ވައުދު ފުއްދަން ކުޅިވަރު ކުޅޭ ގިނަ ސްޓޭޑިއަމްތަކެއް އެޅުމުގެ މަސައްކަތް އަންނަނީ ކުރަމުންނެވެ. ގިނަ ދަނޑުތައް ތައްޔާރުކުރަނީ ބައިނަލްއަގުވާމީ ފެންވަރަށެވެ.
"އިހަކަށް ދުވަހު ނޫންތޯ މި ހުޅުވީ ބިލިއާޑް ދުނިޔޭގެ ފެންވަރު ތަނެއް. އެތަނަށް އައި ދުނިޔޭގެ ޗެމްޕިއަން ބުނީ މި ވަރުގެ ފެސިލިޓީއެއް ނުދެކެމޭ. އެހާކަންހާވަރު ނޫންތޯ (ނިސްބަތުން) ކުޑަ ކުޅިވަރަކަށް ކޮށްދެވޭނީ،" މަހުލޫފް ވިދާޅުވި އެވެ.
"އެއްވެސް ކުޅިވަރަކުން ނުކެރޭނެ މިއަދު އައިސް ބުނާކަށް މީގެ ކުރިން އެ އަށް ވުރެ ރަނގަޅޭ. ލާހިކެއް ނޫން ބުނާކަށް. ހުރިހާ ކުޅިވަރަކުން ހުންނާނީ ރަނގަޅަށް ކޮށްދީފައި. އެންމެ ބޭނުންވާ ސްޕީޑެއްގައި ހުރިހާ ކަމެއް ވަމުން ނުދިޔަކަސް ހުރިހާ ދިމާލަކުން ވެސް ކަންތައް ކުރިއަށްދޭ،"
މިނިސްޓަރު ވިދާޅުވީ ބާސްކެޓް އިންޑޯ އާއި ވޮލީ އިންޑޯ ހެދުމުގެ ހުއްދަ އަށް މާލެ ސިޓީ ކައުންސިލާއި ޕްލޭނިން މިނިސްޓްރީ އަށް ފޮނުވައިގެން އެ ކަންތައްތައް މިހާރު ކުރަމުން އަންނަ ކަމަށެވެ. އަދި ސްވިމިން ޕޫލްގެ އެންމެ ފަހުގެ ހުއްދަތައް ލިބި މި މަސް ތެރޭގައި އަމަލީ މަސައްކަތް ފެށޭނެ ކަމުގެ އުއްމީދު އެބައޮތް ކަމަށް ވެސް މިނިސްޓަރު ވިދާޅުވި އެވެ.
ކުޅެން ދިއުމުގެ ހުއްދައެއް ނެތް: މަހުލޫފް
ކޮވިޑް-19ގެ ކޭސްތައް މާލެ ސަރަހައްދުގައި ގިނަވާތީ މިދިޔަ ފެބްރުއަރީ މަހުގެ ކުރީކޮޅުގައި ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ވަނީ ކުޅިވަރު ހަރަކާތައް ހުއްޓާލަން އަންގައިފަ އެވެ. އޭގެ ފަހުން އެކި ކުޅިވަރުތަކުން ކުރި ރިކުއެސްޓްތަކަށް ބަލާފައި ހާއްސަ ގައިޑްލައިނެއްގެ ތެރެއިން ބައެއް ކުޅިވަރުތައް ކުރިއަށްގެންދަން ހުއްދަ ދިނެވެ. ބައެއް ކުޅިވަރުތައް ފެށީ މިނިސްޓްރީގެ ހުއްދަ ހޯދައިގެންނެވެ. އޭގެ ތެރޭގައި ދިރާގު ދިވެހި ޕްރިމިއާ ލީގު ވެސް ހިމެނެ އެވެ.
،މިނިސްޓަރު މަހުލޫފް ވިދާޅުވި މި ފަހުން ކޮވިޑާ ގުޅިގެން ކަންކަން ހުއްޓާލަން އެންގިފަހުން އެއްވެސް އިރަކު ކުޅެން ދިއުމުގެ ހުއްދައެއް ނުދޭ ކަމަށެެވެ.
"ދެން އެކަމު މަޑުމަޑުން ކަންކަން ހަމައަކަށް އެޅެމުން ދިޔަ ވަރަކަށް ޒުވާނުން ނުކުމެ ކުޅެން ފެށީ ފުޓްސަލް. ފުޓްސަލް ދަނޑުތައް ހުރީ އަޅުގަނޑުމެން އަތުގައި އެންމެ ދަނޑެއް. ދެން ހުރި ހުރިހާ ދަނޑުތަކަކީ އެކި ފަރާތްތަކަށް ދޫކޮށްފައި ހުރި ތަންތަން. އެތަންތަނުގައި ކުޅެން ފެށީ. މީހުންނަށް ހީވީ ހުއްދަ އޮތޭ،" މިނިސްޓަރު ވިދާޅުވި އެވެ.
،މަހުލޫފް ވިދާޅުވީ އަނެއްކާ ވެސް ކޮވިޑް-19ގެ ކޭސްތައް ރެކޯޑް އަދަދަކަށް މި ދުވަސްވަރު ގިނަވާން ފެށުމުން އެޗްޕީއޭގެ އެންގުމަށް މިނިސްޓްރީގެ ބެލުމުގެ ދަށުގައި ހުރި ކުޅިވަރު ކުޅޭ ތަންތަން ބަންދުކުރަން ނިންމީ ކަމަށެވެ.
"ކޭސްތައް މައްޗަށް ދާން ފެށީމަ އަޅުގަނޑުމެންނަށް އަންގައިފި އަޅުގަނޑުމެން ދަށުގައި ހުރި ހުރިހާ ތަނެއް ކުޅުން މަނާކުރުން ޔަގީންކުރާށޭ. އެ ހިސާބުން ބާސްކެޓް ކޯޓާ ތަންތަން ބަންދުވެގެން ދިޔަ ގަޑީގައި އެއީ ތަފާތު ކުރުމެއް ކަމަށް ބައެއް ކުދިންނަށް ހީވީ. އެކަަމަކު އަޅުގަނޑަށް ކުރިން ރީޗްކުރި އެކި ފަރާތްތަކަށް ހުންނާނެ ދަންނަވާފައި އެއީ މަނާ ކަމެކޭ،" މިނިސްޓަރު ވިދާޅުވި އެވެ.
"އަޅުގަނޑު ވެސް ވަރަށް ބޭނުން ކުޅެލަން ދާން. ނުގޮސް މިހުންނަނީ މަނާ ކަމެއް ވީމަ،"
އެކުވެނި ބާސްކެޓްބޯޅަ އައުޓްޑޯ ކޯޓު ބަންދުކުރުމުން ބާސްކެޓްބޯލް އެސޯސިއޭޝަންގެ އިސްވެރިންނާއި ކްލަބްތަކުގެ އެެކި ފަރާތްތަކާއި އެކެޑަމީތަކުން ވަނީ ކަންބޮޑުވުން ފާޅުކޮށްފަ އެވެ. އަދި ހުޅުމާލޭގައި ކުރިއަށްގެންދިޔަ ފުޓްސަލް އަދި ވޮލީބޯޅަ މުބާރާތެއް ހުއްޓާލަން ޖެހުމާ އެކު ގިނަ އަދަދެއްގެ ޒުވާނުންތަކެއް ވަނީ ޑިރެކްޓަ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ދިރިއުޅުއްވާ ގެކައިރީގައި މުޒާހަރާކޮށްފަ އެވެ.
މިނިސްޓަރު ވިދާޅުވީ ކުޅިވަރުތައް ހުއްޓާލާފައި ބާއްވަން ޖެހޭތީ މީގެ ސަބަބުން އެތައް ގެއްލުންތަކެއް ކުރިމަތިވާނެ ކަން އެނގޭ ކަމަށާއި އެކަމަކު މި ވަގުތަށް ކޮންމެވެސް ވަރެއްގެ ކަންތައްތަކެއް ބޭނުން ނުވިޔަސް ހުއްޓާލަން ޖެހޭ ކަމަށެވެ. އެ ގޮތުން މިނިސްޓަރު ވަނީ ތިން ވަނަ ޑިވިޝަން ފުޓްބޯޅަ މުބާރާތް ހުއްޓާލަން ޖެހުމުން ކްލަބްތަކަށް ލިބޭ ގެއްލުން ފާހަގަކޮށްފަ އެވެ.
