އެފްއޭއެމް އާއި ޔޫތު މިނިސްޓްރީ ގުޅިގެން ޓާފް ދަނޑު އަޅަން ނިންމާފައިވާ 16 ރަށެއްގެ ނަން މިއަދު އިއުލާނުކޮށްފި އެވެ.
އެ ރަށްތައް އިއުލާނުކުރީ މިއަދު މެންދުރު ގަލޮޅު ދަނޑުގެ ވީއައިޕީ ރޫމްގައި ބޭއްވި ނޫސްވެރިންގެ ބައްދަލުވުމެއްގަ އެވެ.
އެފްއޭއެމުން ޓާފް ދަނޑު އަޅަން ނިންމާފައިވާ ރަށްތަކަކީ އދ. ދަގެނގި، ލ. މާބައިދޫ، ގދ. ނަޑެއްލާ، ބ. ކަމަދޫ، މ. ނާލާފުށި، ށ. ކޮމަންޑޫ، ކ. ހުރާ، ރ. އިނގުރައިދޫ، ފ. ބިލެއްދޫ، ހއ. ކެލާ، ތ. ގުރައިދޫ، އއ. އުކުޅަސް، ތ. ވަންދޫ، ގއ. ގެމަނަފުށި، އއ. މާޅޮސް އަދި ގއ. ކޮލަމާފުށި އެވެ.
މި ދަނޑުތަކަކީ މިދިޔަ އަހަރު މާޗް މަހު ދެކުނު ކޮރެއާގެ ކުންފުންޏެއް ކަމަށްވާ ސްކައިވިންޑް ގްލޯބަލްއާ އެކު އެއްބަސްވުމެއްގައި ސޮއިކުރިއިރު، ރާއްޖޭގެ އެކި ސަރަހައްދުތަކުގައި އަޅަން ނިންމި 20 ދަނޑުތަކުގެ ތެރޭގައި ހިމެނޭ ދަނޑުތަކެކެވެ. އެފްއޭއެމުން ބުނީ ހިމެނޭ ދަނޑުތަކަކީ ހުޅުމާލޭގައި އަޅާ ފުޓްބޯޅަ ސްކޫލަށާއި ވިލިމާލޭގައި އަޅާ ދަނޑާއި މާލޭ ހިއްކިބިމުގައި އޮތް ސަރަހައްދުގައި އަޅާ ދަނޑެވެ.
އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ކޮންމެ ދަނޑަކީ ވެސް ފީފާ އެޕްރޫވް ޓާފް ދަނޑެއް ކަމަށާއި ފެންސް ޖަހާފައި ރޭގަނޑު ކުޅެވޭ ގޮތަށް ލައިޓް ޖަހާފައި ދިވެހި ޕްރިމިއާ ލީގު ކުޅެވޭ ފެންވަރަށް ގާއިމްކުރެވޭ ދަނޑުތަކެއް ކަމަށެވެ.
"މުސްތަގުބަލުގައި އަޅުގަނޑުމެން 2023/2024 ގައި ރާވާފައި މިވާ ބޮޑު ފުޓްބޯޅަ ލީގު. ނުވަތަ ދިވެހި ޕްރިމިއާ ލީގު މުޅި ރާއްޖެ އަށް ފުޅާކުރުމަށް މިކުރެވޭ މަސައްކަތުތައި މި ދަނޑުތަކުގެ ބޭނުން ވަރަށް ބޮޑަށް ހިފިގެންދާނެ. އަޅުގަނޑުމެން މި ދަނޑުތައް އެޅުމުގެ މައިގަނޑު ބޭނުމަކަށް މިވަނީ މި މުބާރާތަށް މި ލީގަށް ސަރުކާރާ ގުޅިގެން އެކި ސަރަހައްދުތަކުގައި ފެންވަރު ރަނގަޅު ދަނޑުތަކެއް އެޅިގެންދިއުން،" ބައްސާމް ވިދާޅުވި އެވެ.
މި ސަރުކާރުން ވަނީ ފަސް އަހަރު ތެރޭގައި 100 ޓާފް ދަނޑު އަޅަން އަމާޒުހިފައިފަ އެވެ. އޭގެ ތެރެއިން 75 ދަނޑެއްގެ މަސައްކަތް މިހާރު ވެސް ކުރިއަށްދާއިރު، އޭގެ ތެރެއިން 15 ވަރަކަށް ދަނޑެއްގެ މަސައްކަތް މިހާރު ވަނީ ނިމިފަ އެވެ. އަދި ވަރަށް އަވަހަށް އިތުރު ދަނޑުތަކެއް ނިމޭނެ ކަމަށް މިނިސްޓްރީން މައުލޫމާތު ދެ އެވެ.
ޔޫތު މިނިސްޓަރު އަހުމަދު މަހުލޫފް ވިދާޅުވީ މި ދަނޑުތަކުގެ މަސައްކަތްކުރަން ޖެހޭ އެންމެ ބޮޑު ސަބަބަކީ ކޮންމެ ރަށަކަށް ދިޔަސް އެންމެ ފުރަތަމަ އެ ރަށަކުން އެދޭ ކަމަކީ ފުޓްބޯޅަ ދަނޑެއް ނޫނީ ފުޓްސަލް ދަނޑެއް އެޅުމަށް އެދޭ އެދުމެއް ކަމަށެވެ.
"މި ލިސްޓު އެކުލަވާލެވިފައިވަނީ އަޅުގަނޑުމެންނާ އެފްއޭއެމާ މަޝްވަރާ ކުރެވިގެން. 2024 ގައި ދިވެހި ޕްރިމިއާ ލީގު ފުޅާކުރަން އެފްއޭއެމުން މަސައްކަތް ކުރަމުންދާއިރު. އަޅުގަނޑު ގަބޫލުކުރަން މީގެ ސަބަބުން ފުޓްބޯޅަ އަށް ވަރަށް ބޮޑު ކުރިއެރުމެއް ލިބިގެންދާނެ ކަމަށް،" މިނިސްޓަރު ވިދާޅުވި އެވެ.
މަހުލޫފް ވިދާޅުވީ އުއްމީދަކީ ވީހާވެސް އަވަހަށް ދަނޑުތަކުގެ އަަމަލީ މަސައްކަތް ފެށިގެން ވީހާ ވެސް އަވަހަށް ދަނޑުތައް ހަދައި ނިންމާލުން ކަމަށެވެ. މި ލިސްޓު ކަނޑައެޅުމުގައި ރައީސް އޮފީހާއި ރައްޔިތުންގެ މަޖިލީހުގެ އެކި ދާއިރާތަކުގެ އެ ހުރި ކަންކަން ބެލުމާއި އެކި ގޮތްގޮތުން މަޝްވަރާ ކުރެވިގެންދިޔަ ކަން މިނިސްޓަރު ފާހަގަކުރެއްވި އެވެ.
