ހެލްތު މިނިސްޓްރީ އިސް ދެ މަގާމަކަށް ދެ ބޭފުޅަކު، ރައީސް އިބްރާހިމް މުހައްމަދު ސޯލިހު މިއަދު އައްޔަން ކުރައްވައިފި އެވެ.
އެގޮތުން، އައްޔަން ކުރައްވާފައިވަނީ ހެލްތު މިނިސްޓްރީގެ ސްޓޭޓްގެ މަގާމަށް އާއިޝަތު ރަޝީދާއި މިނިސްޓްރީގެ ޑެޕިއުޓީ މިނިސްޓަރުގެ މަގާމަށް އަބްދުއްޝަކޫރު އަބްދުލްހަކީމެވެ.
އާއިޝަތު ރަޝީދަކީ މީގެކުރިން ޖެންޑާ މިނިސްޓްރީގެ ސްޓޭޓް މިނިސްޓަރުގެ މަގާމުގައި ހުންނެވި ބޭފުޅެކެވެ. އަބްދުއްޝަކޫރު ކުރިން ހުންނެވީ ޖެންޑާ މިނިސްޓްރީގެ ނައިބުގެ މަގާމުގަ އެވެ.
މި ބަދަލު ގެނެސްފައިމިވަނީ ޖެންޑާ މިނިސްޓްރީގެ ދަށުގައި އޮތް، ނޭޝަނަލް ޑްރަގް އެޖެންސީ (އެންޑީއެން) ހެލްތު މިނިސްޓްރީގެ ދަށަށް ގެނައުމަށްފަހު އެވެ.
ހެލްތުގެ ދެ ނައިބުންގެ މަގާމު ހުސްވީ، ވެންޓިލޭޓަރު މައްސަލާގައި ކޮރަޕްޝަންގެ ތުހުމަތު އޮތް ޝިޔާމާ މުހައްމަދާއި ނިޝާމާ މުހައްމަދު އިއްޔެ މަގާމުން ވަކިކުރުމާ ގުޅިގެންނެވެ.
