އެމްޓީސީސީ ހިންގުމުގައި އަންހެނުންގެ ދައުރު ފުޅާކޮށް، ކުންފުނީގެ ވަޒީފާތަކުގައި އަންހެން މުވައްޒަފުން އިތުރުކުރުމުގެ މަގްސަދުގައި އެކުންފުނިން ހާއްސަ މަޝްރޫއެއް ފަށައިފި އެވެ.
"އަދަދު" އަށް މައުލޫމާތު ދެއްވަމުން އެމްޓީސީސީގެ ސީއީއޯ އާދަމް އާޒިމް ވިދާޅުވީ، ވަޒީފާތަކުގައި އަންހެން މުވައްޒަފުން އިތުރުކުރުމުގެ ގޮތުން، އެ ކުންފުނިން އަލަށް ފަށާ "އިންޓަގްރޭޓެޑް ނެޝަނަލް ޕަބްލިކް ފެރީ ނެޓްވޯކް" ޕްރޮޖެކްޓު، ފަރުމާކޮށްފައިވަނީ އެ ކުންފުނީގެ ވަޒީފާ އަށް ވަންނަން ބޭނުންވާ އަންހެނުންނަށް އަމާޒުކޮށްގެން ކަމަށެވެ.
އެމްޓީސީސީއަކީ ގިނަ އަދަދަކަށް މުވައްޒަފުން ތިބި ނަމަވެސް އަންހެން މުވައްޒަފުންގެ އަދަދު މަދެވެ. މިދިޔަ ޑިސެމްބަރު މަހުގެ ނިޔަލަށް ކުންފުނީގައި 1،834 މުވައްޒަފުން ތިބިއިރު 90 ޕަސެންޓު މުވައްޒަފުންނަކީ ފިރިހެނުންނެވެ.
ކުންފުނީގެ ހުރިހާ މަސައްކަތެއްގައި ހަމަހަމަ ފުރުސަތު ދިނުމަށް އެމްޓީސީސީ އިން އަންނަނީ އަންހެނުނަށް ހާއްސަ އިސްކަމެއް ދީގެން މަސައްކަތްތަކެއް ކުރަމުންނެވެ.
އިންޓާގްރޭޓެޑް ނޭޝަނަލް ޕަބްލިކް ފެރީ ނެޓްވޯކް
މިއީ ދިވެހިރާއްޖެ ހައި-ސްޕީޑް ފެރީ ނިޒާމަކުން ގުޅާލުމަށް ފަރުމާކޮށްފައިވާ މަޝްރޫއެކެވެ. މި ފެރީ ނިޒާމު ގާއިމް ކުރެވުމުން ލުއި ފަސޭހަ އަވަސް ހިދުމަތެއް ދަތުރުކުރާ ފަރާތްތަކަށް ފޯރުކޮށްދެވޭނެ އެވެ. އަދި ރާއްޖޭގެ އެކި ރަށްރަށުގައި ދިރިއުޅޭ ރައްޔިތުން ގުޅުވާލާ، އެ ރައްޔިތުންނަށް ބޭނުންވާ ހިދުމަތްތައް ފަސޭހަކަމާ އެކު ފޯރުކޮށްދެވޭނެ މަގު ފަހިވެގެންދާނެ އެވެ.
"އިންޓާގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" މަޝްރޫގެ ދަށުން މިއަހަރުގެ ނޮވެމްބަރު މަހު ފެށުމަށް ހަމަޖެހިފައިވާ ސްޕީޑް ފެރީގެ ހިދުމަތް ދިނުމަށް ހަމަޖެހިފައިވަނީ އަންހެން މުވައްޒަފުން ބޭނުން ކޮށްގެންނެވެ.
އެމްޓީސީސީގެ ސީއީއޯ އާދަމް އާޒިމް "އަދަދު" އަށް ވިދާޅުވި ގޮތުގައި މި މަޝްރޫގެ މުވައްޒަފުންގެ ގޮތުގައި އަންހެނުން ހިމެނުމަށް އިސްކަންދޭން އެމްޓީސީސީއިން ވަނީ ނިންމާފަ އެވެ. އެގޮތުން މިހާރުން ފެށިގެން އަންހެނުން ނެގުމުގެ މަސައްކަތް ދަނީ ކުރެވެމުންނެވެ.
"މިހާ ކުރިއާލާ މި އުޅެނީވެސް އެ ކުދިން ނަގައިގެން އެ ކުދިންނަށް ބޭނުންވާ ކަސްޓަމާ ސާވިސް ޓްރެއިންނިންތަކާއި ޓެކްނިކަލް ޓްރެއިނިން އަދި ކެޕްޓަނުން ޓްރެއިން ކުރުމަށް،" އާޒިމް ވިދާޅުވި އެވެ.
މި މަޝްރޫއަށް މުވައްޒަފުންގެ 50 ޕަސެންޓް އަންހެނުން ހޮވަން އެމްޓީސީސީން ވަނީ ނިންމައިފަ އެވެ.
"ވީހާވެސް ގިނަ އަންހެނުން ބައިވެރިވުމަކީ އަޅުގަނޑުމެންގެ ވަރަށް ބޮޑު އެދުމެއް" އާޒިމް ވިދާޅުވި އެވެ.
ނަމަވެސް އާޒިމް ވިދާޅުވި ގޮތުގައި އަންހެން މުވައްޒަފުން ނުލިބިއްޖެ ހާލަތެއްގައި ފިރިހެން މުވައްޒަފުންނާއި އެކު ވެސް މަސައްކަތް ކުރިއަށް ދާނެ އެވެ.
"ލޯންޗުގެ ފަޅުވެރިއަކަށް ނުވަތަ ކެޕްޓަނަކަށް އަންހެނަކު ހުންނަތަން ފެނުމަކީ ހަމަގައިމު ވެސް އުފާވެރި މަންޒަރަކަށް ވާނެ، އުއްމީދީ ބަދަލަކަށް ވާނެ،"
