މިދިޔަ ބުރާސްފަތި ދުވަހު މާލޭގައި ދުނިޔޭގެ ފެންވަރުގެ ޕޫލް ބިލިއާޑް ފެސިލިޓީއެއް ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ސްޕޯޓްސް މިނިސްޓަރު އަހުމަދު މަހުލޫފް ވަނީ ކުރިން ވެސް އެކި ޕޯޑިއަމްތަކުގައި ދައްކަވާފައިވާ އެއް ވާހަކަ ތަކުރާރުކުރައްވައިފަ އެވެ. އެއީ ހަމައެކަނި ފުޓްބޯޅަ އަށް ހަރަދުކުރާ ކަމަށް ދެކެވޭ ވާހަކަތަކާ ގުޅޭގޮތުންނެވެ.
"އަޅުގަނޑާ ދިމާލަން ބައެއް ފަހަރު މީހުން ބުނޭ ހަމައެކަނި ތަރައްގީ ކުރަނީ ފުޓްބޯޅަ ދަނޑުހޭ. ތިއީ ފުޓްބޯޅަ މިނިސްޓަރުހޭ. އަޅުގަނޑު ދަންނަވާނީ ހަމައެކަނި މިއަދު (ބުރާސްފަތި ދުވަހުގެރޭ) މިތަނަށް ބަލާލުމުން ވެސް އެނގޭނެ އަޅުގަނޑުމެން ހަމައެކަނި އަމާޒުކުރަނީ. ނޫން ނަމަ (ހަމައެކަނި) ކުރާ މަސައްކަތަކީ ފުޓްބޯޅަ ތަރައްގީކުރުން ނޫންކަން،" ބިލިއާޑް ފެސިލިޓީ އަށް އިޝާރާތްކޮށް މިނިސްޓަރު މަހުލޫފް ވިދާޅުވި އެވެ.
މީގެ ކުރިން މި ސަރުކާރުން ގާއިމްކުރި އެކި ކުޅިވަރުގެ ވަސީލަތްތައް ރަސްމީކޮށް ހުޅުވަން ބާއްވާފައިވާ އެކި ރަސްމިއްޔާތުތަކުގައި މިނިސްޓަރު މަހުލޫފް ދެއްވި ސްޕީޗްގައި ވެސް ވަނީ ފުޓްބޯޅަ އަށް ހަރަދުކުރާ ސަބަބުތައް ކިޔައިދީފަ އެވެ. އަދި އެކި މީޑިއާތަކުން ބާއްވާ ޕްރޮގްރާމްތަކުގައި ވެސް ވަނީ ފުޓްބޯޅަ އަށް މިނިސްޓްރީން ހޭދަކުރަން ޖެހޭތީ އެކަމާ ގުޅޭގޮތުން ތަފްސީލީ ގޮތަކަށް ވާހަކަ ދައްކަވައިފަ އެވެ. އެކަމާ ބެހޭގޮތުން ބިލިއާޑް ފެސިލިޓީ ހުޅު ހަފްލާގައި ވެސް މި ވަނީ އަލި އަޅުވާލައިފަ އެވެ.
މިނިސްޓަރު މަހުލޫފް ވިދާޅުވީ ގިނަ ޒުވާނުންގެ ޝައުގުވެރިކަން ހުރީ ފުޓްބޯޅަ އަށް ކަމަށްވާތީ އެ އަށް ކުރެވޭ މަސައްކަތް ވެސް ގިނަވާނެ ކަމަށެވެ.
"ރާއްޖޭގައި ވަރަށް ގިނަ އަދަދެއްގެ ޒުވާނުން ފުޓްބޯޅަ ކުޅޭތީވެ އަޅުގަނޑުމެން އެންމެ ފުރަތަމަ ރަށަކަށް ދިޔައީމަ. އެންމެ ފުރަތަމަ އެ މީހުން އެދޭ ކަމަކީ ފުޓްބޯޅަ ދަނޑުގެ ކަންކަން. އެހެންވީމަ އަޅުގަނޑުމެން އެކަން ވެސް ކޮށްދެނީ. ކޮށްދޭ ކަންތައް ހަގީގަތުގައި ގިނަވުމުގެ ނަތީޖާ އަކީ ފެންނަ ފުޓްބޯޅަ ދަނޑުތަކުގެ އަދަދު ގިނަވީމަ ނޫނީ ފުޓްސަލް ދަނޑުގެ އަދަދު ގިނަވީމަ ކުރެވެނީ ޝަކުވާއެއް،" މިނިސްޓަރު ވިދާޅުވި އެވެ.
އެކަމަކު ރާއްޖޭގެ ފުޓްބޯޅައިގައި އުޅޭ ގިނަ ފަރާތްތަކުން ފާހަގަކުރާ އެއް ކަމަކީ ފުރަތަމަ ޑިވިޝަން ފުޓްބޯޅަ ކުޅެން އެންމެ ފުރަތަމަ ދުވަހުން ފެށިގެން މިހާތަނަށް ވެސް އޮތީ ގަލޮޅު ދަނޑު ކަމަށާއި އެކަން ބަދަލުވާން ޖެހޭނެ ކަމަށެވެ. ދާދި ފަހުން މިނިސްޓަރު މަހުލޫފް ވަނީ ރާއްޖެ ޓީވީ ޕްރޮގްރާމެއްގައި ވާހަކަ ދައްކަވަމުން ގަލޮޅު ދަނޑުގެ މަރާމާތުގެ ކަންތައްތައް ކައިރި މުސްތަގުބަލެއްގައި ފެށިގެންދާނެ ކަމަށް ވިދާޅުވެފަ އެވެ. ޕްލޭނިން މިނިސްޓްރީގެ އެސެސްމަންޓަކަށް ފަހު ގަލޮޅު ދަނޑުގެ ދެ ފަޅިއެއް އޮތީ ބަންދުކޮށްފަ އެވެ.
މި ސަރުކާރުން ވަނީ ފަސް އަހަރު ތެރޭ 100 ޓާފް ދަނޑު އަޅަން އަމާޒުހިފައިފަ އެވެ. އެއީ 2023 ވަނަ އަހަރު އެފްއޭއެމުން މުޅި ރާއްޖެ އަށް ހުޅުވާލައިގެން ލީގު ކުރިއަށްގެންދަން ޕްލޭންތައް ހަދަމުންދާ މަސައްކަތަށް ވެސް ލިބޭނެ ފަސޭހައެކެވެ.
މި ސަރުކާރުން ކުޅިވަރު އިންފްރާސްޓްރަކްޗާތައް ތަރައްގީކުރަން ކުރާ މަސައްކަތްތައް ގިނަ ކުޅިވަރު އެސޯސިއޭޝަންތަކުގެ ވެރިން ވަނީ ފާހަގަކޮށްފަ އެވެ. އަދި މިއީ ރާއްޖޭގެ ކުޅިވަރުގެ އިންފްރާސްޓްރަކްޗާ އަށް ބަލާއިރު އެންމެ ބޮޑެތި ތަރައްގީ ގެންނަ އަހަރު ކަމަށް އެސޯސިއޭޝަންތަކުން ވަނީ ބުނެފަ އެވެ.
"މިކަން އެންމެ ބޮޑަށް މިކުރެވޭ އެންމެ ބޮޑު ސަބަބަކީ ރައީސުލް ޖުމްހޫރިއްޔާ (އިބްރާހިމް މުހައްމަދު ސޯލިހް) ހަގީގަތުގައި ވެސް ވަރަށް ބޮޑަށް ކުޅިވަރަށް އަހައްމިއްޔަތުކަން ދެއްވާ. ކުޅިވަރު އެނގިވަޑައިގަންނާ ބޭފުޅެއްވީމަ ވަރަށް ބޮޑަށް އަޅުގަނޑުމެންނަށް އެއްބާރުލުން ދެއްވާ. އެކަމަށްޓަކައި ރައީސް ކޮށްދެއްވާ މަސައްކަތަށް ޝުކުރު ދަންނަވަން،" މިނިސްޓަރު ވިދާޅުވި އެވެ.
މަހްލޫފު ވަނީ ކުޅިވަރު އެސޯސިއޭޝަންތަކާއި ގައުމީ ކުޅިވަރު އެތުލީޓުން އަދި އެ މީހުންގެ ބެލެނިވެރިން ގުޅިގެން ކުޅިވަރުގެ ކުރިއެރުމަށް ކުރާ މަސައްކަތަށް ޝުކުރުއަދާކޮށްފަ އެވެ.
