ސަރުކާރު ހިއްސާވާ ކުންފުންޏެއްގެ އިސްވެރިއަކު ނުވަތަ ވަޒީރަކު ރުއްސައިގެން ރަށު ތަރައްގީ ގެނައި ޒަމާން މާޒީވެއްޖެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ނ. އަތޮޅު އަދި ރަށު ކައުންސިލް ކުރިއަށްދާނެ ގޮތުގެ މަޝްވަރާ ބައްދަލުވުން ނިންމުމަށް ރޭ ބޭއްވި ހަފްލާގައި ވާހަކަ ދައްކަވަމުން ނަޝީދު ވިދާޅުވީ މިހާރު ރާއްޖޭގައި ކަންތައް ހިނގަނީ މީގެ 12 އަހަރު ކުރިން 2009 ގައި އެމަނިކުފާނު ވެރިކަމަށް ވަޑައިގެންނެވިއިރު ކަންތައް ހިނގި ގޮތަށް ނޫން ކަމަށެވެ.
"ތިމަންނާމެންދެން މި ދަނީ ތިމަންނާމެންގެ ކަންކަން ނިންމާލާށޭ، ތިމަންނާއެއް ދެން ނެތީމޭ މާލެ އައިސް ވަޒީރު ގޭދޮށުގައި މަޑުކޮށްލާގެން ހުރެ ދެން އެ ލިބުނު މިންވަރު ހިފާގެންގޮސް ރަށުގައި ރައްޔިތުން ގާތުގައި ވިދާޅުވީ މިހެންނޭ ވިދާޅުވީ އެހެންނޭ އެވާހަކަ ދައްކާކަށް ތިމަންނާ ނެތީމޭ. ތިމަންނާއަކު ނެތީމޭ ސަރުކާރު ހިއްސާވާ ކުންފުންޏެެއްގެ މެނޭޖިން ޑިރެކްޓަރު އަރިހަށް ގޮސްގެން އޭނާއާއި އެކު ކޮފީއަކަށް އަރާލާގެން، އޭނާ ހިތްހަމަ ޖައްސާލާގެން، ވަޒީރުބޭފުޅަކު ރުއްސާލައިގެން ތިމަންނާގެ ރަށުގެ ކަންތައް ފުރިހަމަ ވާނީ. ނޫން އެ ޒަމާން ނިމިއްޖެ،" ނަޝީދު ވިދާޅުވިއެވެ.
އޭގެ އިތުރުން އެ ބައްދަލުވުމުގައި ނަޝީދު ވަނީ ލާމަރުކަޒީ ނިޒާމާ ގުޅޭ ގޮތުން ވަރަށް ބޮޑަށް ވާހަކަ ދައްކައިފަ އެވެ. އެގޮތުން އެ ނިޒާމުން ގެނެސްފައިވާ ބަދަލުތަކާ ގުޅިގެން ރައްޔިތުންނަށް އެ ރަށެއްގައި ތިބެގެން އެ ރަށެއްގެ ތަރައްގީއަށް މަސައްކަތް ކުރަން މަގުފަހިވެފައިވާ ކަމަށް ނަޝީދު ވިދާޅުވި އެވެ.
"އަޅުގަނޑު ހަނދާން އެބަހުރި ނ. މާޅެންދޫ ގައި ވެސް އަދި އަތޮޅު ހުރިހާ ރަށެއްގައި ވެސް، ތެދުވެ ހަތަރު އަނގޮޅި ކަންމަތީގައި ބުނިން މި ރާއްޖެ މިދަނީ ބަލަވަމުންނޭ، ޒަމާނުންސުރެ ފަށައިގެން މި ރާއްޖޭގައި ވެރިކަން ކުރި ގޮތާއި، އަދި އެ ވެރިކަން ކުރި މީހުން މިދަނީ ބަދަލުވުމަށޭ،" ނަޝީދު ވިދާޅުވި އެވެ.
ނަޝީދު ވިދާޅުވީ މިއަދު މި ފެންނަނީ ބަދަލުވެފައިވާ "އަނެއް ދިވެހިރާއްޖެ" އެއް ކަމަށެވެ. އަދި މިފެނިގެންދާނީ ވަރަށް ގިނަ ބައެއްގެ ބުރަ މަސައްކަތް ކަމަށް ވެސް އެމަނިކުފާނު ވިދާޅުވި އެވެ.
މީގެ އިތުރުން ވެސް ނަޝީދު ވިދާޅުވީ، މިއަދު ފެނިގެން މިދަނީ ފަހުރުވެރިކަމާއި އެކު ރައްޔިތުން އަމިއްލައަށް ހަލާލު މަސައްކަތްކޮށްގެން އަތޮޅެއް ކޮޅަށް ތެދުވާ މަންޒަރު ކަމަށެވެ.
"ކުޑަ ކުޑަ އޮށެއްގެ ސިއްރުން ވަރަށް ބޮޑު ބިޔަ ގަހެއް ފަޅުއްވާ، އޭގެ މާމެލާ މެލިން އަޅުގަނޑުމެންނަށް އިރާދަކުރެއްވިއްޔާ ތަނަވަސްކަމާއި ފައިދާއާއި އުފާވެރި ދިރިއުޅުމެއް ހޯދޭނެ،" މި ހަފްލާ ނިންމާލަމުން ނަޝީދު ވިދާޅުވި އެވެ.
ރައްޔިތުންނަށް ވަޒީރުން ރުއްސަން ނުޖެހޭނެ ކަމަށް ވިދާޅުވެ ރައީސް ނަޝީދު ވާހަކަ ދައްކަވާފައި މި ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ކެބިނެޓަށް ބަދަލުތަކެއް ގެންނަން ނިންމަވާފައިވާ ކަމަށް އެމަނިކުފާނުގެ އަރިހުން ސަރުކާރު ކޯލިޝަންގެ ޕާޓީތަކަށް އަންގަވާފައި އޮއްވަ އެވެ.
ކެބިނެޓަށް ގެންނަ ބަދަލުތަކުގެ ތެރޭގައި ފިޝަރީޒް މިނިސްޓަރު ޒަހާ ވަހީދު އެ މަގާމުން ވަކިކޮށް އެ ވުޒާރާއަށް ތިމާވެއްޓާ ބެހޭ މިނިސްޓަރު ޑރ. ހުސެއިން ރަޝީދު ހިމެނޭ ކަމަށްވެ އެވެ. ތިމާވެއްޓާ ބެހޭ މިނިސްޓްރީއަށް އައްޔަން ކުރަނީ ރައީސް އޮފީހުގެ ޕޮލިސީ ސެކްރެޓަރީ އައިމިނަތު ޝައުނާ ކަމަށް ވެސް ވެ އެވެ.
