ޒުވާން ކުޅުންތެރިން އުފެއްދުމުގެ ވިސްނުމުގައި އެފްއޭއެމުން ބާއްވަމުން އަންނަ ޔޫތު ފުޓްބޯޅަ މުބާރާތަށް ކުޅުންތެރިން ހޯދުމުގެ ވިސްނުމުގައި މި މުބާރާތުގެ އެންމެ ކާމިޔާބު ޓީމު ކަމަށްވާ އީގަލްސް އިން މިރޭ ޓްރަޔަލްސްތައް ފަށަން ނިންމައިފި އެވެ.
އެފްއޭއެމުން ވަނީ ޖޫން މަހުގައި ޔޫތު ފުޓްބޯޅަ މުބާރާތް ފަށަން ނިންމާފައިވާކަން ކްލަބްތަކަށް އަންގައިފަ އެވެ.
އީގަލްސް އިން މިރޭ ޓްރަަޔަލްސްތައް ފަށަން ނިންމާފައިވަނީ މާފަންނު ޓާފް ދޭއްް ގައި 22:30 އިން ފެށިގެންނެވެ. މި ފަހަރުގެ ޔޫތު މުބާރާތް ހާއްސަކުރެވިފައިވަނީ 18 އަހަރުން ދަށަށް ކަމަށް ވާތީ ޓްރަޔަލްސްގައި ބައިވެރިވެވޭނީ 2003 އާއި 2004 ވަނަ އަހަރު އުފަންވި ކުދިންނަށެވެ.
"ސިލެކްޝަން ތަކުން ކުދިން ފައިނަލްކުރާނީ ކުދިންގެ ހުނަރު ދައްކާލުމަށް އަދި އެކުދިންނަށް އެކަށީގެންވާ ވަގުތު ދީފައި. އެ ގޮތުން ފައިނަލް ސިލެކްޝަން ހަދާނީ އެކި ދުވަސްތަކުގައި ޓްރެއިނިންތައް ބޭއްވުމަށް ފަހު،" އީގަލްސް އިން ބުންޏެވެ.
އީގަލްސްގެ ޓްރަޔަލްސްގައި ބައިވެރިވާން ޝައުގުވެރިވާ ކުދިން އިތުރު މައުލޫމާތު އޮޅުންފިލުވުމަށް 7530613 ނޫނީ 7991869 އަށް ގުޅައިގެން ކުރިއަށް ގެންދެވޭނެ އެވެ.
އެފްއޭއެމުން 2011 ވަނަ އަހަރު ބާއްވަން ފެށި ޔޫތު މުބާރާތް މެދުކެނޑުނީ 2014 ވަނަ އަހަރު ބޭއްވުމަށް ފަހު އެވެ. އެކާވީސް އަހަރުން ދަށަން ހާއްސަކޮށްގެން ފެށި މި މުބާރާތް 2018 ވަނަ އަހަރު ބޭއްވީ 18 އަހަރުން ދަށަަށެވެ.
އެކަމަކު އެންމެ ފަހުން 2019 ވަނަ އަހަރު ބޭއްވި މުބާރާތް އަލުން 21 އަހަރުން ދަށަށް ބަދަލުކޮށް އުސޫލަށް ބަދަލެއް ގެނަ އެވެ. އެއީ އެއް އަހަރު 21 އަހަރުން ދަށަށް، އަނެއް އަހަރު 19 އަހަރުން ދަށަށް ބާއްވާށެވެ. އޭރުން އެއް އަހަރު ވާދަކުރި ކުޅުންތެރިން އިތުރު ހަރުފަތަކަށް އަރައި އަންނަ އަހަރު ކުޅެން އާ ކުޅުންތެރިންތަކަކަށް ފުރުސަތު ލިބިގެންދާނެތީ އެ ގޮތަށް ވިސްނުމަށް ފަހު އެވެ.
ޔޫތު މުބާރާތުގެ ޗެމްޕިއަންކަން ހޯދާފައިވާ ޓީމުތަކަކީ މާޒިޔާ، ވެލެންސިއާ، ވިކްޓަރީ، ގްރީން ސްޓްރީޓްސް އަދި ކްލަބް އީގަލްސް އެވެ. މީގެ ތެރެއިން ގްރީން ސްޓްރީޓްސް އިން މި މުބާރާތް ކާމިޔާބުކުރީ 18 އަހަރުން ދަށަން ބޭއްވިއިރު އެވެ.
އީގަލްސް އިން ވަނީ މި މުބާރާތް ހަތަރު ފަހަރު ކާމިޔާބުކޮށްފަ އެވެ. ޔޫތު މުބާރާތުން އީގަލްސް އިން ވިދާލި ގިނަ ކުޅުންތެރިން އަންނަނީ މި ވަގުތު އީގަލްސްގެ ފުލް ޓީމަށް ކުޅެމުންނެވެ. އަދި މި މުބާރާތުން ތައާރަފްވި ކުޅުންތެރިން ގައުމީ ސީނިއާ ޓީމަށް ވެސް ކުޅެ އެވެ.
އަންނަ މަހު ފަސް ވަނަ ދުވަހު ޔުނައިޓެޑް ވިކްޓްރީ (ޔޫވީ) އިން ވެސް ވަނީ ޔޫތު މުބާރާތަށް ޓްރަޔަލްސް ފަށަން ވަނީ ނިންމައިފަ އެވެ. ޔުނައިޓެޑް ވިކްޓްރީ ޓީމުގެ ޓްރަޔަލްސްގައި ބައިވެރިވަން ބޭނުންވާ ކުދިން ގުޅާނީ 7911437 އާއި 7499715 އަށެވެ.
