ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ތެރޭގައި މުހިއްމު ބިލުތަކެއްގެ މަސައްކަތް ނިންމައި، މަޖިލިސް ޗުއްޓީއަށް ހިނގައްޖެ އެވެ.
މިއަދު ބޭއްވުނު މިއަހަރުގެ ފުރަތަމަ ދައުރުގެ ފަހު ޖަލްސާ ނިންމަވާލައްވަމުން ރިޔާސަތުގައި އިންނެވި މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ މިދިޔަ ދައުރުގައި ނުނިމިހުރި 24 ބިލަކާއި މި ދައުރުގެ ހުށަހެޅުނު ބިލުތަކާއެކު ޖުމްލަ 35 ބިލެއްގެ މަސައްކަތް ކުރެވުނު ކަމަށެވެ.
އޭގެ ތެރެއިން މި ދައުރުގެ ތެރޭގައި އަށް ބިލެއްގެ މަސައްކަތް ނިންމާފައިވާކަމަށް ވިދާޅުވަމުން، ނަޝީދު ވަނީ ސިފައިންގެ ގާނޫނަށް ގެނުވުނު އިސްލާހުގެ ބިލުގެ އިތުރުން މީހުން ޓްރެފިކް ކުރުމުގެ ގާނޫނަށް ގެނުވުނު އިސްލާހާއި މަތީ ތައުލީމުގެ ބިލު އާއްމު ސިއްހަތުގެ ބިލު ފާހަގަކުރައްވައިފަ އެވެ.
އެމަނިކުފާނު އިތުރަށް ވިދާޅުވީ ކުރީ ދައުރުގައި ނުނިމިހުރި ގަރާރުތަކާއެކު 14 ގަރާރެއްގެ ތެރެއިން މި ދައުރުގެ ތެރޭގައި ފަސް ގަރާރުގެ މަސައްކަތް ނިންމުނު ކަމަށެވެ.
އަދި ސަރުކާރުން ހުށަހެޅި 13 ކަމެއްގެ ތެރެއިން 10 ކަމެއް ނިންމާފައިވާއިރު، ރިޔާސަތުން ހުށަހެޅުނު ހަތް ކަމެއްގެ ތެރެއިން ފަސް ކަމެއް ނިމިފައިވާކަން ނަޝީދު ފާހަގަކުރެއްވި އެވެ.
ފުރަތަމަ ދައުރުގެ އެހެން ބައެއް އުސްއަލިތައް
- ކުއްލި މައްސަލަ - 10
- މެމްބަރުން ހުށަހެޅި މައްސަލަތަކުގެ ތެރެއިން ނިންމުނު - 6
- ކޮމިޓީތައް - 324 ބައްދަލުވުމަކަށް 272 ގަޑިއިރު
- ޖަލްސާތައް - 37 ޖަލްސާއެއްގައި ޖުމްލަ 96 ގަޑިއިރު
- ރިޔާސަތަށް ލިބުނު ސިޓީ - 347 ސިޓީގެ ތެރެއިން 263 ކޮމިޓީތަކަށް ފޮނުވިފައި
އޭގެ އިތުރުން ވަޒީރުންނާ ސުވާލުކުރުމަށް މެމްބަރުން ހުށަހަޅުއްވާ މައްސަލަތަކުގެ ތެރެއިން ކުރީ ދައުރުގެ އަށް ސުވާލާއެކު މި ދައުރުގެ ތެރޭގައި 17 މައްސަލަ ހުށަހެޅުކަމަށް އެމަނިކުފާނު ވިދާޅުވި އެވެ.
"އޭގެ ތެރެއިން ނިމުނީ 19 މައްސަލަ. އަދި ހަ ވަޒީރަކު އައްސޭރީގައި އެބަ ތިއްބެވި،" ނަޝީދު ވިދާޅުވި އެވެ.
މަޖިލީހުގެ އާއްމު ކޮމިޓީން މިއަދު ގަވައިދަށް ގެނައި އިސްލާހާއެކު މަޖިލިސް މިފަހަރު ދަނީ ކުޑަ ބަންދަކަށެވެ.
އެގޮތުން، މިއަހަރުގެ ދެވަނަ ދައުރު ފެށޭނީ އަންނަ މަހުގެ 17 ވަނަ ދުވަހެވެ.
އާއްމު ކޮމިޓީން މަޖިލިސް ޗުއްޓީއަށް ދުވަސްތަކަށް ބަދަލުގެނެސްފައިވަނީ މިހާރު ދިރާސީ އާ އަހަރުގެ ކިޔެވުން ފެށުން ކޮންމެ އަހަރެއްގެ އޯގަސްޓް މަހަށް ބަދަލު ކުރުމުން މަޖިލީހުގެ ޗުއްޓީއާއި ދިރާސީ އާ އަހަރުގެ ޗުއްޓީއާ ދިމާނުވާ ކަމަށް ބުނެ އެވެ.
މިގޮތުން މަޖިލީހުން މިއަދު ބަދަލުގެނެސްފައި ވަނީ މަޖިލީހުގެ ދެވަނަ ދައުރާއި ތިންވަނަ ދައުރު ހިނގާ ދުވަސްތައް ބަދަލު ކުރުމަށެވެ.
އެ އިސްލާހުގައިވާ ގޮތުން، މަޖިލީހުގެ ދެވަނަ ދައުރު ދެން ހިނގާނީ އަންނަ މަހުގެ 17 އިން ފެށިގެން ޖޫން މަހުގެ ނިޔަލަށެވެ.
އަދި މަޖިލީހުގެ ތިންވަނަ ދައުރު ހިނގާނީ އޯގަސްޓް މަހުގެ 16 ވަނަ ދުވަހުން ފެށިގެން ނޮވެމްބަރު މަހުގެ ނިޔަލަށެވެ.
