އެމްއެމްޕީއާރުސީ މެދުވެރިކޮށް ހިންގި ބޮޑު ހިޔާނާތަށް ތުހުމަތުކޮށް، ތަހުގީގީ އިދާރާތަކުން އެކުލަވާލާފައިވާ ލިސްޓު ރައްޔިތުންގެ މަޖިލީހަށް ފޮނުވައިފި އެވެ.
ކުރީގެ ސަރުކާރުގައި މުޅި ދައުލަތުގެ ބައިވެރިވުން ހިމެނޭ ގޮތަށް ހިންގި ހިޔާނާތުން މަންފާވި ކަމަށް ތުހުމަތުވާ 276 މީހުންގެ ލިސްޓެއް އެކުލަވާލީ ފުލުހުންނާއި އޭސީސީ އާއި އެސެޓް ރިކަވަރީ ކޮމިޝަނުންނެވެ.
ތަހުގީގީ އިދާރާތަކުން މި ލިސްޓު މަޖިލީހަށް މިއަދު ފޮނުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެދިވަޑައިގަތުމުންނެވެ. އެމަނިކުފާނު އެދިވަޑައިގަތް ގޮތަށް، ހިޔާނާތުން މަންފާވި މީހުންނާއި ތަހުގީގު ގޮސްފައިވާ ހިސާބާ ގުޅޭ މައުލޫމާތު ފޮނުވާފައިވާ ކަމަށް ރައްޔިތުންގެ މަޖިލީހުން މިއަދު ބުންޏެވެ.
މަޖިލީހުން ކަމާބެހޭ އިދާރާތަކުގައި އެދުނީ އެމްއެމްޕީއާރުސީގެ ހިޔާނާތުން މަންފާވި ކަަމަށް ތުހުމަތު ކުރެވޭ ސަރުކާރުގެ އިސް މަގާމްތަކުގައި މިހާރު ތިއްބެވި ވަޒީރުންނާއި ސްޓޭޓް މިނިސްޓަރުންނާއި ޝަރުއީ ދާއިރާ އާއި ސަލާމަތީ ހިދުމަތްތަކާއި މިނިވަން މުއައްސަސާތަކާއި ރައްޔިތުންގެ މަޖިލީހުގައި މިހާރު ތިއްބެވި މެމްބަރުންނާއި ކުރީގެ މެމްބަރުންގެ ލިސްޓު ފޮނުވައިދޭށެވެ.
އަދި އެމްއެމްޕީއާރުސީ ހިޔާނާތް މަޑުޖެހިފައި އޮތް ސަބަބާއި މިހާތަނަށް ތަހުގީގު ކުރިއަށް ގެންދެވިފައިވާ މިންވަރު ވެސް އޮޅުންފިލުވަން މަޖިލީހުގެ ރައީސް މުހައްމަދު ނަޝީދު ބޭނުންފުޅުވާ ކަމަށް މަޖިލީހުން އޮތީ އަންގައިފަ އެވެ.
ހިޔާނާތުން މަންފާވި ލިސްޓެއް އޮތް ކަން ހާމަކުރީ ފުލުހުންނާއި އޭސީސީ އާއި އެސެޓް ރިކަވަރީ ކޮމިޝަނުން އޮކްޓޯބަރު، 24، 2019 ގައި ބޭއްވި ނިއުސް ކޮންފަރެންސްގައި، ކުރީގެ ނައިބު ރައީސް އަހްމަދު އަދީބު އިސްވެ ހުންނަވައި އެމްއެމްޕީއާރުސީގެ ޖަރީމާ ހިންގި ގޮތާއި ފައިސާ ބައި އެޅި ގޮތާއި މަންފާ ލިބުނު މީހުންގެ އާ މައުލޫމާތާއި ހެކިތައް ވެސް ތަހުގީގަށް ލިބިފައިވާ ކަމަށް ބުނެ އެވެ.
ހިޔާނާތުން މަންފާ ވި ކަމަށް ފުލުހުން އާއްމުކުރި ލިސްޓު
- މަޖިލީހުގެ ކުރީގެ 44 މެމްބަރުން
- މަޖިލީހުގެ މިހާރުގެ 16 މެމްބަރުން
- ސަރުކާރުގައި މިހާރު ވެސް ހިމެނޭ ހަތް ބޭފުޅުން
- ކުރީގެ ސަރުކާރުގެ އިސް މަގާމްތަކުގައި ތިއްބެވި 30 ބޭފުޅުން.
- މިނިވަން މުއައްސަސާތަކުގައި ކުރިން އުޅުއްވި ފަސް މެމްބަރުން
- ފަސް ފަނޑިޔާރުން
- ސަލާމަތީ ހިދުމަތްތަކާ ބެހޭ ހަތް އޮފިސަރުން
މަޖިލީހުން ކަމާބެހޭ އިދާރާތަކުގައި ހިޔާނާތުގެ ތަފްސީލަށް އެދުނީ، އެމްއެމްޕީއާރުސީގެ ހިޔާނާތް ނުފޮރުވޭނެ ކަމަށާއި ބާރާއި ނުފޫޒު ގަދަ، ރައްޔިތުންގެ މަޖިލީހުގެ މެމްބަރަކަސް، ވަޒީރުންނާއި އަމީރެއް ވިޔަސް ރައްޔިތުންނަށް ފަޅާއަރުވާނެ ކަމުގެ އިންޒާރު ރައްޔިތުންގެ މަޖިލީހުގެ ރައީސް މުހައްމަދު ނަޝީދު ދެއްވާފައި ވަނިކޮށެވެ. ހިޔާނާތް ބަލަން މަޖިލީހުގެ ބައެއް މެމްބަރުންގެ ފަރާތުން ހުރަސްއެޅޭ ކަމުގެ ކަންބޮޑުވުން ވެސް އެމަނިކުފާނު ވަނީ ފާޅުކުރައްވައިފަ އެވެ.
ނަޝީދު މިއަދު ވަނީ ބޭރުގެ މާހިރަކާ އެކު އެމްޑީޕީގެ ޕާލަމެންޓްރީ ގްރޫޕުން ހިޔާނާތުގެ މައްސަލަ ބެލުމުގެ ރުހުން ދިނުމަށް އެދި ގައުމީ މަޖިލީހަށް ގަރާރެއް ވެސް ހުށަހަޅުއްވަން ނިންމަވައިފަ އެވެ. އެމަނިކުފާނު ވިދާޅުވި ގޮތުގައި ހިޔާނާތުން ފައިދާ ވި މީހުންނާއި ދައުލަތަށް ގެއްލުނު ފައިސާ ހޯއްދަވާނެ އެވެ.
