އިދިކޮޅު ޕީޕީއެމާއި ޕީއެންސީން މާލޭގައި ބާއްވާ އެއްވުންތައް ހުއްޓުވަން ފުލުހުން ހާލަތާ ނުބައްދަލު ބާރުގެ ބޭނުންކޮށް، ބައެއް މީހުންނަށް ގަސްތުގައި އަނިޔާކުރަމުންދާ ކަމުގެ ތުހުމަތާ އެކު މައްސަލަ ބަލައިދޭން ކަމާބެހޭ އިދާރާތަކަށް އިދިކޮޅުން މިއަދު ގޮވާލައިފި އެވެ.
މާފުށީ ޖަލުގައި ހުކުމް ތަންފީޒުކުރައްވަމުން އަންނަ ކުރީގެ ރައީސް އަބްދުﷲ ޔާމީން މިނިވަންކުރަން ގޮވާލައި އިދިކޮޅުން އަންނަނީ ސިލްސިލާ މުޒާހަރާތަކެއް ކުރަމުންނެވެ. ދުވަސްކޮޅަކަށް މެދުކެނޑިފައި އޮތުމަށް ފަހު "ދޭތިން އެކައްޗަށް" ނަމުގައި ރޭ މާލޭގެ ދެ ސަރަހައްދަކަށް އެއްވި އެވެ.
ކޮވިޑުން ރައްކާތެރިވުމުގެ ފިޔަވަޅެއްގެ ގޮތުން މަގުތަކަށް އެއްވުން މަނާކޮށްފައި ވަނިކޮށް ކުރި މުޒާހަރާ ހުއްޓުވައި ރޭ ބަޔަކު ހައްޔަރުކުރި އެވެ. އެ މީހުން ޖޫރިމަނާކުރުމަށް ފަހު ވަނީ ދޫކޮށްލައިފަ އެވެ.
އިދިކޮޅުން ނެރުނު ބަޔާނެއްގައި ތުހުމަތުކޮށްފައިވާ ގޮތުގައި މުޒާހަރާގެ ބައިވެރިން ފަހަތަށް ޖެއްސުމުގައި ފުލުހުންގެ ފަރާތުން ރޭ ވެސް ފެނުނީ އަނިޔާވެރިކަމެވެ. ފުލުހުން މިގޮތަށް އަމަލުކުރާ މައްސަލަ ހިއުމަން ރައިޓްސް ކޮމިޝަނާއި ނެޝަނަލް އިންޓެގްރިޓީ ކޮމިޝަނުން ބަލަން އިދިކޮޅުން ވަނީ އެދިފަ އެވެ.
އެ ބަޔާނުގައި ބުނިގޮތުގައި ރައްޔިތުން ޝުއޫރުފާޅުކުރަން ބާއްވާ އިހްތިޖާޖްތަކާއި އެއްވުންތައް ރޫޅާލުމުގައި ހާލަތާއި ނުބައްދަލު ބާރުގެ ބޭނުންކޮށް، އެކި ވަރުގެ އަނިޔާދެނީ ގަސްތު އެވެ.
އިދިކޮޅުގެ މި ތުހުމަތާ ގުޅިގެން ފުލުހުންގެ ބަހެއް އަދި ނުލިބެ އެވެ.
ޕީޕީއެމާއި ޕީއެންސީގެ އޮފީސް ހުންނަ ސަރަހައްދު ބަންދުކޮށް އޮފީހަށް ވަނުމުގެ ފުރުސަތު ނުދޭން ފުލުހުން ހިންގާ ކަންކަން ވެސް ބަލައި ނުގަންނަ ކަމަށް އިދިކޮޅުން ބުންޏެވެ. އެކަން ހުއްޓުވަން އިލެކްޝަންސް ކޮމިޝަނަށް ވަނީ ގޮވާލައިފަ އެވެ.
"ޑިމޮކްރަސީގެ އެއް އަސާސް ކަމުގައިވާ ހިޔާލުފާޅުކުރުމާއި އިހްތިޖާޖް ކުރުމުގެ ހައްގަށް ދިވެހި ސަރުކާރުން އަރައިގަނެ ރައްޔިތުންނަށް ދެމުން ގެންދާ އަނިޔާތައް އެންމެ ހަރުކަށި އިބާރާތުން ކުށްވެރިކުރަމެވެ،" ބަޔާނުގައިވެ އެވެ.
ޕީޕީއެމާއި ޕީއެންސީގެ މުޒާހަރާތައް އަމާޒުކޮށް ވަނީ ޔާމީން މިނިވަންކުރަން ސަރުކާރަށް ޕްރެޝަރުކުރުމަށެވެ. އެމަނިކުފާނު ގޭބަންދަށް ބަދަލުކޮށްދޭން އާއިލާ އިން ވެސް ވަނީ ސަރުކާރުގައި އެދިފަ އެވެ. އެކަމަށް މަޝްވަރާކުރަމުން އަންނަ ކަމަށް ބުނިތާ ދެ ހަފުތާވެފައި ވިޔަސް އަދި ގޮތެއް ނުނިންމަ އެވެ.
