ނިޔޯން (އޭޕްރީލް 28) - މި ފަހަރުގެ ޔޫރޯގައި ވާދަކުރާ ޓީމުތަކުގެ ސްކޮޑަށް އިތުރު ތިން ކުޅުންތެރިންގެ ޖާގައެއް ދޭން ޔުއެފާގެ ނެޝަނަލް ޓީމު ކޮމިޓީ އިން ނިންމައިފި އެވެ.
ކޮވިޑް-19ގެ ސަބަބުން ގެންނަ ވަގުތީ ބަދަލެއްގެ ގޮތުގައި މި ބަދަލު ގެންނަން ނެޝަނަލް ޓީމު ކޮމިޓީން ނިންމި ނަމަވެސް މި ބަދަލު ފާސްކުރާނީ ޔުއެފާގެ އެގްޒެކިއުޓިވް ކޮމިޓީން މި ހަފްތާގައި ބާއްވާ ބައްދަލުވުމުގަ އެވެ.
އެންމެ ފުރަތަމަ މިދިޔަ އަހަރު ބާއްވަން ނިންމި ޔޫރޯ މި އަހަރަށް ފަސްކުރީ މިދިޔަ އަހަރު މުޅި ދުނިޔޭގައި ކޮވިޑް-19ގެ ހާލަތު ވަރަށް ބޮޑަށް ގޯސްވެފައި އޮތުމުންނެވެ. މި އަހަރުގެ ޖޫން 11 ވަނަ ދުވަހު ފަށާ ޔޫރޯ އަށް ޓީމުތައް ސްކޮޑު ހުށަހެޅުމުގެ އެންމެ ފަހުގެ މުއްދަތަކީ ޖޫން 1 ވަނަ ދުވަހެވެ. ކޮވިޑާ ހެދި ޔޫރަޕްގެ ރަސްމީ މުބާރާތްތަކުގައި މިހާރު އަމަލުކުރަމުން އަންނަ މެޗެއްގެ ތެރެއިން ފަސް ބަދަލު ގެނެވޭ ގަވާއިދަށް ޔޫރޯގައި ވެސް އަމަލުކުރާނެ އެވެ.
އާންމު ގޮތެއްގައި ބޮޑެތި ގައުމުތަކުން ޔޫރޯ އާއި ވޯލްޑް ކަޕްގެ ސްކޮޑު ހުށަހަޅަން ދީފައިވާ ފަހުގެ މުހުލަތު ހަމަވުމުގެ ހަފްތާއެއްހާ ދުވަސްކުރިން ސްކޮޑު އިއުލާންކުރެ އެވެ. އެކަމަކު ރަސްމީކޮށް ހުށަހަޅަނީ ފަހުންނެވެ. އެއީ މީޑިއާ ޕްރެޝަރު ކަނޑުވާލައި ސްކޮޑަށް ގެންނަން ޖެހޭ ބަދަލުތަކަށް ވަގުތު ދެވޭ ގޮތް ހެދުމުގެ ގޮތުންނެވެ.
ރިޕޯޓްތައް ބުނާގޮތުން މެއި މަހުގެ 26 ވަނަ ދުވަހު އިންގްލެންޑާއި ފްރާންސް އަދި އިޓަލީގެ ޔޫރޯ ސްކޮޑު އިއުލާނުކުރާގޮތަށް ވަނީ ހަމަޖެހިފަ އެވެ.
