ކޮވިޑް-19ގެ ބަލިމަޑުކަމާ ގުޅިގެން ސިއްހީ ނިޒާމް ހަރުދަނާކުރަން މޯލްޑިވް ގޭސް ޕްރައިވެޓް ލިމިޓެޑުން ބާ އޮކްސިޖަން ސިލިންޑަރުތަކެއް ގެނައި މައްސަލާގައި ލިބުނު ގެއްލުމުގެ ބަދަލު ހޯދަން ރައްޔިތުންގެ މަޖިލީހުން މިއަދު ފާސްކޮށްފި އެވެ.
ސިންގަޕޫރުގެ ދެ ކުންފުންޏެއް މެދުވެރިކޮށް މޯލްޑިވް ގޭހުން ޖުމްލަ 4،218 ސިލިންޑަރު ގެނެސްފައިވެ އެވެ.
އޭގެ ތެރެއިން ފުރަތަމަ 1،000 ސިލިންޑަރު ގެނައީ ސިންގަޕޫރުގެ އޭއެންޖީ ނަމަކަށް ކިޔާ ކުންފުނިންނެވެ. އަދި ބާކީ ހުރި ސިލިންޑަރު ގެނައީ ސިންގަޕޫރުގެ ޕްރޯބިޒް ނަމަކަށް ކިޔާ ކުންފުންޏެއް މެދުވެރިކޮށެވެ.
ގޭސް ސިލިންޑަރުތަކަށްް ޖުމްލަ 955،099 އެމެރިކާ ޑޮލަރު ހޭދަކޮށްފައިވާއިރު، އޭގެ ތެރެއިން 300 ސިލިންޑަރު ޓެސްޓް ކުރުމަށާއި އެތަކެތި ލަންކާއަށް ފޮނުވުމަށް އިތުރު 15،038 ޑޮލަރު ވަނީ މޯލްޑިވް ހަރަދު ކޮށްފަ އެވެ.
ނަމަވެސް، ދެ ކުންފުނިންވެސް ފޮނުވާފައިވަނީ ބާ ސިލިންޑަރުތަކެކެވެ.
އެކަމާ ގުޅިގެން، ޕްރޯބިޒްގެ ސިލިންޑަރުތަކުން ބަދަލު ހޯދަން މޯލްޑިވް ގޭހުން މަސައްކަތް ކުރި ނަމަވެސް އޭއެންޖީން ފޮނުވި ސިލިންޑަރުތަކަށް ބަދަލު ހޯދަން މަސައްކަތް ނުކުރާ ކަމަށް އެ މައްސަލަ ދިރާސާ ކުރުމަށްފަހު މަޖިލީހުގެ އެސްއޯއީ ކޮމިޓީން ނެރުނު ރިޕޯޓުގައި ބުނެފައިވެ އެވެ.
ހައިޑްރޯ ސްޓެޓިކް ސިލިންޑަރު ޓެސްޓްތައް ހަދައި އޭގެ ކޮލިޓީ ބަލައި ޔަގީންކުރުމަށް ފަހު މެނުވީ އެއްވެސް ސިލިންޑަރެއް ބޭނުން ނުކުރަން ފުޑް އެންޑް ޑްރަގު އޮތޯރިޓީން މޯލްޑިވް ގޭހަށް ވަނީ އަންގާފަ އެވެ.
މިގޮތުން، އެ އެންގުމާ އެއްގޮތަށް، މޯލްޑިވް ގޭހުގެ ގުދަނުގައި ހުރި 2،400 އެއްހާ ސިލިންޑަރުވެސް ޓެސްޓުތައް ނަހަދައި ބޭނުންނުކުރުމަށް އެ ކުންފުންޏަށް އެންގުމަށްވެސް ރިޕޯޓުގައިވެ އެވެ.
ސިލިންޑަރުތަކުގެ މުއާމަލާތްތައް ކުރެވުނުއިރު، މޯލްޑިވް ގޭސް ހިންގުމާ ހަވާލުވެ ހުންނެވި އޭރުގެ ޑެޕިއުޓީ މެނޭޖިން ޑިރެކްޓަރު އަލީ އިކްރާމް އެވެ.
ޕްރޯބިޒް ކުންފުނީގެ ހަރަދުގައި ސިންގަޕޫރަށް ދަތުރުކުރެއްވި ކަމަށް ކޮމިޓީގައި އިކްރާމް ވަނީ އެއްބަސްވެވަޑައިގެންފައި އެވެ.
ނަމަވެސް، އެ މައްސަލަ ބަލަމުންދަނިކޮށް އިކްރާމް ވަނީ މަގާމުން އިސްތިއުފާ ދެއްވައިފަ އެވެ.
އިކްރާމް އިސްތިއުފާ ދެއްވި ނަމަވެސް، ސިލިންޑަރުތަކުގެ މުއާމަލާތުގައި ޝާމިލުވާ މޯލްޑިވް ގޭހުގެ މުވައްޒަފުންގެ މައްސަލަތައް ބަލައި، އަވަސް ކުރަން އެންޓި ކޮރަޕްޝަން ކޮމިޝަން (އޭސީސީ)އަށް އަންގަންވެސް ރިޕޯޓުގައި ބުނެފައިވެ އެވެ.
އޭގެ އިތުރުން، ސިލިންޑަރުތަކުގެ މައްސަލާގައި މޯލްޑިވް ގޭހުގެ ބޯޑުން ފިޔަވަޅެއް އަޅާފައިނުވާތީ، މުސްތަގުބަލުގައި އެފަދަ މައްސަލަތަކުގައި އަވަސް ފިޔަވަޅު އަޅަން ބޯޑުގައި އެދެންވެސް ކޮމިޓީން ވަނީ ފާސްކޮށްފަ އެވެ.
މިއަދު ބޭއްވި މަޖިލީހުގެ ޖަލްސާގައި އެސްއޯއީ ކޮމިޓީން އެ މައްސަލަ ދިރާސާކޮށް ނިންމި ގޮތުގެ ރިޕޯޓަށް އެއްވެސް އުނިއިތުރެއް ނުގެނެސް، ތަޅުމުން ފާސްކޮށްފައިވަނީ ވޯޓުގައި ބައިވެރިވެވަޑައިގެންނެވި 55 މެންބަރުންގެ އިއްތިފާގުންނެވެ.
