ކުރީގެ ކޮމިޔުނިކޭޝަން އަދި ޓެކްނޮލޮޖީ މިނިސްޓަރު މުހައްމަދު މަލީހު ޖަމާލް ރައްޔިތުންގެ މަޖިލީހަށް އޮޅުވާލައްވާކަމަށް ބުނެ އޭނާގެ މައްޗަށް ދައުވާކުރުމަށް ފޮނުވަން މަޖިލީހުގެ ކަމާބެހޭ ކޮމިޓީން ނިންމައިފި އެވެ.
މަޖިލީހުގެ ސާފު އަގުލަބިއްޔަތު އޮންނަ އެމްޑީޕީން މަލީހުގެ އިތުބާރުނެތް ކަމުގެ މައްސަލައިގައި މަޖިލީހަށް ޖަވާބުދާރީވަމުން އޭނާ ވަނީ މަޖިލީހުން ވަޒީރުންނަށް ބިރު ދައްކަމުންދާ ކަމަށް ތުހުމަތު ކުރައްވާފަ އެވެ.
އަދި ކުރީގެ ޖެންޑާ މިނިސްޓަރު ޝިދާތާ ޝަރީފް މަގާމުން އިސްތިއުފާ ދެއްވަން މަޖުބޫރުވީ ވެސް އެކަމުގެ ސަބަބުން ކަމަށް މަލީހު އެ ދުވަހު ވިދާޅުވި އެވެ.
މަލީހުގެ އިތުބާރުނެތް ކަމަށް ފާސްކޮށް އޭނާ ވަކި ކުރުމަށްފަހު، އޭނާ ކުރެއްވި ތުހުމަތުތަކުގެ ހަގީގަތް ބަލަން މަޖިލީހުގެ އިމްތިޔާޒާއި ސުލޫކު ކޮމިޓީން ފެށި އެވެ.
މިދިޔަ މާޗް މަހު މަލީހު ކޮމިޓީއަށް ހާޒިރުކުރުމުން، މަޖިލީހުގައި ދެއްކެވި ގޮތަށް މަލީހު އެ ދުވަހު ވެސް ދެއްކެވީ ހިޔާލުފާޅުކުރުމަށް ގާނޫނު އަސާސީން ލިބިދޭ ހައްގުގެ ވާހަކަ އެވެ.
މަޖީހުގެ ފަރާތްޕުޅުން އެދެވިގެންވާ ޖަވާބެއް ލިބިފައި ނުވާތީ، އެދުވަހު މަޖިލީހުގެ ތަޅުމުގައި ދައްކަވާފައި ވަނީ އެއްވެސް އަސާސެއް ނެތް ވާހަކަތަކެއް ކަން ފާހަގަކޮށް ނަސޭހަތުގެ ސިޓީއެއް ފޮނުވުމަށް ކޮމިޓީ މިދިޔަ މާޗް މަހުގެ 24 ވަނަ ދުވަހު ނިންމި އެވެ.
ނަމަވެސް، މާޗް 31 ވަނަ ދުވަހު ކޮމިޓީން ނިންމި ކަމަށް ބުނާ ރިޕޯޓުގައި ވަނީ މަލީހު ކޮމިޓީއަށް ހާޒިރުވެވަޑައިގަތުމަށްފަހު މެމްބަރުން ކުރެއްވި ސުވާލުތަކަށް އެކަށީގެންވާ ގޮތެއްގައި ޖަވާބުދާރީވެފައި ނުވާ ކަމަށެވެ.
އެހެންކަމުން އޭނާ މަޖިލީހަށާއި ކޮމިޓީއަށް ގަސްދުގައި އޮޅުވާލާފައިވާކަމަށް މެމްބަރުންގެ އިއްތިފާގުން ފާސްކޮށްފައިވާކަމަށް ރިޕޯޓުގައި ބުންޏެވެ.
އިމްތިޔާޒު ގާނޫނުގައި ބުނަނީ މަޖިލީހަށް ނުވަތަ ކޮމިޓީއަށް ގަސްދުގައި ކަމެއް އޮޅުވާލުމަކީ ކުށެއް ކަމަށާއި، އެފަދަ ކުށެއް ކުރި މީހެއްގެ އަދަބަކީ 3،000 ރުފިޔާއާއި 10،000 ރުފިޔާގެ އަދަދަކުން ޖޫރިމަނާ ކުރުން ނުވަތަ ތިން މަސް ދުވަހާއި ހަމަސް ދުވަހުގެ މުއްދަތަކަށް ޖަލަށްލުން ކަމަށެވެ.
ކޮމިޓީން ނިންމި ގޮތަށް މަޖިލީހުން ފާސްކޮށްފި ނަމަ، އެ ވެގެންދާނީ ފަހުގެ ތާރީހެއްގައި ދައުލަތުގެ ވަޒީރުކަން ކުރެއްވި ބޭފުޅަކަށް އެ ފަދަ ދައުވާއެއް ކުރެވޭ ފުރަތަމަ ފަހަރަށެވެ.
އިތުބާރުނެތް ކަމަށް ފާސްކުރި ފަހުން، ޖުމްހޫރީ ޕާޓީގެ ސްލޮޓެއްގައި ވަޒީރުކަމުގައި ހުންނެވި މަލީހު ވަނީ އެ ޕާޓީން ވަކިވެވަޑައިގެންފަ އެވެ.
މިހާރު މަލީހު ގެންދަވަނީ ސަރުކާރަށާއި ހާއްސަކޮށް ރައްޔިތުންގެ މަޖިލީހަށް ވަރަށް ބޮޑަށް ފާޑުވިދާޅުވަމުންނެވެ.
