ވަކި އިދާރާތަކުން ދޭ ޕެންޝަން ހުއްޓުމަކަށް ގެނައުން ފަދަ ބޮޑެތި ބަދަލުތަކެއް ގެންނަ ގޮތަށް ޕެންޝަންގެ ގާނޫނަށް ސަރުކާރުގެ ފަރާތުން ހުށަހެޅި އިސްލާހުތައް އަނބުރާ ގެންގޮސްފި އެވެ.
ސަރުކާރުގެ ފަރާތުން ތޮއްޑޫ ދާއިރާގެ އެމްޑީޕީ މެމްބަރު ހަސަން ޝިޔާން ހުށަހެޅުއްވި ބިލުގައިވަނީ ދައުލަތުގެ ވަޒީފާތަކުގައި އުޅެ ރިޓަޔާކުރާ މީހުންނަށް އެ މީހުން އަދާކުރި ވަޒީފާއަށް ބަލައި އެ އިދާރާއަކުން ތަފާތު މިންގަނޑުތަކުން ދެމުން އަންނަ ޕެންޝަންތައް އުވާލުމަށެވެ.
ނަމަވެސް، އެކި މަގާމުތަކުގައި އުޅުމަށް ފަހު ރިޓަޔާވާ މީހުންނަށް އެ މީހުން އަދާކުރި މަގާމާ ގުޅޭ ގޮތުންް ތަފާތުވާ ގޮތުގައި ދޭ ޕެންޝަަންތައް ކަނޑާލުމުގައި ސިފައިންނާއި ފުލުހުން އަދި ފަނޑިޔާރުން އިސްތިސްނާވާނެކަމަށް ބިލުގައިވެ އެވެ.
އަދި ދައުލަތުގެ މަގާމެއް އަދާކުރުމަށް ފަހު ރިޓަޔާކޮށްފައިވާ މީހަކު އިންތިހާބު ކުރެވޭ ނުވަތަ އައްޔަންކުރާ މަގާމަކަށް އަންނަ ހިސާބުން ފެށިގެން، އޭނާއަށް ޕެންޝަން ލިބުނުން ހުއްޓޭ ގޮތަށް ހިމަނާފައިވުމަކީ ޕެންޝަނާބެހޭ ގާނޫނަށް ހުށަހެޅި އެންމެ ފާހަގަކޮށްލެވޭ އިސްލާހެވެ.
ފާޑުކިޔުން ބޮޑު
އެ ބިލުގެ އިބްތިދާއީ ބަހުސްގެ މަރުހަލާގައި އިދިކޮޅު މެމްބަރުންގެ ބޮޑެތި ފާޑުކިޔުންތައް އަމާޒުވިއިރު، އެމްޑީޕީ ބައެއް މެމްބަރުން ވެސް ވަނީ އެ ބިލާމެދު ކަންބޮޑުވުންފާޅު ކުރައްވައިފަ އެވެ.
މަޑުއްވަރީ ދާއިރާގެ އިދިކޮޅު މެމްބަރު އާދަމް ޝަރީފު ވިދާޅުވީ ރާއްޖޭގެ ޕެންޝަނަރުންނަކީ ރާއްޖެ މިހާރު މިއޮތް ހިސާބަށް ގެނައުމުގައި ބުރަކޮށް މަސައްކަތް ކުރެއްވި ބޭފުޅުން ކަަމަށެވެ. ނަމަވެސް، މިއަދު އެންމެ ނިކަމެތި ބަޔަކަށް ވެފައި ވަނީ އެ މީހުން ކަމަށް ވިދާޅުވި އެވެ.
ތޮއްޑޫ ދާއިރާގެ އެމްޑީޕީ މެމްބަރު ހަސަން ޝިޔާން މަޖިލީހުގެ ޖަލްސާއެއް ވާހަކަ ދައްކަވަނީ. -ފޮޓޯ: މަޖިލިސް
މަނަދޫ ދާއިރާގެ އެމްޑީޕީ މެމްބަރު އަހުމަދު ހާރޫނު ވިދާޅުވީ އެ ބިލުގައި އޮތީ ވަކި ބަޔަކަށް އިނާޔާތްދޭން ކަމަށާއި އޭގައި ހަމަހަމަކަމެއް ނެތް ކަމަށެވެ.
މިގޮތުން، ކަސްޓަމްސް ސާވިސްއަކީ ސަލާމަތީ ހިދުމަތެއް ކަމަށްވާއިރު، ފުލުހުންނާއި ސިފައިންނާއެކު އެ މުއައްސަސާ އިސްތިސްނާކޮށްފައިނުވުމަކީ ކަންބޮޑުވުމެއްގެ ގޮތުގައި އޭނާ ފާހަގަކުރެއްވި އެވެ.
އެ ބިލުގެ އިބްތިދާއީ ބަހުސްގެ ވަގުތު އަދި ނުވާއިރު، އެ ބިލު ސަރުކާރުން އަނބުރާ ގެންގޮސްފައިވާކަމަށް މެމްބަރު ޝިޔާން ވަނީ ޔަގީންކޮށް ދެއްވައިފަ އެވެ.
"ސަރުކާރުން އޭޖީ އޮފީސް މެދުވެރިކޮށް ނޫންތޯ ބިލުތައް ހުށަހަޅަނީ. ސަރުކާރުން އެދުނީ އެ ބިލު ނަގައިދޭން،" ޝިޔާން މިއަދު "އަދަދު"އަށް ވިދާޅުވި އެވެ.
ނަމަވެސް، ބިލު އަނބުރާ ނެގި ސީދާ ސަބަބެއް އެނގިވަޑައިނުގަންނަވާ ކަމަށް ޝިޔާން ވިދާޅުވި އެވެ.
