އަވަށްޓެރި އިންޑިއާގައި ކޮވިޑް-19ގެ ހާލަތު އިންތިހާއަށް ގޯސްވުމާ ގުޅިގެން، އެ ގައުމުން ރާއްޖެއަށް އަންނަ ޓޫރިސްޓުން ގެސްޓުހައުސްތަކާއި ސިޓީ ހޮޓާތަކުގައި ނުތިބެވޭ ގޮތަށް ފިޔަވަޅުތައް ހަރުކަށިކޮށްފި އެވެ.
މިގޮތުން، މިމަހުގެ މެދު ތެރެއިން ފެށިގެން އިންޑިއާގައި ކޮންމެ ދުވަހަކު ވެސް 200،000 އަށް ވުރެ ގިނަ މީހުން ކޮވިޑަށް ޕޮޒިޓިވްވެ އެވެ. މި ހަފްތާގައި އެ އަދަދު ވަނީ 300،000 އަށް ވުރެ މަތިވެފަ އެވެ. ކޭސްތަކާއެކު މަރުވާ މީހުންގެ އަދަދުތައް ވެސް ދަނީ އިތުރުވަމުންނެވެ.
އެއާއެކު ރާއްޖޭން ވަނީ ޓޫރިސްޓުންގެ ގޮތުގައި އަންނަ މީހުން ފިޔަވައި، އިންޑިއާއިން އަންނަ އެހެން މީހުން ގޭގައި ކަރަންޓީނުވުމަށް އަންގައިފަ އެވެ.
ނަމަވެސް، ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ވަނީ ރާއްޖެއަށް އިންޑިއާއިން ދަތުރުކުރުމުގައި ހާއްސަ ފިޔަވަޅުތަކެއް އެޅުމަށް ނިންމައި، އެކަން އިއުލާނުކޮށްފި އެވެ.
މިގޮތުން، ކޮވިޑު ވެކްސިން ފުރިހަމަކޮށްފައިވާ މީހުން ހިމެނޭގޮތަށް، އިންޑިއާއިން އަންނަ ހުރިހާ މީހުން 96 ގަޑިއިރު ނުވާ ނެގެޓިވް ޕީސީއާރު ޓެސްޓުގެ ނަތީޖާއެއް އޮންނަންޖެހޭ ގޮތަށް ހަދައިފަ އެވެ.
އޭގެ ތެރޭގައި ޓްރާންސިޓްގައި 24 ގަޑިއިރަށްވުރެ ގިނައިރު އިންޑިއާގައި ހޭދަކޮށްފައިވާ މީހުން ހިމެނޭނެ އެވެ.
އަދި ކޮވިޑު ވެކްސިން ފުރިހަމަކޮށްފައިވާ މީހުން ހިމެނޭގޮތަށް އިންޑިއާއިން ރާއްޖެއަށް އަންނަ ދިވެހިންނާއި ވޯކް ޕާމިޓް ހޯލްޑަރުން ރާއްޖެ އައުމަށްފަހު 24 ގަޑިއިރުގެ ތެރޭގައި ޕީސީއާރު ޓެސްޓް ހެދުމާއެކު ކުރިން އޮތް ގޮތަށް 10 ދުވަހުގެ މުއްދަތަށް ކަރަންޓީނުވާންޖެހޭނެ އެވެ.
އަދި މިފަދަ ފަރާތްތައް ކަރަންޓީނުން ދޫކޮށްލެވޭނީ، ކަރަންޓީނުގެ މުއްދަތު ހަމަވުމުން ޕީސީއާރު ޓެސްޓު ހެދުމަށްފަހު ނަތީޖާ ނެގެޓިވްވުމުން ކަމަށް ވެސް އުސޫލު މިހާރު ވަނީ ބަދަލުކޮށްފަ އެވެ.
އިންޑިއާ ޓޫރިސްޓުންނަށް ވަރުގަދަ ފިޔަވަޅުތަކެއް
ނަމަވެސް، މިއަދު އިންޑިއާއަށް ހަރުކަށި ކުރި ފިޔަވަޅުތަކުގެ ތެރޭގައި އެންމެ ވަރުގަދަ ފިޔަވަޅެއް އަޅާފައިވަނީ އެގައުމުން ރާއްޖެ އަންނަ ޓޫރިސްޓުންނަށެވެ.
މިގޮތުން، އަންނަ އަންގާރަ ދުވަހުން ފެށިގެން އިންޑިއާއިން އަންނަ ފަތުރުވެރިން ރާއްޖޭގެ ހުރިހާ ގެސްޓްހައުސްތަކާއި ސިޓީހޮޓާ ތަކުގައި ނުތިބެވޭ ގޮތަށް އުސޫލު ވަނީ ބަދަލުކޮށްފަ އެވެ. އޭގެ ތެރެއިން އިސްތިސްނާވަނީ މީހުން ދިރިއުޅޭތަންތަނާ މުޅިން ވަކިން ހުންނަ ސިޓީ ހޮޓާތައް އެކަންޏެވެ.
އަދި މި ފިޔަވަޅުގެ ތެރޭގައި ޓްރާންސިޓްގައި 24 ގަޑިއިރަށްވުރެ ގިނައިރު އިންޑިއާގައި ހޭދަކޮށްފައިވާ ފަތުރުވެރިން ހިމެނޭނެ ކަމަށް އެޗްޕީއޭ އިން ބުންޏެވެ.
ނަމަވެސް މިހާރު ގެސްޓުހައުސްތަކަށް ޗެކްއިން ވެފައި ތިބި އިންޑިއާއިން ދަތުރުކޮށްފައިވާ ފަތުރުވެރީންނަށް ބުކިން ހަދާފައިވާ މުއްދަތަށް ތިބުމުގައި އެއްވެސް ހުރަހެއް ނޯންނާނެކަމަށް އުސޫލުގައިވެ އެވެ.
މީގެ އިތުރުން، އިންޑިއާއިން އަންނަ ފަތުރުވެރިން ރާއްޖޭން ފުރުމުގެ ކުރިން ޑިޕާޗާ ޕީސީއާރު ޓެސްޓެއް ހަދަން ވެސް އާ އުސޫލުގައި ވަނީ ލާޒިމުކޮށްފަ އެވެ.
ކޮވިޑާ ގުޅޭ ގޮތުން ބޯޑަރު ބަންދު ކުރުމަށްފަހު، އަލުން ހުޅުވާލިފަހުން އެންމެ ގިނައިން ރާއްޖެއަށް އަންނަމުން ދަނީ އިންޑިއާ ޓޫރިސްޓުންނެވެ.
