ބޮޑެތި ކުށްތަކުގައި ތުހުމަތުވާ މީހުންނަށް، އަންނަ މަހު އޮންނަ އެމްޑީޕީގެ އެތެރޭގެ އިންތިހާބުގައި ވާދަ ނުކުރެވޭނެ ކަމަށް އެ ޕާޓީގެ ގައުމީ ހިންގާ ކޮމިޓީން މިރޭ ފާސްކޮށްފި އެވެ.
އެ ޕާޓީގެ އެތެރޭގެ އިންތިހާބު ބާއްވަން ތާވަލްކޮށްފައި ވަނީ އަންނަ މަހުގެ 29ގަ އެވެ. ކެންޑިޑޭޓުން ކުރިމަތިލާން މިއަދު ވަނީ ހުޅުވާލައިފަ އެވެ.
އެމްޑީޕީގެ ގައުމީ މަޖިލީހަށް މެމްބަރުން ހޮވާ އިންތިހާބުގައި ކުށްވެރިންނަށް ޖާގަ ނުދޭން ފާސްކުރީ މިރޭ ބިލަބޮންގުގައި ބޭއްވި ގައުމީ ހިންގާ ކޮމިޓީގެ ބައްދަލުވުމުގަ އެވެ. ރައީސް އިބްރާހިމް މުހައްމަދު ސޯލިހާއި އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ބައިވެރިވެވަޑައިގަތް މި ބައްދަލުވުމުގައި ވަޒީރުންނާއި ރައްޔިތުންގެ މަޖިލީހުގެ މެމްބަރުން ވެސް ތިއްބެވި އެވެ.
މިއީ، ވެރިކަން ހިންގުން ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރުގެ ގޮތުގައި ގައުމު ހިންގެވުމުގެ ފުރުސަތަށް ނަޝީދު، ރައީސްގެ އަރިހުން އެދިވަޑައިގަތް ފަހުން ދެ ބޭފުޅުން އެއް ތަނަކުން ބައްދަލުވި ފުރަތަމަ ފަހަރެވެ. ނަޝީދުގެ ހުށަހެޅުއްވުމަށް ރައީސްގެ ޖަވާބަކަށްވީ މި ހިނގާ ރިޔާސީ ނިޒާމަކީ ރައްޔިތުންގެ ނިންމުމެއް ކަމަށެވެ. އެކަން ބަދަލުކުރެވޭނީ ވެސް ރައްޔިތުންނަށް ކަމަށެވެ.
އެމްޑީޕީގެ ގައުމީ ހިންގާ ކޮމިޓީއަށް ހުށަހެޅި ގަރާރަށް މެމްބަރުން ވޯޓު ދެއްވަނީ. -- ފޮޓޯ | އެމްޑީޕީ
އެމްޑީޕީގެ އެތެރޭގެ އިންތިހާބުގައި ވެސް ބަރުލަމާނީގެ ފޯރިގަދަވެފައި ވަނިކޮށް ގައުމީ ހިންގާ ކޮމިޓީ އެއްވެ މިވަނީ އިންތިހާބުގެ ޝަރުތުތައް ކަނޑައަޅައިފަ އެވެ. މި އިންތިހާބުގައި ދާއިރާތަކާއި ޕްރޮވިންސްތަކާއި ސިޓީތަކުގެ ރައީސާއި ނައިބު ރައީސުންނާ އެކު ޖުމްލަ 455 މެމްބަރުން ހޮވާނެ އެވެ.
މާފަންނު މެދު ދާއިރާގެ މެމްބަރު އިބްރާހިމް ރަޝީދު ގަރާރު ހުށަހެޅުއްވީ އެމްޑީޕީގެ ދާއިރާތަކުގެ އިންތިހާބުގައި އެކި މަގާމްތަކަށް ކުރިމަތިލާ ޕާޓީގެ މެމްބަރުންނަކީ ބޮޑެތި ކުށްތަކުން ބަރީއަވެގެންވާ ބައެއް ކަން ސާބިތުކޮށްދޭންވާނެ ކަމަށް ޕާޓީގެ އަސާސީ ގަވާއިދަށް ރިއާޔަތްކޮށް ހިންގާ ކޮމިޓީން އިގުރާރުވާށެވެ.
ޖިނާއީ އިޖުރާއަތުގެ ގާނޫނުގައި ބަޔާންކުރާ ޖިނާއީ ބޮޑެތި ކުށްތަކަށް ތުހުމަތުވާ މީހުންނަށް އިންތިހާބުގައި ވާދަނުކުރެވޭނެ ކަމަށް އޭނާ ގަރާރުގައި ހުށަހެޅުއްވި އެވެ.
- މީހަކު މެރުން
- ރޭޕްކުރުމުގެ ކުށް
- ކުޑަކުދިންނަށް ޖިންސީ ގޯނާކުރުމުގެ ކުށް
- ޑްރަގް ޓްރެފިކް ކުރުމުގެ ކުށް
މީގެ އިތުރުން އެންޓި ޓޯޗާގެ ގާނޫނުގައި ބަޔާންކުރާ ކުށްތަކާއި ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ގާނޫނުގައި ބަޔާންކުރާ ކުށެއްގައި ހިމެނޭ މީހަކަށް ވެސް އިންތިހާބުގައި ވާދައެއް ނުކުރެވޭނެ އެވެ.
ރިޔާސީ ކޮމިޝަންގެ ރިޕޯޓުގައި ބަޔާންކުރާ މީހުން
އެ ގަރާރުގައިވާ ގޮތުން ރައީސް އިބްރާހިމް މުހައްމަދު ސޯލިހް އެކުލަވާލައްވާފައިވާ ކޮރަޕްޝަން އެންޑް އެސެޓް ރިކަވަރީ ކޮމިޝަނާއި މަރު ކޮމިޝަނުން ނެރެފައިވާ ރިޕޯޓެއްގައި ކުށެއް ކުރުމުގައި ބައިވެރިވެފައިވާ ކަމަށް ތުހުމަތުކުރެވޭ ފަރާތްތަކަށް ވެސް އިންތިހާބުގައި ބައިވެރިއެއް ނުވެވޭނެ އެވެ.
މީގެ އިތުރުން، އެމްއެމްޕީއާރުސީގެ ހިޔާނާތާ ގުޅިގެން އެންޓި ކޮރަޕްޝަން ކޮމިޝަނުން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދޭން އެދި އެކި މުއައްސަސާތަކަށް ނަން ފޮނުވާފައިވާ މީހުން ވެސް ހިމެނެ އެވެ.
އެމްޑީޕީގެ ގައުމީ ހިންގާ ކޮމިޓީގެ ބައްދަލުވުމުގައި ބައިވެރިވެވަޑައިގަތް ބައެއް މެމްބަރުން. -- ފޮޓޯ | އެމްޑީޕީ
"...އެމްޑީޕީގެ ދާއިރާތަކުގެ އިންތިހާބު 2021 ގައި ބައިވެރިވުމުގެ ފުރުސަތު އިސްވެ ބަޔާންކުރެވުނު ކުށްތަކުގެ ތުހުމަތު ކުރެވި ދައުވާކުރަން ފޮނުވިފައިވާ ފަރާތްތަކާއި އެފަދަ ކުށްތަކުގެ ހުކުމް ތަންފީޒު ކުރަމުންދާ ފަރާތްތަކަށާއި އެފަދަ ކުށެއްގެ ހުކުމް ތަންފީޒުކޮށް ނިންމުމަށް ފަހު ފަސް އަހަރު ވެފައި ނުވާ މީހުންނަށް ލިބިގެން ނުވާ ކަމަށް މި ހިންގާ ކޮމިޓީން އިގުރާރުވެ އެވެ،" އިއްތިފާގުން ފާސްކުރި ގަރާރުގައިވެ އެވެ.
މިފަދަ ތުހުމަތެއް ކުރެވޭކަން ޕާޓީއަށް ނޭނގި ވަނިކޮށް ގައުމީ މަޖިލީހަށް އެ މީހަކު އިންތިހާބު ފަހުން އެކަން އެނގޭ ހިސާބުން ވެސް އެ މެމްބަރަކު ވަކިކުރަން ވެސް މިރޭ ވަނީ ފާސްކޮށްފަ އެވެ.
