އަވަށްޓެރި އިންޑިއާގައި ކޮވިޑް-19ގެ އާ ވޭރިއެންޓުތަކަކާ އެކު ބަލީގެ ހާލަތު އިންތިހާއަށް ގޯސްވެފައިވާއިރު، އެގައުމުން ރާއްޖެއަށް އަންނަ ފަތުރުވެރިންނާ މެދު ރައްކާތެރިކަމުގެ އިތުރު ފިޔަވަޅެއް އެޅުމުގެ ވިސްނުމެއް އަދި ނެތް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން މިއަދު ބުނެފި އެވެ.
މިދިޔަ މަހު ފެށުނު ދެވަނަ ރާޅާ އެކު، އިންޑިއާގައި ބަލި ފެތުރޭ މިންވަރު ވަނީ އެތައް ގުނައެއް އިތުރުވެފަ އެވެ.
މިގޮތުން، މިމަހުގެ މެދު ތެރެއިން ފެށިގެން އިންޑިއާގައި ކޮންމެ ދުވަހަކު ވެސް 200،000 އަށް ވުރެ ގިނަ މީހުން ކޮވިޑަށް ޕޮޒިޓިވްވެ އެވެ. މި ހަފްތާގައި އެ އަދަދު ވަނީ 300،000 އަށް ވުރެ މަތިވެފަ އެވެ. ކޭސްތަކާއެކު މަރުވާ މީހުންގެ އަދަދުތައް ވެސް ދަނީ އިތުރުވަމުންނެވެ.
އެއާއެކު ރާއްޖޭން ވަނީ ޓޫރިސްޓުންގެ ގޮތުގައި އަންނަ މީހުން ފިޔަވައި، އިންޑިއާއިން އަންނަ އެހެން މީހުން ގޭގައި ކަރަންޓީނުވުމަށް އަންގައިފަ އެވެ.
އިމިގްރޭޝަނުން އިއްޔެ ނެރުނު އިއުލާނެއްގައި ބުނެފައިވަނީ ޓޫރިސްޓު ވިސާގައި ރާއްޖެ އަންނަ މީހުން ނޫން އެހެން މީހުން 10 ދުވަހުގެ ކަރަންޓީނު މުއްދަތެއްގައި ގޭގައި މަޑުކުރުން މަޖުބޫރުވާނެ ކަމަށާއި، މީގެ ތެރޭގައި ވެކްސިން ފުރިހަމަ ކޮށްފައިވާ މީހުން އިސްތިސްނާނުވާނެ ކަމަށެވެ.
ނަމަވެސް، ނުރައްކާތެރި އާ ވޭރިއަންޓުން ސަލާމަތްވުމަށް ގިނަ ގައުމުތަކަކުން އިންޑިއާއަށް ދަތުރު ކުރުން މަނާ ކުރުން ފަދަ ހަރުކަށި ފިޔަވަޅުތައް އަޅާފައިވާއިރު، ރާއްޖޭން އެފަދަ ފިޔަވަޅުތަކެއް ނާޅާތީ ކަންބޮޑުވުން ވަނީ އިތުރުވާން ފަށައިފަ އެވެ.
ޓޫރިސްޓުންނަށް ކަރަންޓީނުވާން ނޭންގޭނެ
އެކަމާ ގުޅިގެން އެޗްޕީއޭގެ ޑެޕިޔުޓީ ޑިރެކްޓާ ޖެނެރަލް ތަސްލީމާ އުސްމާނު "އަދަދު"އަށް ވިދާޅުވީ، އިންޑިއާ އިން ރާއްޖެއަށް އާއްމުކޮށް އަންނަ ޓޫރިސްޓުންނަކީ މަދު ދުވަސް ކޮޅަކަށް ކަމަށްވާތީ، 10 ދުވަހަށް ކަރަންޓީނުވާން އެންގުމަކީ ކުރެވޭނެ ކަމެއް ނޫން ކަމަށެވެ.
އަދި އެއްވެސް ގައުމަކުން ދަތުރުފަތުރު ހުއްޓާލުމަކީ މި ފަހުން ރާއްޖޭން އަމަލުކޮށްފައިވާ ގޮތެއް ނޫންކަން އިނގިރޭސިވިލާތުގެ މިސާލު ނަންގަވަމުން ތަސްލީމާ ވިދާޅުވި އެވެ.
މިދިޔަ ޑިސެމްބަރު މަހު ޔޫކޭގައި އާ ވޭރިއެންޓަކާއެކު ބަލި ފެތުރޭ މިންވަރު އިންތިހާއަށް އިތުރުވުމާ ގުޅިގެން، ގިނަ ގައުމުތަކުން ދަތުރުތައް ހުއްޓާލި ނަމަވެސް، ރާއްޖޭން އެ ފިޔަވަޅު އަޅާފައެއް ނުވެ އެވެ.
ތަސްލީމާ ވިދާޅުވި ގޮތުގައި އިންޑިއާ އިން އަންނަ ޓޫރިސްޓުންވެސް ނެގެޓިވް ޕީސާއާރު ޓެސްޓެއް ހުށަހަޅަންޖެހޭއިރު، އެހެން އެންމެން ފުރަތަމަ ދުވަހުވެސް ޕީސާއާރު ޓެސްޓެއް ހެދުމަށްފަހު، ކަރަންޓީނުގެ 10 ދުވަސް ހަމަވުމުން އަދި އިތުރު ޓެސްޓެއް ހެދޭނެ އެވެ.
"މީގަ އޮތީ ގައިޑްލައިންތަކާ އެއް ގޮތަށް އަމަލު ކުރުން. އެކަމަކު އަޅުގަނޑުމެން ދާނީ [އިންޑިއާގެ] ސްޓޭޓަސް ވަރަށް ގާތުން ބަލަމުން،" ތަސްލީމާ އިތުރަށް ވިދާޅުވި އެވެ.
