ޖޯންސަން އެންޑް ޖޯންސަން ވެކްސިން ދިނުން ހުއްޓާލަން އެންގިތާ 11 ދުވަސް ފަހުން އަލުން އެ ވެކްސިން ދިނުމުގެ ހުއްދަ އެމެރިކާ ސިއްހީ އިދާރާތަކުން ދީފި އެވެ.
ނަމަވެސް ވެކްސިނަށް ހުއްދަ ދިނީ އޭގެ ސަބަބުން ލޭގަނޑުވުމުގެ މައްސަލަ ވަރަށް މަދު ހާލަތްތަކުގައި ދިމާވުމުގެ ފުރުސަތު އޮތްކަން ލޭބަލްގައި ޖަހާ ގޮތަށެވެ.
އެ ވެކްސިން ޖެހި އަށް މިލިއަން މީހުންގެ ތެރެއިން 15 މީހަކަށް ވަނީ ލޭގަނޑުވުމުގެ މައްސަލަ ދިމާވެފަ އެވެ. އެ އެންމެންނަކީ ވެސް އަންހެނުންނެވެ. އަދި ގިނަ މީހުންނަކީ އުމުރުން 50 އަހަރުން ދަށުގެ މީހުންނެވެ. ލޭގަނޑުވި މީހުންގެ ތެރެއިން ތިން މީހަކު މަރުވެފައި ވާއިރު، ހަތް މީހަކަށް އަންނަނީ ފަރުވާ ދެމުންނެވެ.
ޔޫރަޕުން ވެސް ވަނީ އަލުން ޖޯންސަން އެންޑް ޖޯންސަން ވެކްސިނަށް ހުއްދަ ދީފަ އެވެ.
މި ވެކްސިނުގެ އިތުރުން އިނގިރޭސިވިލާތުގެ އޮކްސްފޯޑް ޔުނިވާސިޓީ އާއި އެސްޓްރަޒެނެކާ ގުޅިގެން އުފެއްދި ކޮވިޑް ވެކްސިން ޖެހި މަދު އަދަދެއްގެ މީހުންނަށް ވެސް ވަނީ ލޭގަނޑުވާ މައްސަލަ ކުރިމަތިވެފަ އެވެ. ނަމަވެސް ވެކްސިން ޖަހައިގެން އޮތް ނުރައްކަލަށް ވުރެ ނުޖަހާ ހުރުމުން އޮތް ނުރައްކާ ބޮޑު ކަމަށް ސިއްހީ ފަރާތްތަކުން ބުނެ އެވެ.
