ޖޯންސަން އެންޑް ޖޯންސަންގެ ކޮވިޑް ވެކްސިން ޖެހި ވަރަށް މަދު އަދަދެއްގެ މީހުންނަށް ލޭގަނޑުވުމުގެ މައްސަލަ ދިމާވާ ކަމަށް ބެލެވޭތީ އެ ވެކްސިން މަޑުޖައްސާލަން އެމެރިކާގެ ސިއްހީ އިދާރާތަކުން ގޮވާލައިފި އެވެ.
އެމެރިކާގެ ފުޑް އެންޑް ޑްރަގް އެޑްމިނިސްޓްރޭޝަން (އެފްޑީއޭ) އިން ބުނީ 6.8 މިލިއަން ޑޯޒް މިހާތަނަށް ދީފައި ވާއިރު، ލޭގަނޑުވާ މައްސަލަ ދިމާވީ ހަ މީހަކަށް ކަމަށެވެ. އެހެންކަމުން ވެކްސިން މެދުކަނޑާލަން ގޮވާލަނީ ރައްކާތެރިކަން ކުރިއަށް ނެރުމަށް ކަމަށް ބުންޏެވެ.
ބީބީސީއިން ރިޕޯޓުކުރި ގޮތުގައި އެ މައްސަލަ ދިމާވީ އުމުރުން 18 އަހަރާއި 48 އަހަރާ ދެމެދު ހަ އަންހެނުންނަށް ވެކްސިން ޖެހިތާ 13 ވަރަކަށް ދުވަސް ފަހުންނެވެ. ނިއުޔޯކް ޓައިމްސްއިން ބުނީ އެއް އަންހެނަކު މަރުވެފައި ވާއިރު، އިތުރު މީހެއްގެ ހާލު ސީރިއަސް ކަމަށެވެ.
ޖޯންސަން އެންޑް ޖޯންސަން ކުންފުނިން ވަނީ އެ ވެކްސިން ޔޫރަޕަށް ސަޕްލައި ކުރުން މަޑުޖައްސާލަން ވެސް ނިންމާފަ އެވެ.
މި ވެކްސިނުގެ އިތުރުން އިނގިރޭސިވިލާތުގެ އޮކްސްފޯޑް ޔުނިވާސިޓީ އާއި އެސްޓްރަޒެނެކާ ގުޅިގެން އުފެއްދި ކޮވިޑް ވެކްސިން ޖެހި މަދު އަދަދެއްގެ މީހުންނަށް ވެސް ވަނީ ލޭގަނޑުވާ މައްސަލަ ކުރިމަތިވެފަ އެވެ.
ދުނިޔޭގައި މި ވަގުތު އެންމެ ބޮޑަށް ކޮވިޑް ފެތުރިފައި އޮތީ އެމެރިކާގަ އެވެ. އެ ގައުމުގެ 31 މިލިއަން މީހުން މިހާތަނަށް ޕޮޒިޓިވްވެފައި ވާއިރު، 562،000 އަށް ވުރެ ގިނަ މީހުން ވަނީ މި ބަލީގައި މަރުވެފަ އެވެ.
އެމެރިކާގައި ޖޯންސަން އެންޑް ޖޯންސަން ވެކްސިން ދިނުމުގެ ހުއްދަ ދިނީ ފެބްރުއަރީ 27 ގައެވެ. ނަމަވެސް އެ ފައިޒާ އާއި މޮޑާނާގެ ވެކްސިނަށް ވުރެ މި ވެކްސިން ބޭނުން ކުރާ މިންވަރު ތަންކޮޅެއް މަދެވެ.
ނަމަވެސް މިއީ އާދައިގެ ފްރިޖެއްގައި ރައްކާކުރެވޭ ވެކްސިނަކަށް ވެފައި، އެންމެ ޑޯޒެއް ޖަހަން ޖެހޭ ވެކްސިނަކަށް ވާތީ، މީގެ އެހީގައި ވެކްސިން ޕްރޮގްރާމުގެ ދުވެލު ބާރު ކުރަން އެމެރިކާއިން އުއްމީދު ކުރި އެވެ.
