ލޭގަނޑުވުން ނުވަތަ ކްލޮޓްވުމަކީ އޮކްސްފޯޑް ޔުނިވާސިޓީ އާއި އެސްޓްރަޒެނެކާ ގުޅިގެން އުފެއްދި ކޮވިޑް ވެކްސިނުގެ ވަރަށް މަދުން ދިމާވާ ސައިޑް އިފެކްޓެއް ކަމަށް ޔޫރަޕިއަން ޔޫނިއަންގެ ބޭސް ރެގިއުލޭޓް ކުރާ އިދާރާއިން ބުނެފި އެވެ.
ޔޫރަޕިއަން މެޑިސިންސް އެޖެންސީ (އީއެމްއޭ) އިން އެގޮތަށް ބުނީ މި ވެކްސިން ޖެހުމަށް ފަހު ލޭގަނޑުވުމުގެ މައްސަލަ ދިމާވި 86 ކޭސް ދިރާސާ ކުރުމަށް ފަހު އެވެ. އެއީ ވަރަށް މަދުން ދިމާވާ ސައިޑް އިފެކްޓެއް ކަމަށާއި، ނަމަވެސް ވެކްސިނުގެ ގެއްލުމަށް ވުރެ ފައިދާ ބޮޑު ކަމަށް ކަނޑައަޅާފައި ވެއެވެ.
ދިރާސާކުރި ކޭސްތަކާއި ވެކްސިނާ ސީދާ ގުޅުވޭނެ ހެއްކެއް ނުފެނެ އެވެ. އަދި ގިނައިން މި މައްސަލަ ދިމާވަނީ އުމުރުން 60 އަހަރުން ދަށުގެ އަންހެނުންނަށް ނަމަވެސް، ފިރިހެނުންނަށް ވެސް ދިމާވެފައިވާ ކަމަށް އީއެމްއޭގެ ހޯދުންތަކުން ދައްކަ އެވެ.
އީއެމްއޭއިން އެގޮތަށް ބުނެފައި ވާއިރު، އިނގިރޭސި ވިލާތުގެ ވެކްސިނާ ގުޅޭ ކަންކަން ބަލަހައްޓާ އިދާރާއިން ވެސް ނިންމާފައިވަނީ އުމުރުން 30 އަހަރުން ދަށުގެ މީހުންނަށް އޮކްސްފޯޑް ވެކްސިން ނޫން ކޮންމެވެސް އެހެން ކޮވިޑް ވެކްސިނެއް ދިނުމަށެވެ.
އެ ގައުމުގައި މާޗް މަހުގެ ނިޔަލަށް އޮކްސްފޯޑް ވެކްސިން ޖެހި މީހުންގެ ތެރެއިން 79 މީހަކަށް ލޭގަނޑުވުމުގެ މައްސަލަ ދިމާވެ، 19 މީހަކު މަރުވެފައި ވެއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނީ ލޭގަނޑުވަނީ ވެކްސިނުގެ ސަބަބުން ކަމަށް ވުން އެކަށީގެންވި ނަމަވެސް، އެކަން ޔަގީން ނުކުރެވޭ ކަމަށެވެ. އަދި ދުނިޔޭގައި އޮކްސްފޯޑް ވެކްސިން މިހާތަނަށް ދިން 200 މިލިއަން މީހުންގެ ތެރެއިން އެ މައްސަލަ ފާހަގަވީ މަދު އަދަދަކަށް ކަމަށް ބުނެފައި ވެއެވެ.
ދުނިޔޭގައި މިހާތަނަށް 132 މިލިއަން މީހުންނަށް ކޮވިޑް ޖެހިފައި ވާއިރު، 2.8 މިލިއަން މީހުން މި ބަލީގައި މަރުވެފައިވާ ކަމަށް ޖޯން ހޮޕްކިންސް ޔުނިވާސިޓީގެ ތަފާސްހިސާބުން ދައްކަ އެވެ.
