ދެހާސް ތިރީސް ވަނަ އަހަރުގެ ކުރިން އެމެރިކާއިން ޖައްވަށް ވިހާ ގޭސް ބޭރު ކުރާ މިންވަރު 50 ޕަސެންޓަށް ކުޑަ ކުރާނެކަން އިއުލާނު ކުރައްވާ، ދުނިޔޭގެ ގައުމުތަކުގެ ވެރިންނާ އެކު "އާތް ޑޭ ސަމިޓު" ރައީސް ޖޯ ބައިޑެން ފައްޓަވައިފި އެވެ.
މިއަދު ފާހަގަކުރާ ބައިނަލްއަގްވާމީ ދުނިޔޭގެ ދުވަހާ ދިމާކޮށް ފެށި ދެ ދުވަހުގެ ބައްދަލުވުމަކީ ބައިޑެންގެ އިސް ނެންގެވުމުގެ މަތިން 40 ގައުމެއްގެ ލީޑަރުންނާ އެކު މޫސުމަށް އަންނަ ބަދަލުތައް ކުޑަ ކުރުމާ މެދު މަޝްވަރާ ކުރަން ހާއްސަ ބައްދަލުވުމެކެވެ.
"އޮތީ ކުޑަ ވަގުތުކޮޅެއް، އެކަމަކު އަޅުގަނޑު ގަބޫލުކުރަނީ މިކަން ވާނެ ކަމަށް. އަޅުގަނޑުމެން މިކަން ކުރާނަން،" އެމެރިކާއިން ހާސިލްކުރަން ބޭނުންވާ ލަނޑުދަނޑި ހާމަކުރައްވަމުން ބައިޑެން ވިދާޅުވި އެވެ.
އެމެރިކާއިން ކަނޑައެޅި ލަނޑުދަނޑިއަކީ 2005 ވަނަ އަހަރު އެ ގައުމުން ޖައްވަށް ބޭރު ކުރަމުން ދިޔަ ވިހަ ގޭހަށް ވުރެ 50 ޕަސެންޓު ކުޑަ މިންވަރެއް 2030 ވަނަ އަހަރު އަންނަ އިރު ބޭރު ކުރަމުން ދިޔުމެވެ.
އެމެރިކާގެ އިތުރުން ބޮޑެތި އެހެން ގައުމުތަކުން ވެސް މި ބައްދަލުވުމުގައި ލަނޑުދަނޑިތައް އިއުލާނު ކުރާނެ އެވެ. މި ބައްދަލުވުމަކީ އަންނަ ނޮވެމްބަރު މަހު އޮންނަ އދ. ގެ ކްލައިމެޓް ކޮންފެރެންސަށް ދިޔުމުގެ ކުރިން ގައުމުތަކަށް ވިސްނަން ލިބޭ ފުރުސަތެކެވެ.
