އެ ރަށެއްގައި ކޮވިޑު-19 ފެތުރިފައިވާ ނިސްބަތް އެ ރަށެއްގެ އާބާދީގެ ފަސް ޕަސެންޓަށް ވުރެ މަތި ރަށަކުން އެހެން ރަށަކަށް ދަތުރުކުރާނަމަ، ވެކްސިން ފުރިހަމަކޮށްފައިވާ ފަރާތްތަކަށް ވެސް ނެގެޓިވް ނަތީޖާއެއް ބޭނުންވާއިރު، އެފަދަ ފަރާތްތަކަށް ހިލޭ ޕީސީއާރު ޓެސްޓު ހަދައިދެވޭނެ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
މިއަދު އެޗްއީއޯސީން ބޭއްވު ނޫސްވެރިންގެ ބައްދަލުވުމުގައި ވެކްސިން ކްލަސްޓާތަކާ ހަވާލުވެ ހުންނެވި ފާތިމަތު އަނާ ވިދާޅުވީ، ބަލި ފެތުރިފައިވާ ނިސްބަތް އެ ރަށެއްގެ އާބާދީގެ ފަސް ޕަސެންޓަށް ވުރެ މަތި ރަށަކުން ވެކްސިން ފުރިހަމަކޮށްފައިވާ މީހަކު ވެސް އެހެން ރަށަކަށް ދަތުރުކުރާނަމަ، ބޭނުންވާ ނެގެޓިވް ނަތީޖާ ހޯދަން ފްލޫ ކްލިނިކް މެދުވެރިކޮށް ހިލޭ ހެދޭނެ ކަމަށެވެ.
އޭގެ ތެރޭގައި އެފަދަ މީހަކާއަކު ދަތުރުކުރާ، ވެކްސިން ޖެހުމަށް ޝަރުތު ހަމަނުވާ ކުދިންނަށް ވެސް ފްލޫ ކްނިލިކުތަކުން ހިލޭ ޓެސްޓު ހަދައިދޭނެކަމަށް އަނާ ވިދާޅުވި އެވެ.
ކޮވިޑާ ގުޅިގެން ދަތުރުފަތުރުކުރަން ކުރިމަތިވި އުނދަގޫތަކަށް ލުއި ދީ ނެރެފައިވާ ގައިޑްލައިންގައި ކަރަންޓީނާ ނުލައި ދަތުރުކުރަން ހުއްދަ ދީފައި އޮތީ އާބާދީގެ 60 ޕަސެންޓަށް ދެ ޑޯޒު ވެކްސިން ދީފައިވާ ރަށްތަކަށް އެކަންޏެވެ. މި ރަށްތަކަށް ދާ މީހުން ޕީސީއާރު ޓެސްޓެއް ބޭނުމެއް ނުވެ އެވެ.
ނަމަވެސް، އެ ރަށެއްގައި ބަލި އުޅޭ ނިސްބަތް ފަހެއް ޕަސެންޓަށް ވުރެ މަތި ރަށަކުން އެހެން ރަށަކަށް ދަތުރުކުރާ ނަމަ ދެ ޑޯޒު ފުރިހަމަކުރުމަށް ފަހު ދެ ހަފުތާ އަށް މަޑުކުރުމުގެ އިތުރުން ޕީސީއާރު ނެގެޓިވް ޓެސްޓެއް ބޭނުންވެ އެވެ.
