އެމެރިކާގެ ރައީސް ޖޯ ބައިޑެން އިސް ނަންގަވައިގެން މި ހަފްތާގައި ވާޗުއަލަކޮށް ބާއްވާ ދުނިޔޭގެ ލީޑަރުންގެ ކްލައިމެޓް ސަމިޓުގައި ޗައިނާގެ ރައީސް ޝީ ޖިންޕިން ބައިވެރިވެ ވަޑައިގަންނަވާނެ ކަމަށް އެ ގައުމުން ބުނެފި އެވެ.
ބައިޑެންގެ މި ބައްދަލުވުމަށް ދުނިޔޭގެ 40 ލީޑަރުންނަށް ވަނީ ދައުވަތު އަރުވާފަ އެވެ. އޭގެ ތެރޭގައި ޖިންޕިންގެ އިތުރުން ރަޝިއާގެ ރައީސް ލެޑިމިއަ ޕޫޓިން ހިމެނިވަޑައިގަންނަވަ އެވެ. މި ބައްދަލުވުން ފަށާނީ ބައިނަލްއަގްވާމީ ދުނިޔޭގެ ދުވަސް ފާހަގަކުރާ ބުރާސްފަތު ދުވަހު އެވެ.
މި ބައްދަލުވުން ވެގެން ދާނީ ބައިޑެން ރައީސްކަމަށް ވަޑައިގެންނެވި ފަހު އެމަނިކުފާނާއި ޖިންޕިންގެ ފުރަތަމަ ބައްދަލުވުމަށެވެ. ޗައިނާގެ ފޮރިން މިނިސްޓްރީން ބުނީ ބައްދަލުވުމުގައި ޖިންޕިންގެ ހާއްސަ ބަޔާނެއް އިއްވަވާނެ ކަމަށެވެ.
ބައިޑެންގެ ސަރުކާރުގެ ފަރާތުން އެންމެ ފުރަތަމަ ޗައިނާއަށް ވަޑައިގެންނެވި މޫސުމީ ކަންކަމާ ގުޅޭ މަންދޫބު ޖޯން ކެރީ މިދިޔަ ހަފްތާގައި ވަނީ މި ބައްދަލުވުމާ ގުޅޭ ގޮތުން ޗައިނާއާ މަޝްވަރާ ވެސް ކުރައްވާފަ އެވެ.
ޗައިނާގެ ކްލައިމެޓް މަންދޫބު ޝީ ޒެންހުއާ އާއި ކެރީ ޝަންހާއީގައި ބައްދަލުކުރެއްވުމަށް ފަހު ދެ ގައުމުން ގުޅިގެން ނެރުނު ބަޔާނުގައި ބުނީ މޫސުމަށް އަންނަ ބަދަލުތައް ކުޑަ ކުރަން ޗައިނާ އާއި އެމެރިކާ އެކުގައި އެހެން ގައުމުތަކާ އެކު މަސައްކަތް ކުރަން އެއްބަސްވާ ކަމަށެވެ.
"އެމެރިކާ އާއި ޗައިނާއިން މި އޮތީ އެކުގައި އެހެން ގައުމުތަކާ އެކު މޫސުމީ ކާރިސާ ހައްލު ކުރަން މަސައްކަތް ކުރަން ތައްޔާރަށް. މިއީ ސީރިއަސްކަމާ އެކު ހަލުވި ދުވެލީގައި ކުރަން ޖެހޭ މަސައްކަތެއް،" ދެ ގައުމުގެ ޖޮއިންޓް ބަޔާނުގައި ވެއެވެ.
މޫސުމަށް އަންނަ ބަދަލު ކުޑަ ކުރަން ޗައިނާ އާއި އެމެރިކާ އެއް ގަލަކަށް އެރި ނަމަވެސް ބައެއް އެހެން މައްސަލަތަކުގައި ދެ ގައުމުގެ ހިޔާލު ތަފާތުވުން ވަނީ ބޮޑުވެފަ އެވެ. އޭގެ ތެރޭގައި ހޮންކޮންގެ ޑިމޮކްރަސީގެ މައްސަލަ އާއި ޓައިވާނަށް އަތްގަދަ ކުރަން އުޅޭ ކަމަށް ބުނާ މައްސަލަ ހިމެނެ އެވެ.
