މެޑްރިޑް (އޭޕްރީލް 19) - ސްޕެނިޝް ލީގުގެ އެއް ވަނައިގައި އޮތް އެތުލެޓިކޯ މެޑްރިޑުން މިރޭ 5-0 އިން އެއިބާ ބަލިކުރިއިރު، ދެ ވަނައިގައި އޮތް ރެއާލް މެޑްރިޑް ކުޅުނު މެޗުން ރަށުންބޭރުގައި ލަނޑެއް ނުޖެހި ގެޓަފޭއާ އެއްވަރުވެއްޖެ އެވެ.
އެތުލެޓިކޯ މިރޭ ފުރަތަމަ ކުޅެ މޮޅުވިއިރު، އެ ޓީމު އެއް ވަނައިގައި އޮތީ 31 މެޗުން 70 ޕޮއިންޓާ އެކު އެވެ. ދެ ވަނައިގައި ރެއާލަށް މިރޭގެ މެޗުން މޮޅުވެގެން އެތުލެޓިކޯއާ އެއް ޕޮއިންޓަށް ގާތަށް ޖެހިލެވެން އޮތެވެ. އެކަމަކު ރެއާލް އެއްވަރުވުމުން އެތުލެޓިކޯ އަށް އެއް ވަނައިގައި ތިން ޕޮއިންޓުގެ ލީޑެއް ލިބުނީ އެވެ. ލީގުގެ ރޭހުގައި އޮތް ބާސެލޯނާ ތިން ވަނައިގައި އޮތީ 30 މެޗުން 65 ޕޮއިންޓާ އެކު އެވެ.
އެތުލެޓިކޯގެ ވަންޑާ މެޓްރޮޕޮލިޓާނޯ ސްޓޭޑިއަމްގައި މިރޭ ކުޅުނު މެޗުގައި އެ ޓީމުގެ ގޯލުތައް ޖެހީ އެންހެލް ކޮރޭއާ އާއި މާކޯސް ލޮރެންޓޭ ކޮންމެ ކުޅުންތެރިއަކު ދެ ގޯލުގެ އިތުރުން ޔަނިކް ކަރާސްކޯ އެވެ. އަނިޔާގެ ސަބަބުން އެތުލެޓިކޯގެ ލުއިސް ސުއަރޭޒާއި ޔައޯ ފެލިކްސް ހުރީ ކުޅުމާ ދުރުގަ އެވެ.
މެޗަށް ފަހު އެތުލެޓިކޯގެ ކޯޗު ޑިއޭގޯ ސިމިއޯނީ ބުނީ ލީގުގެ ފަހު ހަތް މެޗަށްދާއިރު ކޮންމެވެސް ވަރެއްގެ ކޮންޓްރޯލެއްގައި އޮތުމަކީ ހިތްހަމަޖެހުމެއް ކަމަށާއި އެކަމަކު އެއްވެސް މެޗެއް ދެން ފަސޭހަކޮށްލެވެން ނެތްކަން ކުުޅުންތެރިންނަށް ވިސްނައިދެމުން އަންނަ ކަމަށް ސިމިއޯނީ ބުންޏެވެ.
ގެޓަފޭ ދަނޑުގައި އެންމެ ފަހުގެ ޗެމްޕިއަން ރެއާލް ބަލިނުވެ ސަލާމަތްކޮށްދިނުމުގައި އެ ޓީމުގެ ގޯލްކީޕަރު ތިބައު ކޯޓުއާ އިސްދައުރެއް އަދާކުރި އެވެ. މި މެޗުގައި ރެއާލްގެ ކުރިއަށް ކުޅުނު މާކޯ އަސެންސިއޯ އާއި މަރިއާނޯ ޑިއާޒް އަދި ވިނީޝިއުސް ޖޫނިއާ އަށް އެންމެ ރަނގަޅު ކުޅުމެއް ދެއްކޭ ގޮތެއްނުވި އެވެ.
ރެއާލްގެ ކޯޗު ޒިނެދިން ޒިދާން ބުނީ މުހިއްމު ގިނަ ކުޅުންތެރިން ނުލައި ކުޅެން ޖެހުމުގެ ޝަކުވާކުރަން ބޭނުންނުވާ ކަމަށާއި މެޗުން މޮޅުވެވޭވަރުގެ ކުޅުމެއް ނުދެއްކުމަކީ ވެސް ކަންބޮޑުވުމެއް ކަމަށެވެ.
