ވެރިކަން ކުރާ މައި ޕާޓީ، އެމްޑީޕީގެ އޮފީހުގެ ބިއްލޫރި ގަނޑެއް ތަޅާލި މައްސަލައިގައި ހައްޔަރު ކުރި ތިން މީހުންގެ ތަހުގީގު ނިމުމުން މިއަދު ދޫކޮށްލައިފި އެވެ.
އެ މައްސަލާގެ ތުހުމަތަށް ކޯޓު އަމުރެއްގެ ދަށުން މިދިޔަ ބުދަ ދުވަހު ހައްޔަރު ކުރީ 23 އަހަރާއި 24 އަހަރާއި 36 އަހަރުގެ ދިވެހި ތިން ފިރިހެނުންނެވެ. އެ މީހުންގެ ބަންދަށް ބުރާސްފަތި ދުވަހު ކްރިމިނަލް ކޯޓުން ވަނީ ހަތަރު ދުވަސް ޖަހައިދީފަ އެވެ.
ފުލުހުންގެ މީޑިއާ އޮފިޝަލް މިއަދު ވިދާޅުވީ އެ ތިން މީހުންގެ ބަންދުގެ މުއްދަތު ހަމަވިއިރު އެ މީހުންގެ ތަހުގީގު ނިމިފައިވާތީ ކޯޓަށް ނުގެންގޮސް އެ މީހުން ދޫކޮށްލީ ކަމަށެވެ. ދައުވާ ކުރަން އެ މީހުންގެ މައްޗަށް ހެކި ލިބިފައިވާ ކަމަށް ވެސް މީޑިއާ އޮފިޝަލް ވިދާޅުވި އެވެ.
ޕޭމަންޓު ގަލަކުން ޖަހައި އެމްޑީޕީ އޮފީހުގެ ބޭރު ބިއްލޫރިގަނޑު ތަޅާލީ, ލޯކަލް ކައުންސިލް އިންތިހާބުގެ ވަގުތީ ނަތީޖާ ކަށަވަރުނުވާ 18 ވޯޓު ފޮއްޓެއް އަލުން ގުނަން އުޅުމުން އިދިކޮޅާއި އެމްޑީޕީ ސަޕޯޓަރުންނާ ދެމެދު އަންގާރަ ދުވަހު ހިނގި ހަމަނުޖެހުންތަކަށް ފަހު އެވެ.
