މިއުނިކް (އޭޕްރީލް 18) - ޖަރުމަނު ލީގުގައި މިރޭ ވުލްފްސްބާގް ދަނޑުގައި އެ ޓީމު އަތުން 3-2 އިން މޮޅުވެ ބަޔާން މިއުނިކުން ޖަރުމަނު ލީގު ހޯދުމާ ގާތަށް ޖެހިލިއިރު، ބަޔާންގެ ކޯޗު ހަންސީ ފްލިކް މި ސީޒަނަށް ފަހު ޓީމު ދޫކޮށްލާން ނިންމާފައިވާ ކަމަށް ބުނެފި އެވެ.
ރިޕޯޓްތައް ބުނާގޮތުން އުމުރުން 56 އަހަރުގެ ފްލިކް ނިންމާފައިވަނީ މި އަހަރުގެ ޔޫރޯ ފުޓްބޯޅަ މުބާރާތަށް ފަހު ޖަރުމަނު ގައުމީ ޓީމާ ހަވާލުވާށެވެ. އެކަމަކު ފްލިކް ވަނީ ޖަރުމަނު ޓީމާ ހަވާލުވާން އެއްބަސްވުމެއް އޮތް ކަމަށް ބުނެ ދެކެވޭ ވާހަކަތައް ދޮގުކޮށްފަ އެވެ.
"މި ވަގުތަށް އަހަރެން ނިންމާފައިވަނީ ބަޔާނާ އެކު އަހަރެން ހަދާފައިވާ އެއްބަސްވުން މި ސީޒަން ނިމުމުން އުވާލަން. އަދި އަހަރެންގެ މުސްތަގުބަލާ ބެހޭގޮތުން އަދި ފައިނަލް ގޮތެއް ނުނިންމަން. ތެދެއް. ޖަރުމަނު ކޯޗުކަމަކީ ވެސް އޮތް އޮޕްޝަނެއް،" ސްކައި ޖާމަނީ އަށް ދިން އިންޓަވިއުއެއްގައި ފްލިކް ބުންޏެވެ.
ޖަރުމަނު ކޯޗަކަށް މި ވަގުތު ހުރި ޔަކީމް ލޯ 14 އަހަރަށް ފަހު އެ ޓީމު ދޫކޮށްލާނީ ޔޫރޯ އަށް ފަހު އެވެ. ލޯގެ އެސިސްޓަންޓަކަށް ފްލިކް މަސައްކަތްކުރި އެވެ. ބްރެޒިލްގައި 2014 ވަަނަ އަހަރު ބޭއްވި ފީފާ ވޯލްޑް ކަޕް ޖަރުމަނުން ކާމިޔާބުކުރުމުގެ ފަހަތުގައި ތިބީ ލޯ އާއި ފްލިކް އެވެ.
ބަޔާންގެ ކޯޗު ފްލިކް: މި ސީޒަނަށް ފަހު އޭނާ ޓީމު ދޫކޮށްލާނެ
ފްލިކްގެ ބަދަލުގައި ބަޔާނުން ގެންނަން ނިންމާފައިވަނީ މި ވަގުތު ޖަރުމަނު ލީގުގެ ދެ ވަނައިގައި އޮތް އާރްބީ ލައިޕްޒިގުގައި ހުރި ޒުވާން ކޯޗު ހޫލިއަން ނާގަލްސްމަން އެވެ. ލައިޕްޒިގާ ނާގަލްސްމަން ހަވާލުވީ 2019 ވަނަ އަހަރު އެވެ. މި ފަހަރު ވާދަކުރަމުން އަންނަ ލައިޕްޒިގު ވަނީ ހުކުރު ދުވަހުގެރޭ ނާގަލްސްމަންގެ ކުރީގެ ޓީމު ހޮފެންހައިމާ 0-0 އިން އެއްވަރުވެފަ އެވެ. އެ ނަތީޖާއާ އެކު ލައިޕްޒިގަށް ލީގުގެ ރޭހުގައި މައްސަލަތައް ކުރިމަތިވެ، ބަޔާނަށް ލީގުގެ ކުރީގައި ލީޑު ނެގުމުގެ ފުރުސަތު އޮތީ ހުޅުވިފަ އެވެ.
ފުރުސަތުގެ ބޭނުންހިފައި މިރޭ ވުލްފްސްބާގް ބަލިކޮށް ލީގުގެ ބާކީ ފަސް މެޗަށް ދާއިރު، ބަޔާނުން ވަނީ އެއް ވަނައިގައި ހަތް ޕޮއިންޓަށް ލީޑުފުޅާކޮށްފަ އެވެ. ބަޔާނަށް 29 މެޗުން ވަނީ 68 ޕޮއިންޓް ލިބިފަ އެވެ. ދެ ވަނައިގައި އޮތް ލައިޕްޒިގުގެ އޮތީ 29 މެޗުން 61 ޕޮއިންޓެވެ.
ވުލްފްސްބާގް ކޮޅަށް ބަޔާންގެ ތިން ގޯލުގެ ތެރެއިން ދެ ގޯލު ޖެހީ ދާދި ފަހުން އިންގްލެންޑް ދޫކޮށް ޖަރުމަނު ގައުމީ ޓީމަށް ކުޅެން ނިންމި 18 އަހަރުގެ ޖަމާލް މުސިއާލާ އެވެ. ބަޔާންގެ އަނެއް ގޯލު ޖެހީ ރޮބަޓް ލެވަންޑޯސްކީ އަނިޔާގެ ސަބަބުން ކުޅުމާ ދުރު ހުރުމުން މި ވަގުތު ބަޔާންގެ އެޓޭކް ލީޑުކުރަމުން އަންނަ ފޯވާޑް އެރިކް މެކްސިމް ޗޮޕޫ މޯޓިން އެވެ. ވުލްފްސްބާގްގެ ދެ ގޯލު ޖެހީ ވޫޓް ވޭގްހޯސްޓާއި މެކްސިމިލިއަން ފިލިޕް އެވެ.
