ރާއްޖޭގެ ކްލަބްތަކަށް ގެންނަ ގިނަ ބިދޭސީ ކުޅުންތެރިންގެ ފެންވަރު ރަނގަޅުކުރަން ޖެހޭ ކަމަށާއި އެކަން ނުކޮށް، އާންމު ގޮތެއްގައި 2000 ޑޮލަރު ދީފައި ބަހައްޓާ ބިދޭސީ ކުޅުންތެރިންނަަށް ތަފާތު ނުދެއްކޭ ކަމަށްވަންޏާ އޭގެ ބޭނުމެއް ނެތް ކަމަށް ޔުނައިޓެޑް ވިކްޓްރީ (ޔޫވީ)ގެ ކޯޗު އިހުސާން އަބްދުލް ގަނީ (ސާންތީ) ބުނެފި އެވެ.
މި ފަހަރު ލީގުގެ މެދުތެރެއިން ޔުނައިޓެޑް ވިކްޓްރީގެ ކޯޗުކަމާ ހަވާލުވި ސާންތީ މިދިިޔަ މަހުގެ ޓްރާންސްފާ މާކެޓް އައުމުގެ ކުރިން ނޫސްވެރިންގެ ބައްދަލުވުންތަކުގައި ދެއްކި އެއް ވާހަކަ އަކީ އެ ޓީމަށް ކުޅޭ ބިދޭސީ ކުޅުންތެރިންގެ ފެންވަރު ދަށް ވާހަކަ އެވެ. އޭރު ސާންތީގެ ވާހަކަ ހުރި ގޮތުން ބެލެވުނީ މިިދިޔަ މަހުގެ ޓްރާންސްފާ މާކެޓްގައި ޔުނައިޓެޑް ވިކްޓްރީން ހަތަރު ބިދޭސީ ކުޅުންތެރިން ވެސް ބަދަލުކުރާނެ ކަމަށެވެ.
އެކަމަކު ޔުނައިޓެޑް ވިކްޓްރީގެ މެނޭޖްމަންޓާ މަޝްވަރާ ކުރުމަށް ފަހު ސާންތީ ނިންމީ މި ސީޒަނުގައި އެ ތިބި ބިދޭސީ ކުޅުންތެރިންނާ އެކު ކުރިއަށްދާށެވެ.
ލީގުގައި މާދަމާރޭ ސުޕަ ޔުނައިޓެޑް ސްޕޯޓްސް (ސަސް)އާ ދެކޮޅަށް ކުޅޭ މެޗުގެ ކުރިން މިއަދު އޮތް ނޫސްވެރިންގެ ބައްދަލުވުމުގައި ސާންތީ ބުނީ ބިދޭސީ އާ ކުޅުންތެރިން ނުގެނައީ މި ދަނޑިވަޅުގައި ބޭނުންނުވާ ރިސްކުތަކެއް ނަގަން ބޭނުންނުވާތީ ކަމަށެވެ.
ސާންތީ ބުނީ މީހަކު ފޮނުވާ ވީޑިއޯ އެއް ބަލައިގެން ކުޅުންތެރިން ގެނެސްގެން އެ ރިސްކު ނަގަށް ބޭނުންނުވާ ކަމަށެވެ. އެގޮތުން އޭނާ އަށް ގޮތް ނޭނގޭ ކުޅުންތެރިއަކު ވީޑިއޯ ބަލައިގެން ގެންނަން ބޭނުމެއް ނުވީ އެ ކުޅުންތެރިއަކު ގެނެސްގެން އަނެއްކާ ވެސް އިތުރު ބޭކާރު ހަރަދެއްކުރަން ބޭނުންނުވާތީ ކަމަށް ސާންތީ ބުންޏެވެ.
"އަޅުގަނޑުމެންގެ ވިސްނުން މި ހުންނަ ގޮތަކީ ވީޑިއޯ އަކީ ވެސް އަޅުގަނޑަށް ތަންކޮޅެއް އުނދަގޫ އެއްޗެއް ބައެއް ފަހަރު ގަބޫލުކުރަން ވެސް. މިހެން (ވީޑިއޯ ބަލައިގެން ކުޅުންތެރިން) ގެންނައިރުގައި ވަރަށް އާދައިގެ ޕްލޭޔަރުން ވެސް އެބަހުރި ވީޑިއޯ އަށް ބަލައިގެން ގެނެސްފައި. އެހެންވެ އެ ރިސްކު ނުނެގީ އަޅުގަނޑު،" ސާންތީ ބުންޏެވެ.
ސާންތީ ބުނީ ރަނގަޅު ބިދޭސީ ކުޅުންތެރިން ލިބޭނީ ބަޖެޓް ވެސް ލިިބިގެން ކަމަށެވެ. ބަޖެޓުގެ ދަތިތަކާ ގުޅިގެން ދައްކާ އެ ވާހަކަތަކަށް ތާއީދުކުރާ ކަމަށާއި އެކަމަކު ރަނގަޅަށް ސްކައުޓް ކުރެވިގެން ރަނގަޅު އެޖެންޓުން ތަކެއް ލިބިއްޖިއްޔާ ކުޑަ ބަޖެޓެއްގައި ވެސް ރަނގަޅު ކުޅުންތެރިން ލިބިދާނެ ކަމަށް ސާންތީ ގަބޫލުކުރެ އެވެ.
ބައިނަލްއަގުވާމީ ފުޓްބޯޅަ އަށް ބަލާއިރު ލީގެއް ވަރުގަދަވަނީ އޭގެ ކުޅޭ ކުޅުންތެރިންގެ ފެންވަރު ވެސް ރަނގަޅުވުމުން ކަން ޕްރިމިއާ ލީގު ފަދަ މުބާރާތްތަކުން އެ ހުރީ ހެކި ފެންނަން ކަމަށް ސާންތީ ބުންޏެވެ. މި ވަގުތު ލީގުގެ އަށް ޓީމަށް ބަލާއިރު ފެންވަރުގެ ގޮތުން ތަފާތު ބިދޭސީ ކުޅުންތެރިންނަށް ތިބީ ދެތިން ކުޅުންތެރިން ކަމަށް ސާންތީ ބުންޏެވެ.
"ބިދޭސީ ކުޅުންތެރިއަކަށް 3000 ނޫނީ 5000 ޑޮލަރު ދީފައި ގެންނަ ކުޅުންތެރިޔާ ނޫނީ 2000 ޑޮލަރު ދީފައި ގެންނަ ކުޅުންތެރިޔާ އަށް ތަފާތެއް ނުދެއްކެންޏާ ބޭނުމެއް ނެތް. ޕްރިމިއާ ލީގު ތަންތާގައި ވެސް މި ލީގު މި ބަލަނީ ވެސް މޮޅެތި ކުޅުންތެރިން ކުޅޭތީ،" ސާންތީ ބުންޏެވެ.
"މިހާރު މިކަން ކުރާ ގޮތަށް މިކަމެއް ނުކުރެވޭނެ. މިހާރު ހަމަ މީހަކު މި ފޮނުވާލަނީ. އޭނަ އަށް ވަރިހަމަ 2000 ޑޮލަރަށް ކިޔާ މީހާ 700 ޑޮލަރަށް ވެސް ބައެއް ކްލަބްތަކަށް އެބަތިރިވެގެންދޭ. ދެން 700 ނޫނީ 800 ޑޮލަރު ދޭ (ބިދޭސީ) ކުޅުންތެރިންގެ ފެންވަރު އަޅުގަނޑުމެންނަށް ވެސް އަންދާޒާ ކޮށްލެވޭ،"
އެފްއޭއެމްގެ ޓެކްނިކަލް ޑިރެކްޓަރަކަށް ކުރިން މަސައްކަތްކުރި ސާންތީ ބުނީ އަވައްޓެރި ގައުމުތައް ކަމަށްވާ އިންޑިއާ އާއި ބަންގްލަދޭޝް އަދި ނޭޕާލްގެ ލީގުތައް ފެންވަރު ރަނގަޅު ބިދޭސީ ކުޅުންތެރިންނާ އެކު ވަރުގަދަވަމުން އަންނައިރު، އޭގެ ތެރެއިން ރާއްޖޭގައި ކުޅެން ބޭނުންވާ ބިދޭސީ ކުޅުންތެރިން ވެސް ގިނަ ކަމަށެެވެ. އެކަމަކު އެ ކުޅުންތެރިން ރާއްޖެ ނުގެނެވިގެން މި އުޅެނީ ދާންވާ މިސްރާބުން ދިވެހި ކްލަބްތަކަށް ނުދެވޭތީ ކަމަށް ސާންތީ ގަބޫލުކުރެ އެވެ.
"އަޅުގަނޑުމެންނަށް އެ ދާންވާ ގޮތަށް ނުދެވެނީ އަސްލު. ހަމަ ރަނގަޅު އަގަކަށް ކުޅުންތެރިން ލިބޭނެ. އަޅުގަނޑުމެން އެބަޖެހޭ ހުރިހާ ކްލަބްތަކުން ވެސް ދުރާލާ މި ކަންތައްތަކާ އުޅެން. އޭރުން ވެސް ހަގީގަތުގައި މި ލީގު ތަފާތު އެބަވޭ. ތަފާތު ކުޅުންތެރިއަކު ހުރެއްޖިއްޔާ އޭނަ އެ ހަދާ އެތި ބަލާލަން ވެސް 20 ވަރަކަށް މީހުން އިތުރަށް ވަނަސް އެއީ ލީގަށް ލިބޭ ކުރިއެރުމެއް. ހަގީގަތުގައި އެހެންވީމަ މި ފެންވަރު ކުޅުންތެރިން އައިސްގައި މިކަން ކުރެވޭނެ،" ސާންތީ ބުންޏެވެ.
ސާންތީ ބުނީ ފެންވަރު ރަނގަޅު ބިދޭސީ ކުޅުންތެރިން ގެންނަން މީގެ ކްލަބްތައް ގުޅިގެން ރަނގަޅު އޭޖެންޓުންނާ ގުޅުން ބަދަހިކުރުމަކީ މުހިއްމު ކަމެއް ކަމަށެވެ.
