ރާއްޖޭގެ ހުނަރުވެރި ޓޭބަލް ޓެނިސް ކުޅުންތެރިޔާ ފާތިމަތު ދީމާ އަލީ ދުނިޔޭގެ ޓޭބަލް ޓެނިސް ރޭންކިންގެ ޖޫނިއާ ކެޓަގަރީން އަށް ވަނައިގައި ހިމެނިއްޖެ އެވެ.
މި މަހުގެ 13 ވަނަ ދުވަހު އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން އާންމުކުރި ރޭންކިންގައި ދީމާ ހިމެނިފައިވަނީ ޔޫތު ބައިގެ 15 އަހަރުން ދަށުގެ އަންހެން ކުޅުންތެރިންގެ ތެރެއިން ދުނިޔޭގެ އަށް ވަނައިގަ އެވެ. މިއީ ރާއްޖޭގެ ކުޅުންތެރިއަކަށް ދުނިޔޭގެ ރޭންކިންގެ ގަދަ 10 ގެ ތެރެއިން ފުރުސަތު ލިބުނު ފުރަތަމަ ފަހަރެވެ.
ޓީޓީ އެސޯސިއޭޝަނުން ބުނީ މިއީ ރާއްޖޭގެ ޓީޓީ އަށް އަނެއްކާ ވެސް ލިބިގެންދިޔަ ތާރީހީ ކާމިޔާބެއް ކަމަށާއި މި ކަމުގެ ޝުކުރު ދީމާގެ އާއިލާ އާއި ސްޕޯޓްސް މިނިސްޓަރު އަހުމަދު މަހުލޫފަށް އަދާކުރާ ކަމަށެވެ.
ދީމާ ރޭންކިންގެ އަށް ވަނަ އަށް އެރީ 1028 ޕޮއިންޓް ހޯދައިގެންނެވެ. ދީމާ އަށް ވުރެ މަތީގައި އޮތް އިންޑިއާގެ ސުހާނާ ސައިނީ އަށް ލިބިފައިވަނީ 1032 ޕޮއިންޓެވެ. މި ބައިގެ އެއް ވަަނައިގައި އޮތީ 3144 ޕޮއިންޓާ އެކު ޖަޕާނުގެ މިވާ ހަރިމޯޓޯ އެވެ.
އޮލިމްޕިކްސްގައި ވާދަކުރާނެ ކުޅުންތެރިން އުފައްދަން އައިޓީޓީއެފް އިން ކުރިއަށްގެންދާ އެ ޕްރޮގާމުގައި އުމުރުން 13 އަހަރުގެ ދީމާ ހިމެނިފައިވުމަކީ، ރާއްޖޭގެ ޓީޓީގެ ކުރިމަގުން އުޖާލާކަމުގެ ހެއްކެކެވެ. ދީމާ އަންނަނީ ބައިނަލްއަގުވާމީ މައިދާނުގައި ލިބޭ ކޮންމެ ފުރުސަތެއްގެ ބޭނުން ރަނގަޅަށް ހިފަމުންނެވެ.
ދީމާގެ ކާމިޔާބީގައި އެންމެ ބޮޑު ހިއްސާއެއް އޮތީ އޭނާގެ ބައްޕަ ބައްޕަ ސައްތާރާއި، މަންމަ އައިޝަތު ވަހީދާ އެވެ. އޭނާގެ ހުނަރުވެރިކަން ފާހަގަވާން ފެށީއްސުރެ އެދެމަފިރިން އެތިބީ އޭނާގެ ކުރިއެރުމަށް ހުސްވެގެންނެވެ. ދީމާ އެންމެ ފުރަތަމަ ވިދާލީ 2016 ވަނަ އަހަރު، މެލޭޝިއާ ޓޭބަލް ޓެނިސް މުބާރާތެއްގެ 11 އަހަރުން ދަށުގެ ޗެމްޕިއަންކަން ހޯދައިގެންނެވެ.
އޭގެ ފަހުން ލަންކާގެ ޖޫނިއާ ނެޝަނަލް ޓޭބަލް ޓެނިސް މުބާރާތުގެ 10 އަހަރުން ދަށުގެ ޗެމްޕިއަންކަން ހޯދީ އެވެ. އެ ކާމިޔާބީއާ އެކު ލަންކާ ކޯޗުންނާއި އެސޯސިއޭޝަންތަކުގެ ވެރިން ވަނީ އޭނާ ވަށާލައި، ލަންކާ އަށް ކުޅެން ދައުވަތުދީ އެކަމަށް ބާރު އެޅި އެވެ. އެކަމަކު ސައްތާރާއި ވަހީދާ އޭރު ވެސް ބުނަމުން ދިޔައީ އުފަންވީ ލަންކާ އަށް ކަމަށްވީ ނަމަވެސް އަދި އެ ގައުމުން ފުރުސަތުތައް އޮހުނަސް ބޭނުންވަނީ ދީމާ އަމިއްލަ ގައުމަށް ކުޅުވަން ކަމަށެވެ. އަދި ބައިނަލްއަގްވަމީ މައިދާނުގައި ރާއްޖެ ތަމްސީލްކޮށް، އަދި ދީމާ އަކީ ރާއްޖޭގެ އެއް ވަނަ ކުޅުންތެރިޔާ އަށް ހެދުމަކީ ހުވަފެނެއް ކަމަށް ވެސް ބުންޏެވެ ސްކޫލް ބަންދާ ދިމާކޮށް އެކި ގައުމުތަކަށް ގެންގޮސް ތަމްރީން ހޯދައިދިނީ އަމިއްލަ ޖީބުން ހަރަދުކޮށްގެންނެވެ. ދީމާ ހަގު ކަމުން އޭނާއާ އެކު އެ ހުރިހާ ތާކަށް މައިންބަފައިންދެ އެވެ.
ގައުމީ ފެންވަރުގައި ކުޅެން ފެށިތާ ތިން އަހަރުގެ ތެރޭގައި ދީމާ ވަނީ ރާއްޖެ އަށް 2019 ވަނަ އަހަރު ރީޔޫނިއަންގައި ބޭއްވި އިންޑިއަން އޯޝަން އައިލެންޑް ގޭމްސް (އައިއޯއައިޖީ) އިން ތިން ރަން މެޑަލް ގެނެސްދީފަ އެވެ. މިއީ ރާއްޖޭގެ ޓީޓީގައި ލިޔެވިގެންދިޔަ އާ ސޮފުހާ އެކެވެ.
އޭގެ އިތުރުން ދީމާ ވަނީ ސައުތު އޭޝިއާ ހޯޕްސް މުބާރާތުން ރަން މެޑަލް ހޯދައި އަދި އޭޝިއާ ހޯޕްސް މުބާރާތުން ރިހި މެޑަލް ހޯދައި، ވޯލްޑް ހޯޕްސް މުބާރާތަށް ކޮލިފައިވެފަ އެވެ. އަދި ގައުމީ ޓީޓީ ސިންގަލްސް ޗެމްޕިއަންކަން ޖެހިޖެހިގެން ދެ އަހަރު ހޯދައި ރައީސުލްޖުމްހޫރިއްޔާގެ ވާދައިގެ ތަށި މިލްކުކުރުމުގެ ފުރުސަތު އުމުރުން 12 އަހަރުގައި މިވަނީ ހޯދައިފަ އެވެ.
