ލަންޑަން (އޭޕްރިލް 16) - އާސެނަލްގެ ކެޕްޓަން ޕިއޭ އެމެރިކް އޮބާމަޔަން އަށް މެލޭރިއާ ޖެހިގެން ހޮސްޕިޓަލްގައި އެޑްމިޓްކޮށްގެން ފަރުވާދީފި އެވެ.
އުމުރުން 31 އަހަރުގެ އޮބާމަޔަން އަށް މެލޭރިއާ ޖެހުނީ ދާދި ފަހުން އޭނާގެ ގައުމު ގެބޮންގެ މެޗުތަކެއް ކުޅެން ގޮސް އުޅުމުގެ ތެރޭގަ އެވެ. އެފްރިކާގެ ކޮލިފައިންގައި ގެބޮން މިދިޔަ މަހު ކުޅުނު މެޗުތަކުގައި އޮބާމަޔަން ވަނީ ކުޅެފަ އެވެ. އަދި އޭނާ ވަނީ މިދިޔަ މަހު 25 ވަނަ ދުވަހު ގެބޮން އިން 3-0 އިން ކޮންގޯ ބަލިކުރި މެޗުގައި ގޯލު ވެސް ޖަހައިފަ އެވެ.
އޭގެ ފަހުން އާސެނަލް ޓީމާ ގުޅި އޮބާމަޔަން ވަނީ ޔޫރޮޕާ ލީގުގައި މި މަހު އަށް ވަނަ ދުވަހު ސްލަވިއާ ޕްރާގާ ދެކޮޅަށް ކުޅުނު މެޗުގައި ކުޅެފަ އެވެ. އެކަމަކު އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ ޝެފީލްޑް އަތުން މޮޅުވި މެޗާއި ރޭ ސްލަވިއާ ޕްރާގް ދަނޑުގައި އާސެނަލް ކުޅުނު ޔޫރޮޕާ ލީގުގެ ދެ ވަނަ މެޗުގައި އޮބާމަޔަން ނުކުޅެ އެވެ.
އޮބާމަޔަން އޭނާގެ ރަސްމީ އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ ފާއިތުވި ދުވަސްތަކުގައި ހޮސްޕިޓަލުން އޭނާ ފަރުވާ ހޯދާފައިވާ ކަމަށާއި ދުވަހެއް ދުވަހަކަށް އޭނާގެ ހާލަތު އަންނަނީ ރަނގަޅުވަމުން ކަމަށެވެ. އަދި އުއްމީދަކީ ވީ އެންމެ އަވަހަކަށް ދަނޑަށް އެނބުރި އައުން ކަމަށް އޮބާމަޔަން ބުނެފައިވެ އެވެ.
މެލޭރިއާ އަކީ މަދިރީގެ ޒަރިއްޔާ އިން ޖެހޭ ބައްޔެކެވެ. އޭގެ އިންފެކްޝަން އަސަރު އާންމުކޮށް ފެންނަނީ ހަތް ދުވަހާއި 18 ދުވާހާ ދެމެދުގަ އެވެ.
