ކުރިޔަށް އޮތް ދެ އަހަރަށް ލަފާކުރާ މެދުރާސްތާގެ ބަޖެޓު އެކުލަވާލުމުގެ މަސައްކަތް ފިނޭންސް މިނިސްޓްރީން ފަށައިފި އެވެ.
މި ބަޖެޓަކީ ސަރުކާރުގެ ސްޓްރެޓެޖިކް އެކްޝަން ޕްލޭނާއި ނޭޝަނަލް ރެޒިލިއަންސް އެންޑް ރިކަވަރީ ޕްލޭނާ އެއްގޮތަށް ތައްޔާރުކުރާ ޕްރޮގްރާމް ބަޖެޓެކެވެ. -- ޕްރޮގްރާމް ބަޖެޓަކީ ވަކި ޕްރޮގްރާމަކަށް ނުވަތަ ވަކި މަޝްރޫއަކަށް ހާއްސަ ކުރެވިގެން އެކުލަވާލެވޭ ބަޖެޓެކެވެ.
މިކަމާ ގުޅޭގޮތުން ފިނޭންސް މިނިސްޓްރީން ކުރި އިއުލާނެއްގައި ބުނި ގޮތުގައި، މެދުރާސްތާ ބަޖެޓަށް ސަރުކާރު އޮފީސްތަކުން ހުށައަޅަން ޖެހޭނީ 2022-2024 އަށް އެ އޮފީހަކުން އަލަށް ފަށަން ރާވާފައިވާ ޕްރޮގްރާމްތަކާއި މަޝްރޫއުތައް ނުވަތަ ނިއު ޕޮލިސީ އިނީޝިއޭޓިވްސްތަކެވެ.
މިއީ ސަރުކާރުގެ ސްޓްރެޓެޖިކް ޕްލޭނާއި ރިކަވަރީ ޕްލޭންގައި ހިމެނޭ ކަންކަން ހާސިލުވާނެ ފަދަ ކަންކަމަށްވުމުގެ އިތުރަށް، ކުރާ ހޭދައާ އެއްހަމައަށް ނަތީޖާ ނެރެވޭ، ކަނޑައަޅާފައިވާ ލަނޑުދަނޑިތައް ހާސިލުކުރެވޭ ހަރަކާތަކަށް ނުވަތަ މަޝްރޫއަކަށް ވާން ޖެހެ އެވެ. އަދި، މިހެން ހުށައަޅާ ކަންކަމުގެ ތެރޭގައި ބަޖެޓުގައި ހިމެނުމަށް ބޭނުންވާ އާ ކަންތައްތަކުގެ އިތުރަށް މިހާރު ކުރިޔަށްދާ މަޝްރޫއުތަކުގެ ތެރެއިން ބަޖެޓުން އިތުރަށް ޖާގަ ބޭނުންވާ ކަންތައްތައް ހުށައެޅޭނެ ކަމަށް އެ އިއުލާނުގައިވެ އެވެ.
ސަރުކާރު އޮފީސްތަކުން ނިއު ޕޮލިސީ އިނީޝިއޭޓިވްސް އެކުލަވާލުމުގައި މިންތީގެ ހަމަހަމަކަމަށާއި ތިމާވެއްޓަށް ކުރާނެ އަސަރު ދެނެގަނެ، މި ކަންކަމުގެ ތެރެއިން މިންތީގެ ހަމަހަމަކަން އިތުރުކޮށް ތިމާވެށި ހިމާޔަތްކުރަން މަސައްކަތްކުރުމަށް ފިނޭންސް މިނިސްޓްރީން އަންގާފައިވެ އެވެ.
ހަރަދުތައް ހަމަޖެއްސުމާއި އާމްދަނީ އިތުރުކުރުން
އަލަށް ހުށައަޅާ ކަންކަމުގެ ތެރޭގައި ސަރުކާރު އޮފީސްތަކުގެ ހަރަދުތައް ހަމަޖައްސައި، އެ އޮފީހެއްގެ ދާއިރާގެ ތެރެއިން އާމްދަނީ އިތުރުކުރާނެ ގޮތްތައް ހުށައަޅަން ޖެހެ އެވެ. އަދި މިހެން ހުށައަޅާއިރު، ހަރަދުތައް ކުޑަކުރުމަށް އާމްދަނީ ޕޮލިސީއަށް ގެންނަން ހުށައަޅާ ބަދަލުތައް ހިމެނުމަށް ވެސް ފިނޭންސުން އެދިފައިވެ އެވެ.
އިއުލާނުގައިވާ ގޮތުން، ކުރިޔަށް އޮތް ދެ އަހަރަށް ލަފާކުރާ މެދުރާސްތާގެ ބަޖެޓުގެ ނިއު ޕޮލިސީ އިނީޝިއޭޓިވްސް އަދި އާމްދަނީ އިތުރުކުރެވޭނެ ގޮތްތައް ޖުލައި މަހުގެ ނިޔަލަށް ހުށައަޅަން ޖެހެ އެވެ.
ސަރުކާރު އޮފީސްތަކުން ހުށައަޅާ ނިއު ޕޮލިސީ އިނީޝިއޭޓިވްސްގެ ތެރެއިން ބަޖެޓުގައި ހިމަނާނެ ކަަންކަން ނިންމާނީ ފިނޭންސް މިނިސްޓްރީ އާއި ރައީސް އޮފީހުންނެވެ.
ފިނޭންސުން އާންމުކުރި ތާވަލަށް ބަލާއިރު، އަލަށް ހުށައަޅާ ޕްރޮގްރާމްތަކާއި ޕްރޮޖެކްޓްތައް ފިނޭންސް މިނިސްޓްރީން އިވެލުއޭޓް ކުރުމަށްފަހު ވަޒީރުންގެ މަޖިލީހަށް ހުށައަޅާނީ 31 ޖުލައިގެ ކުރިންނެވެ.
