ރައީސް އިބްރާހިމް މުހައްމަދު ސޯލިހްގެ އަނބިކަނބަލުން ފަޒްނާ އަހުމަދު ކޮވިޑަށް ޕޮޒިޓިވްވެއްޖެ އެވެ.
ފަސްޓް ލޭޑީ ބައްޔަށް ޕޮޒިޓިވްވުމުން ރައީސް ވެސް ވަނީ ކޮވިޑް ޓެސްޓް ހައްދަވައިފަ އެވެ. އެމަނިކުފާނުގެ ނަތީޖާ ނެގެޓިވް ކަމަށް ރައީސް އޮފީހުން ބުންޏެވެ.
މުލިއާގޭގައި ދިރިއުޅުއްވާ ފަޒްނާ މިހާރު ހުންނެވީ އާއިލާއާ އެކަހެރިވެވަޑައިގެންނެވެ. ރައީސް އޮފީހުން ބުނި ގޮތުގައި އެކަމަނާގެ ހާލު ރަނގަޅެވެ.
ރައީސްގެ އިތުރުން ދަރިކަނބަލުންނާއި ދަރިކަލުން ވެސް ޓެސްޓް ކުރެއްވި އެވެ. ދެ ބޭފުޅުންގެ ނަތީޖާ ވެސް ނެެގެޓިވް އެވެ.
ރައީސް އާއި އަނބިކަނބަލުން ފަޒްނާ ދާދި ފަހުން ރަސްމީ ދަތުރުފުޅެއްގައި، ގަތަރާއި ބަންގްލަދޭޝްއަށް ވަޑައިގަތެވެ. އެ ދަތުރުފުޅަށް ފަހު ހޯމް ކަރަންޓީން ފުރިހަމަކުރައްވައި ދެ ބޭފުޅުން ޓެސްޓް ކުރެއްވި އިރު ނަތީޖާ ނެގެޓިވް އެވެ.
ކޮވިޑުން ރައްކާތެރިވާން ކޮވިޝީލްޑް ވެކްސިންގެ ދެ ވަނަ ޑޯޒް ދެ ބޭފުޅުން ވެސް ފުރިހަމަކުރެއްވީ އެ ދަތުރުފުޅަށް ފަހު ރާއްޖޭގަ އެވެ.
ފަސްޓް ލޭޑީ ކޮވިޑަށް ޕޮޒިޓިވްވިއިރު އެކަމަނާގެ ކޮއްކޯފުޅު، ނަޒީހާ އަހުމަދާއި އޭނާގެ ފިރިކަލުން، ކޮމިޝަނާ އޮފް ޕޮލިސް މުހައްމަދު ހަމީދު ވެސް ވަނީ ކޮވިޑަށް ޕޮޒިޓިވްވެފަ އެވެ. ހަމީދު ވެސް ޕޮޒިޓިވް ވީ ވެކްސިންގެ ދެ ވަނަ ޑޯޒް ފުރިހަމަ ކުރެއްވި ފަހުންނެވެ.
ސިއްހީ މާހިރުން ވިދާޅުވާ ގޮތުގައި، ވެކްސިނުން އެންމެ ރަނގަޅަށް ރައްކާތެރިކަން ލިބޭނީ ދެ ޑޯޒު ފުރިހަމަވުމުންނެވެ. ވެކްސިންގެ ފުރަތަމަ ޑޯޒުން ހަށިގަނޑުގައި ރައްކާތެރިކަން އުފައްދަން ފަށަން ދެ ހަފްތާ ނަގާ ކަމާއި އެންމެ ރަނގަޅަށް ދިފާއު ލިބެނީ ދެވަނަ ޑޯޒަށް ދެ ހަފްތާ ފަހުން ކަމަށް އެ ބޭފުޅުން ވިދާޅުވެ އެވެ.
