ކޮވިޑް-19 ޖެހޭ މީހުންގެ އަދަދު ބަދަލުނުވެ، މާލެ އާއި މުޅި ރާއްޖޭގައި ބަލިޖެހޭ މިންވަރު ކުރިއެކޭ އެއްފަދައިން އިތުރުވަމުންދާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ހިސާބުތަކުން ދައްކައިފި އެވެ.
މިމަހުގެ 10 ވަނަ ދުވަހުން ފަށައިގެން ކޮވިޑް-19 ޖެހޭ މީހުންގެ ސީދާ އަދަދު ދަށްވަމުންދާ ކަމަށް އެޗްޕީއޭގެ ފަރާތުން އާންމު ކުރާ ނަންބަރުތަކުން ދައްކަ އެވެ. އެގޮތުން މި މަހުގެ 10 އިން ފެށިގެން ބަލި ޖެހޭ މީހުންގެ އަދަދު އުޅެނީ 100 އިން ދަށުގަ އެވެ.
އެކަމަކު ބަލިޖެހޭ މީހުންގެ އަދަދު ދަށްވެފައި މި ވަނީ ބައްޔަށް ޓެސްޓު ކުރާ މިންވަރު ވެސް ދަށްވެފައި އޮއްވަ އެވެ.
އަދި ހިސާބުތަކުން ދައްކަނީ ބަލި ޖެހޭ މީހުންގެ އަދަދު ދަށް ނަމަވެސް އިންސައްތަ ގިނަ ކަމަށެވެ.
މީގެ ހަފްތާއެއް ކުރިއަށް ޖެހިލައި މަހުގެ ހަތް ވަނަ ދުވަހުން ފެށިގެން ހިސާބުތަކަށް ބަލާއިރު މުޅި ރާއްޖެއިން އެއް ދުވަހުން ބަލި ޖެހުނު މީހުންގެ އަދަދު 100 ހުރަސްކޮށްފައިވަނީ ނުވަ ވަނަ ދުވަހެވެ.
އެ ދުވަހު މާލެއިން ޖެހުނީ އެންމެ 56 މީހުންނަށެވެ. އެހެންކަމުން ބަލިޖެހިފައި ހުރީ ޓެސްޓު ކުރި މީހުންގެ ތެރެެއިން ހަތަރު ޕަސެންޓު މީހުންނަށެވެ.
އޭގެ ފަހުން ވިދިވިދިގެން މި އައި ފަސް ދުވަހު ވެސް ކޮވިޑް-19 ކޭސްތައް އުޅެނީ 100 އިން ދަށުގަ އެވެ. ނަމަވެސް ޕަސެންޓޭޖަށް ބަލާއިރު ބަލިޖެހޭ މީހުން ނިސްބަތުން ދަށެއް ނޫނެެވެ. އެގޮތުން އިއްޔެގެ އަދަދުތަކަށް ބަލާއިރު ވެސް ޓެސްޓު ކުރި މީހުންގެ ތެރެއިން ތިން ޕަސެންޓު މީހުންނަށް ހުރީ ބަލި ޖެހިފަ އެވެ.
އެޗްޕީއޭގެ ހިސާބުތަކަށް ބަލާއިރު މާލޭ ސަރަހައްދުން 85 އަށް ވުރެ މަދުން ބަލިޖެހޭ މީހުންގެ އަދަދުތައް ހުންނަތާ ނުވަ ދުވަސް ވަނީ ވެފަ އެވެ. އިއްޔެ ވެސް މާލެ ސަރަހައްދުން ބަލިޖެހިފައި ހުއްޓާ ފެނުނީ އެންމެ 39 މީހަކަށެވެ.
މި މަހުގެ 10 ވަނަ ދުވަހުން ފެށިގެން އެޗްޕީއޭގެ ފަރާތުން ކޮވިޑް-19 އަށް ޓެސްޓުކޮށްފައި ވަނީ އެވްރެޖުކޮށް 2600 ވަރަކަށް މީހުންނެވެ. ކުރިން މިއަދަދު އުޅެނީ 3000-4000 ގަ އެވެ.
މިދިޔަ އަހަރު ރާއްޖޭގެ މީހަކަށް ކޮވިޑް-19 ޖެހުނު ފަހުން 25،844 މީހުންނަށް އެ ބަލި ވަނީ ޖެހިފަ އެވެ. އޭގެ ތެރެއިން 67 މީހަކު ވަނީ މަރުވެފަ އެވެ. މިހާރު ވެސް ބައްޔާއެކު 2636 މީހަކު އުޅެމުން އެބަ ދެ އެވެ.
