ކޮވިޑް-19 ވެކްސިން ޖެއްސެވުމަށް ކުރީގެ ރައީސް އަބްދުﷲ ޔާމީން އިންކާރު ކުރައްވައިފި ކަމަށް މޯލްޑިވްސް ކަރެކްޝަނަލް ސާވިސް އިން މިރޭ ބުނެފި އެވެ.
"އަދަދު" އަށް މައުލޫމާތު ދެމުން ކަރެކްޝަންސްގެ މީޑީއާ އޮފިޝަލަކު ބުނީ މާފުށީ ޖަލުގައި ފަސް އަހަރުގެ ހުކުމެއް ތަންފީޒު ކުރައްވަމުން ގެންދަވާ ރައީސް ޔާމީން މިރޭ މާލެ ގެނައީ އެމަނިކުފާނުގެ އިޒުނައާ ވެސް އެކުގައި ކަމަށެވެ.
"ރައީސް އަބްދުﷲ ޔާމީން އައިޖީއެމްއެޗަށް މިރޭ ގެނައީ ކޮވިޑް ވެކްސިން ޖެހުމަށް. އެކަން އެމަނިކުފާނަށް ވެސް އެނގިވަޑައިގަންނަވާ. އެކަމަކު ހޮސްޕިޓަލަށް ގެނައި ފަހުން ވެކްސިން ޖައްސަވަން ބޭނުންފުޅު ނުވީ," އޭނާ ވިދާޅުވި އެވެ.
ރައީސް ޔާމީން ވެކްސިން ޖެއްސެވުމަށް އިންކާރު ކުރެއްވި ވަކި ސަބަބެއް ކަރެކްޝަންސްގެ އޮފިޝަލުން ވިދާޅެއްނުވެ އެވެ.
ވެކްސިން ޖެއްސެވުމަށް ރައީސް ޔާމީން އިންކާރު ކުރައްވާފައި މި ވަނީ އެމަނިކުފާނު ޖަލުން ގެއަށް ބަދަލު ކުރެއްވުމަށް އިދިކޮޅު ޕްރޮގްރެސިވް ކޯލިޝަން އޮފް މޯލްޑިވްސް އިން ވަރަށް ބޮޑަށް މަސައްކަތް ކުރަމުން އަންނަ ދަނޑިވަޅެއްގަ އެވެ.
"ރައީސް ޔާމީން ބަދަލުކުރަން އެބަޖެހޭ ގެ އަށް. ރައީސް ޔާމީން މިނިވަންކުރަން އެބަޖެހޭ،" ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް މިއަދުގެ ރައްޔިތުންގެ މަޖިލީހުގެ ޖަލްސާގައި ވިދާޅުވެފައިވެ އެވެ.
ރައީސް ޔާމީން މި ރޯދަ މަހު ގެއަށް ބަދަލުކޮށްދެއްވުން އެމަނިކުފާނުގެ އަނބިކަނބަލުން ފާތިމަތު އިބްރާހިމް ވެސް ވަނީ ސިޓީއަކުން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހުގައި އެދިވަޑައިގެންފަ އެވެ.
"އިރާދަކުރެއްވިއްޔާ ދެރަގޮތެއް ރައީސް ޔާމީނަކަށް ނުވާނެ،" ހޯމަ ދުވަހު ބޭއްވި ނޫސްވެރިންގެ ބައްދަލުވުމެއްގައި ސިޓީއަށް އިޝާރާތް ކުރައްވަމުން ރައީސް ސޯލިހު ވިދާޅުވި އެވެ.
ރައީސް ޔާމީން މާފުށީ ޖަލުގައި އެ ހުންނަވަނީ އެމްއެމްޕީއާރްސީގެ ފައިސާ އެމަނިކުފާނުގެ އެކައުންޓަކަށް ޖަމާކޮށްފައިވާ މައްސަލައެއްގައި މަނީ ލޯންޑަރިންގެ ކުށް ސާބިތުވެ ނޮވެމްބަރު 8، 2019 ގައި، ފަސް އަހަރަށް ޖަލަށްލުމަށް ކްރިމިނަލް ކޯޓުން ހުކުމް ކުރި ދުވަހުން ފެށިގެނެވެ.
ވެކްސިންގެ ފުރަތަމަ ޑޯޒު ޖަހާ މީހުނަށް ހެލްތު ޕްރޮޓެކްޝަން އެޖެންސީ އިން މިހާރު ދެމުން ގެންދަނީ ޗައިނާއިން ހަދިޔާކޮށްފައިވާ ސައިނޮފާމް ވެކްސިނެވެ.
