މި ސަރުކާރުން ކުރުން ލަސްވާ ކަންކަމުގައި، މިއީ ސީދާ އެމްޑީޕީގެ ސަރުކާރެއް ނޫން ކަމަށް ބުނެ އެކަމުގެ ޒިންމާ ސަރުކާރު ހިންގާ ކޯލިޝަނަށް އަމާޒުކުރަން އެމްޑީޕީގެ އިސްވެރިން މަސައްކަތް ކުރައްވާތީ، އެކަމަށް އިދިކޮޅުން މިއަދު ފާޑުކިޔައިފި އެވެ.
އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު އިސްވެ، ސަރުކާރު ކޯލިޝަންގައި ހިމެނޭ އަދާލަތު ޕާޓީ އާއި، ޖުމްހޫރީ ޕާޓީގެ އިތުރުން އެމްއާރުއެމްއަށް އެކި ފަހަރު މަތިން ގެންދަވަނީ ފާޑުވިދާޅުވަމުންނެވެ.
ދާދި ފަހުން، ސަރުކާރުގެ ބޯހިޔާވަހިކަމުގެ ވައުދުތައް ފުއްދަން ލަސްވީ، އޭރު ހައުސިން މިނިސްޓްރީ އެމްއާރުއެމްގެ މިނިސްޓަރަކާ ހަވާލުކުރެވިފައި އޮތުމުންކަމަށް ނަޝީދު ވަނީ ތުހުމަތު ކުރައްވައިފަ އެވެ.
ޓްރާންސްޕޯޓް އޮތޯރިޓީ އުވާލަން ސަރުކާރުން ހުށަހަޅާފައިވާއިރު، އެކަމާ ގުޅިގެން ރޯޑް ސޭފްޓީ ކައުންސިލުގައި އެ އޮތޯރިޓީ ކަނޑައަޅާ ފަރާތެއް އިންނާތީ އެކަން އިސްލާހު ކުރުމަށް ސަރުކާރުގެ ފަރާތުން ހުށަހެޅި ބިލަށް މިއަދުގެ ޖަލްސާގައި ކުރިއަށް ދިޔަ ބަހުސްގައި، ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވީ ޓްރާންސްޕޯޓް އޮތޯރިޓީ އުވާލައިގެން އެތަނުގައި ހުރި މައްސަލަތައް ހައްލުނުވާނެ ކަމަށެވެ.
އިދިކޮޅު ޕީޕީއެމްގެ ނައިބު ރައީސްކަން ވެސް ކުރައްވައި ޝިޔާމް ވިދާޅުވީ، ވެރިކަމަށް އައުމުގެ ކުރިން ދަތުރުފަތުރުގެ ނިޒާމު ހަރުދަނާ ކުރުމަށް އެމްޑީޕީން ގެންގުޅުނު ސިޔާސަތު ރަނގަޅު ކަމަށެވެ.
ނައިފަރު ދާއިރާގެ މެމްބަރު އަހުމަދު ޝިޔާމް މަޖިލީހުގެ ޖަލްސާއެއްގައި ވާހަކަ ދައްކަވަނީ. -- ފޮޓޯ: މަޖިލިސް
ނަމަވެސް، ސަރުކާރު އެކުލެވިގެން އައިއިރު، އެ ސިޔާސަތުތައް ތަންފީޒު ކުރަން ހަވާލުކުރެވުނީ އެ ސިޔާސަތުތައް ނޭނގޭ ބަޔަކާކަން، ކޯލިޝަން ޕާޓީތަކަށް އިޝާރާތް ކުރައްވައި ޝިޔާމް ވިދާޅުވި އެވެ.
މިގޮތުން، ވަޒީރުންނަށް ޒިންމާ އަދާނުކުރެވުމުން، އެފަދަ ވަޒީރުން މަގާމުން ދުރުކޮށް ކަންކަން ރަނގަޅު ކުރުމުގެ ފުރުސަތު ރައްޔިތުންގެ މަޖިލީހަށް އޮންނާނެ ކަމަށެވެ.
އަދި މަޖިލީހުގެ ސާފު އަގުލަބިއްޔަތު ރައްޔިތުން އެމްޑީޕީއަށް ދިނީ އެ މަގުސަދުގައި ކަން ޝިޔާމް ފާހަގަކުރެއްވި އެވެ.
"ރައްޔިތުންނަށް މި ތަނަކަށް [މަޖިލީހަށް] ނުވަދެވޭނެ، ނާގާބިލު ވަޒީރުން ވަކި ކުރާކަށް. ނާގާބިލު މެނޭޖިންގް ޑިރެކްޓަރުން ވަކި ކުރާކަށް ނުވަދެވޭނެ," ޝިޔާމް ވިދާޅުވި އެވެ.
އެހެންވީމާ، ޓީވީތަކާއި ޕޯޑިއަމްތަކަށް އަރައި، މިއީ އެމްޑީޕީގެ ސަރުކާރެއް ނޫނޭ ބުނެވޭކަށް ނޯންނާނެކަމަށް އޭނާ ތަކުރާރުކޮށް ވިދާޅުވި އެވެ.
"މިއީ އެމްޑީޕީގެ ވެރިކަމެއް. އެމްޑީޕީއަށް ރައްޔިތުން ވޯޓު ދިނީ. ތިލަފަތަށް ރައްޔިތުން ވޯޓު ދިނީ،" ޝިޔާމް ވިދާޅުވި އެވެ.
