ހަމަނުޖެހުން ދިފާއުކުރަން ދެ ޕާޓީގެ ބަހަނާ ވެސް ދޮގު ކޮށްފި

ހަމަނުޖެހުން ދިފާއުކުރަން ދެ ޕާޓީގެ ބަހަނާ ވެސް ދޮގު ކޮށްފި

މިދިޔަ ހޮނިހިރު ދުވަހު ބޭއްވި ލޯކަލް ކައުންސިލް އިންތިހާބުގެ ވަގުތީ ނަތީޖާ ކަށަވަރުނުވާ 18 ވޯޓު ފޮއްޓެއް އަލުން ގުނަން އުޅުމުން، އިލެކްޝަންސް ކޮމިޝަން (އީސީ)ގެ އިންތިހާބީ މަރުކަޒުގެ ތެރޭގައި އިދިކޮޅާއި، ވެރިކަން ކުރާ މައި ޕާޓީ، އެމްޑީޕީގެ ސަޕޯޓަރުންނާ ދެމެދު ހިނގި ހަމަނުޖެހުންތައް ދިފާއުކުރަން ދެ ޕާޓީން ވެސް ދެއްކި ބަހަނާތައް އިލެކްޝަންސް ކޮމިޝަން (އީސީ)އިން މިއަދު ދޮގުކޮށްފި އެވެ.

މިއަދު މެންދުރު 1:30 ގައި 18 ފޮއްޓެއް އަލުން ގުނަން ހަމަޖައްސައި، އެ ފޮށިތަކާ ގުޅުންހުރި ކެންޑިޑޭޓުންނަށް އިލެކްޝަންސް ކޮމިޝަން (އީސީ)އިން ދައުވަތު ދިނެވެ.

އެ ވަގުތާ ދިމާކޮށް އިދިކޮޅާއި އެމްޑީޕީގެ ބައެއް މެމްބަރުން ވަނީ އިންތިހާބީ މަރުކަޒަށް އެއްވެފަ އެވެ.

ނަމަވެސް، މައުލޫމާތު ލިބޭ ގޮތުގައި، މަރުކަޒުގެ ތެރޭގައި ހޫނުވީ، އެ ސަރަހައްދަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވަޑައިގެންނެވި ހިސާބުންނެވެ.

ނަޝީދު ވަޑައިގެންނެވުމާއެކު، އެއްވެ ތިބި އިދިކޮޅު ސަޕޯޓަރުން ވަނީ އެމްޑީޕީން ނަތީޖާ އޮޅުވާލަން މަސައްކަތް ކުރާ ކަމަށް ބުނެ އަޑުގަދަކޮށް، ނަޝީދު އެ މަރުކަޒުން ނެރުމަށް ގޮވާލައިފަ އެވެ.

އެއާއެކު، ފުލުހުން ވެސް އެ ސަރަހައްދަށް ގޮސް، ހަމަނުޖެހުން ކޮންޓްރޯލްކުރަން ޕެޕާ ސްޕްރޭގެ ބޭނުންވެސް ވަނީ ކޮށްފަ އެވެ.

އެ ހަމަނުޖެހުމާ ގުޅިގެން އެމްޑީޕީން ބުނީ، ވޯޓު ގުނުމުގެ މަސައްކަތް ހިނގަމުން ދަނިކޮށް އެތަނަށް ޕީޕީއެމްގެ އިސްވެރިންނާއި ޕީއެންސީގެ ރައީސް ގޮސް އީސީގެ މުވައްޒަފުންގެ މަސައްކަތް ކުރިޔަ ނުދީ ހުރަސްއަޅާފައިވާ ކަމަށެވެ.

އަދި އިދިކޮޅު ސަޕޯޓަރުން ހަމަނުޖެހުން ހިންގައި މާރާމާރީ ހިންގާފައިވާކަމަށް ބުންޏެވެ.

އޭގެ ރައްދުގައި އިދިކޮޅުން ބުނަނީ، ހަމަނުޖެހުން ހިނގަން މެދުވެރިވީ، ވޯޓު ގުނުމަށް ނުފޫޒު ފޯރުވަން ނަޝީދުގެ އިތުރުން އެމްޑީޕީގެ އިސްވެރިން މަސައްކަތް ކުރުމުން ކަމަށެވެ.

ނަމަވެސް، އީސީން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ކޮމިޝަނުގެ ރައީސް އަހުމަދު ޝަރީފް ވަނީ ކަން ހިނގައިދިޔަ ގޮތް ސާފުކޮށް ދެއްވައިފަ އެވެ.

ޝަރީފް ވިދާޅުވީ އެ ފޮށިތައް ގުނަން މިއަދު އުޅުނީ، އެ ފޮށިތަކުގެ ނަތީޖާ ޝީޓުތަކުގައި ލިޔެފައިވާ ބައެއް އަދަދުތައް ދިމާނުވާތީ ކަމަށެވެ.

"މިއަދު ބޭއްވި އެކްސައިޒަކީ ބައެއް ނަތީޖާ ޝީޓު ފުރިފައިހުރި ގޮތުން، ސާފު ނުވާ ނަތީޖާތަކެއް ހުރީމަ. ނަތީޖާތައް ސާފުކުރުމަށްޓަކައި ސެކިޔުރިޓީ އުރަ ކަނޑަން އުޅުނީ އެ ފޮއްޓެއްގެ މަސްލަހަތު ހިމެނޭ މީހުންނަށް ދައުވަތުދީގެން،" ޝަރީފް ވިދާޅުވި އެވެ.

އަދި އެކަމަށް އިންތިހާބީ މަރުކަޒަށް ވަޑައިގެންނެވިއިރު، އެތަނުގައި ޕީޕީއެމްގެ ބައެއް އިސްވެރިން ތިއްބެވުމުން، މިއަދު ފޮށިތައް ގުނަން އުޅޭ ސަބަބު ސާފުކޮށް ދެއްވި ކަމަށެވެ.

އިދިކޮޅު ބޭފުޅުން އެތަނުން އެނބުރި ވަޑައިގަންނަވަން އުޅެނިކޮށް، ނަޝީދު އާއެކު އެމްޑީޕީގެ ބައެއް އިސް ބޭފުޅުން މަރުކަޒަށް ވަޑައިގެންނެވުމާއެކު، މައްސަލަ ހޫނުވެގެން ދިޔައީކަމަށް ޝަރީފް ވިދާޅުވި އެވެ.

ޕާޓީތަކުން ތުހުމަތުކުރި ނަމަވެސް، ހަމަނުޖެހުން ހިނގަން މެދުވެރިވީ، ވޯޓު ފޮށި ކަނޑާ ތަނަށް އޭގެ ތެރެއިން އެއްވެސް ބޭފުޅަކު ވަންނަވައިގެން ނޫން ކަމަށް އޭނާ ތަކުރާރުކޮށް ވިދާޅުވި އެވެ.

"އެއީ ހަމަ ކަނޑައެޅިގެން ދޮގެއް. ދެން ޕާޓީތަކުން ވާހަކަ ދައްކާނީ އެ ޕާޓީއެއްގެ މަސްލަހަތު ހިމާޔަތްވާ ގޮތަށް،" ޝަރީފް ވިދާޅުވި އެވެ.

އެއްވެސް ފަރާތެއްގެ ނުފޫޒެއް ނެތް

މި އިންތިހާބުގެ ނަތީޖާއަށް ނުފޫޒު ފޯރުވަން މަސައްކަތް ކުރާކަމަށް ކުރެވޭ ތުހުމަތުތަކަށްވެސް ޝަރީފް މިއަދު ވަނީ ޖަވާބު ދެއްވައިފަ އެވެ.

މިގޮތުން، މި އިންތިހާބާ ގުޅޭ އެއްވެސް ކަމެއްގައި، އިދިކޮޅުގެ އިތުރުން ސަރުކާރުގެ އެއްވެސް ބޭފުޅަކާވެސް ބައްދަލުކުރައްވާފައި ނުވާނެ ކަމަށް ވިދާޅުވި އެވެ.

ޝަރީފް
ޝަރީފް

އީސީގެ ރައީސް އަހުމަދު ޝަރީފް މިއަދު ނޫސްވެރިންނަށް މައުލޫމާތު ދެއްވަނީ. -- ފޮޓޯ: ހުސެއިން ވަހީދު/އަދަދު

"އަޅުގަނޑުމެން އެއްވެސް މީހަކަށް އެއްވެސް ފަރާތެއްގެ ނުފޫޒެއް ނެތް. އެއީ ސަރުކާރު ވިޔަސް، އިދިކޮޅު ކަމަށް ވިޔަސް، އެއްވެސް ފަރާތަކުން ނުފޫޒު ފޯރުވައި ވަކި ގޮތަކަށް ކަމެއް ކުރުވަން ނޫޅެ،" ޝަރީފް ވިދާޅުވި އެވެ.

ޝަރީފް ވިދާޅުވި ގޮތުގައި، މިއަދާ ހަމައަށް ކައުންސިލް އިންތިހާބާ ގުޅިގެން 89 ޝަކުވާ ލިބިފައިވާ ކަމަށެވެ.

އޭގެ ތެރޭގައި އާދަޔާ ހިލާފަށް ބާތިލު ވޯޓު ގިނަވުމާއި، ކައުންޓާ ފޮއިލް ދިމާނުވުމާއި، ވާދަކުރާ ކެންޑިޑޭޓުންގެ ފަރަގު ކުޑަވުންފަދަ ޝަކުވާތައް ހިމެނޭކަމަށް ވިދާޅުވި އެވެ.

އަދި އޭގެ އިތުރުން، ސިޔާސީ ޕާޓީތަކުން މިހާތަނަށް 21 ޝަކުވާއެއް ލިބިފައިވާކަމަށް ޝަރީފް ހާމަކުރެއްވި އެވެ.

ނަމަވެސް، މި މަރުހަލާގައި އޭގެ ތެރެއިން އެއްވެސް ޝަކުވާއެއް ނުބަލާނެ ކަމަށާއި، އަދި ދާއިމީ ނަތީޖާ އިއުލާނުކުރުމުގެ ކުރިން، އެ ޝަކުވާތަކަށް ރިއާއަތްކޮށް، އެއްވެސް ފޮއްޓެއް އަލުން ގުނާނީ ސީދާ ނަތީޖާއަށް ބަދަލު އަންނަ ފަދަ ކަމެއް ފާހަގަވެއްޖެ ނަމަ އެވެ.

ކޮމެންޓް

ފަހުގެ ޚަބަރު

ލޯ ޑިގްރީ އިމްތިހާނަށް މާލެ އަންނާކަށް ނުޖެހޭނެ: ބާ ކައުންސިލް

ލޯ ޑިގްރީގެ އިމްތިހާނުތައް ހެދުމަށް މާލެއަށް ނުވަތަ ވަކި ހާއްސަ ރަށަކަށް ހާޒިރުވުން ލާޒިމު ނޫން ކަމަށާއި، ދަރިވަރުން ދިރިއުޅޭ ރަށެއްގެ ސްކޫލް ނުވަތަ ކައުންސިލް މެދުވެރިކޮށް އިމްތިހާނު ހެދޭނެ މަގު ބާ ކައުންސިލުން ފަހިކޮށްދީފިއެވެ. އަންނަ އަހަރުން ފެށިގެން އަމަލުކުރާ މި އުސޫލުގެ ދަށުން އިމްތިހާނު ހަދާ ގޮތަށް ބަދަލު އައި ނަމަވެސް، ކޯހުގެ މަންހަޖާއި ކިޔަވައިދޭ މުއްދަތަށް އެއްވެސް ބަދަލެއް ނާންނާނެއެވެ.

ތަރައްގީގެ އެއްވެސް ކަމެއް ކުރުމަށް ލާރިއެއް ނެތް: ޝާކިރު

އަންނަ އަހަރުގެ ބަޖެޓުގައި ރިކަރަންޓް ހަރަދަށް ކެނޑުމަށްފަހު ތަރައްގީގެ މަޝްރޫއުތަކަށް ފައިސާ ނެތް ކަމަށް ވިދާޅުވެ މެންބަރު އަހުމަދު ޝާކިރު ކަންބޮޑުވުން ފާޅުކުރައްވައިފިއެވެ. އޭނާ ވިދާޅުވީ ދައުލަތުގެ އާމްދަނީގެ ބޮޑުބައެއް ހަރަދުވަނީ ރިކަރަންޓް ކަންކަމަށް ކަމަށާއި، މަޝްރޫއުތައް ހިންގަން ޖެހެނީ އިތުރަށް ދަރަނި ނަގައިގެން ކަމަށެވެ. މީގެ އިތުރުން ސަރުކާރު ކުންފުނިތަކުން ބޮޑެތި ގެއްލުންވަމުންދާ ދިއުމަށްވެސް އޭނާ ވަނީ ފާޑުވިދާޅުވެފައެވެ.

"ސިޓިޒަންސް ކޮމްޕްލެއިންޓްސް" ލައުންޖުތަކެއް ގާއިމުކޮށްފި

ރައްޔިތުންގެ ޝަކުވާތަކާއި ކަންބޮޑުވުންތައް ސަރުކާރަށް ހުށަހެޅުމަށްޓަކައި މާލެ އާއި ހުޅުމާލޭގައި "ސިޓިޒަންސް ކޮމްޕްލެއިންޓްސް" ބިއުރޯގެ ދެ ލައުންޖެއް މިއަދު ވަނީ ހުޅުވައިފައެވެ. ސަރުކާރު ބަންދު ނޫން ކޮންމެ ދުވަހަކު ޚިދުމަތް ދޭ މި އޮފީސްތަކަކީ ރައީސުލްޖުމްހޫރިއްޔާގެ އޮފީހުގެ ދަށުން ހިންގާ، ރައްޔިތުންގެ މައްސަލަތަކަށް ހައްލު ހޯދައިދިނުމަށް ގާއިމުކުރި ތަންތަނެވެ.

ރިއަލް އެސްޓޭޓު ބިލު މަޖިލީހަށް ބަލައިގަނެފި

މި ބިލު ބަލައިގަންނަން ވޯޓު ދިނީ 42 މެންބަރުން. ބިލާ ދެކޮޅަށް ވޯޓު ދެއްވީ އެމްޑީޕީގެ 13 މެންބަރުން. މި ބިލު ދިރާސާކުރާނީ ގައުމީ ތަރައްގީ އާއި ތަރިކައިގެ ކޮމިޓީން. މިއީ ގާނޫނުއަސާސީގެ ހިމާޔަތްތައް ނައްތާލައި، ތާއަބަދަށް ނުވަތަ ހުސްނުވާ ގޮތަށް ބޭރު މީހުންނަށް ބިން މިލްކުކުރެވޭނެ ގޮތް ހެދުމަށް އިންތިޒާމުތަކެއް ހިމަނާފައިވާ ބިލެއް

ބޮޑެތި ޖޫރިމަނާތަކެއް ހިމަނާފައިވާ އަބުރުގެ ބިލު ކޮމިޓީއަށް

ސޯޝަލް މީޑިއާގައި މީހެއްގެ އަބުރާ ބެހޭ ފަދަ ޕޯސްޓެއް ހިއްސާކޮށްފިނަމަ 5 ލައްކަ ރުފިޔާއާ ހަމައަށް ޖޫރިމަނާ ކުރެވޭ ގޮތަށް ހުށަހެޅި އަބުރުގެ ބިލު މަޖިލީހަށް ބަލައިގަނެ ކޮމިޓީއަށް ފޮނުވައިފިއެވެ. މި ބިލުގައި ބަހާއި، ފޮޓޯއާއި، އިޝާރާތް އަދި ފިލްމު ފަދަ ވަސީލަތްތައް މެދުވެރިކޮށް އަބުރާ ބެހުމުގެ ދައުވާ ކުރެވޭނެ ގޮތްތައް ބަޔާންކޮށްފައިވެއެވެ.

މަރުގެ އަދަބު ތަންފީޒު ކުރާ ބިލު ބަލައިގެންފި

ދަންޖައްސައިގެން މަރުގެ އަދަބު ތަންފީޒުކުރާ ގޮތަށް ސަރުކާރުން ހުށަހެޅި ބިލު ރައްޔިތުންގެ މަޖިލީހަށް މިއަދު ބަލައިގެންފިއެވެ. މި ބިލުގައި މަރުގެ އަދަބު ތަންފީޒުކުރާނެ ގޮތާއި، އެކަން ހިންގާނެ ޕެނަލެއް އެކުލަވާލުމުގެ އިތުރުން، ބަލިވެއިނުމާއި ދަރިފުޅަށް ދެ އަހަރު ފުރުން ފަދަ އަދަބު ތަންފީޒުނުކުރެވޭނެ ހާލަތްތައް ބަޔާންކޮށްފައިވެއެވެ.

ތިން ކުންފުންޏެއްގެ މަނީ އެކްސްޗޭންޖު ލައިސަންސް ބާތިލްކޮށްފި

މަނީ ޗޭންޖިން ގަވާއިދާ ތަކުރާރުކޮށް ހިލާފުވި ތިން ކުންފުންޏެއްގެ ލައިސަންސް އެމްއެމްއޭ އިން ބާތިލުކޮށް، އެ ކުންފުނިތައް ބޮޑެތި އަދަދުތަކުން ޖޫރިމަނާކޮށްފިއެވެ. މި ފިޔަވަޅަކީ ބޭރު ފައިސާގެ ބާޒާރު ކޮންޓްރޯލްކޮށް، ގަވާއިދާ ހިލާފު މުއާމަލާތްތައް ހުއްޓުވުމަށް އެމްއެމްއޭ އިން ކުރަމުންދާ މަސައްކަތުގެ ތެރެއިން އެޅި ފިޔަވަޅެކެވެ.

Newsletter

Get the latest news delivered straight to your inbox