މިޔަންމާގެ އަސްކަރިއްޔާއިން އާއްމުންނަށް ހަމަލާ ދެނީ އަނިޔާވާ މީހުންނަށް އެހީވާ ޑޮކްޓަރުންނާއި ނަރުހުންނަށް ބިރު ދައްކާ ހައްޔަރު ކުރުމަށް ކަމަށް އެ މީހުން ބުނެފި އެވެ.
އެގޮތުން އެއްވެސް ސަބަބެއް ނެތި މީހުންގެ ގަޔަށް ބަޑި ޖެހުމަށް ފަހު، ޑޮކްޓަރުން އެހީވާން އާދޭތޯ ބަލަން ދުރުގައި ފިލައި ސިފައިން ތިބޭ ކަމަށް އެ ގައުމުގެ މީހުންނާ ހަވާލަދީ ދަ ގާޑިއަން ނޫހުގައި ވެއެވެ.
އެފަދަ އެއް ހާދިސާގައި ދެމަފިރިއެއްގެ ގަޔަށް ބަޑި ޖެހުމަށް ފަހު ސިފައިން ފިލައި ތިބި ކަން އެނގުމުން ޑޮކްޓަރުންނަށް އެމީހުންނަށް އެހީވާން ނުދެވުނެވެ.
ފިލައި ތިބި ސިފައިން އެ ސަރަހައްދުން ދިޔެއީ ގަޑިއިރެއް ކޮށްފަ އެވެ. ސިފައިން ދިޔުމާއެކު ޑޮކްޓަރުން ގޮސް އެހީވާން ބެލިއިރު، އަންހެން މީހާ އޮތީ މަރުވެފަ އެވެ.
"އޭނާގެ ގަޔަށް ބަޑި ޖެހި ވަގުތު ގޮސް ނަގައިގެން އަވަސް ފަރުވާދެވުން ނަމަ ފުރާނަ ސަލާމަތް ކުރެވުނީސް،" ޑޮކްޓަރަކާ ހަވާލަދީ ދަ ގާޑިއަންގައި ވެއެވެ.
ބައެއް ޑޮކްޓަރުން ދަ އޮބްޒާވާ ނޫހަށް ބުނެފައި ވަނީ ސިފައިން އާދަކޮށް ޑޮކްޓަރުންނަށް އަމާޒު ކުރާ ކަމަށާއި އަދި އަނިޔާވާ މީހުންނަށް އެހީވުން ހުއްޓުވާ ކަމަށެވެ.
އޭގެ އިތުރުން އެމްބިއުލާންސްތަކަށް ބަޑި ޖަހާ، ހޮސްޕިޓަލްތަކާއި މެޑިކަލް ސެންޓަރުތައް ލޫޓުވާ، ސިއްހީ މަސައްކަތްތެރިންނަށް ހަމަލާދޭ ކަމަށް ވެސް ބުނެފައި ވެއެވެ.
މިޔަންމާގެ އަސްކަރިއްޔާއިން ފެބްރުއަރީ އެއްވަނަ ދުވަހު ކުރި ބަގާވާތާ ގުޅިގެން އެ ގައުމުގައި މެދުކެނޑުމެއް ނެތި ކުރަމުންދާ މުޒާހަރާގައި ޑޮކްޓަރުން ވެސް ބައިވެރިވެ އެވެ.
އެ މުޒާހަރާތަކުގެ ތެރެއިން އުފެދިފައިވާ ލޭއޮހޮރުވުމުގައި މިހާތަނަށް 600 އަށް ވުރެ ގިނަ މީހުން ވަނީ މަރުވެފަ އެވެ. އޭގެ ތެރޭގައި ގިނަ އަދަދެއްގެ ކުޑަކުދިން ހިމެނެ އެވެ.
