ކެމްޕެއިން ކުރުން މަނާ ގަޑީގައި ރައީސް އިބްރާހިމް މުހައްމަދު ސޯލިހާއި މަޖިލީހުގެ ރައީސް މުހައްމަދު ނަޝީދު ކެމްޕެއިން ކުރެއްވި ކަމަށް ތުހުމަތުކޮށް އިދިކޮޅު ކޯލިޝަނުން އެ މައްސަލަ އިލެކްޝަންސް ކޮމިޝަން (އީސީ)އަށް ހުށަހަޅައިފި އެވެ.
އިންތިހާބާ ބެހޭ ގާނޫނު ބުނާ ގޮތުން އިއްޔެ އިރުއޮއްސި 6:00 ފެށިގެން ވޯޓްލުން ނިމެންދެން ކެމްޕެއިިން ކުރުމަކީ މަނާ ކަމެކެވެ.
އެކަމަކު، ރައީސް ވޯޓުލެއްވުމަށް ފަހު ނޫސްވެރިންނާ ބައްދަލު ކުރައްވާ ވާހަކަފުޅު ދައްކަވަމުން، އެމަނިކުފާނު ނިސްބަތްވާ އެމްޑީޕީއަށް މި އިންތިހާބު ކާމިޔާބު ކުރެވޭނެ ކަމަށް ވަނީ ވިދާޅުވެފަ އެވެ. އަދި ވީހާވެސް ގިނަ ބަޔަކު ވޯޓުލާން އެދިވަޑައިގަތެވެ.
ރައީސް ނަޝީދު ވެސް ވަނީ ވޯޓު ލެއްވުމަށް ފަހު ނޫސްވެރިންނާ ވާހަކަފުޅު ދައްކަވަމުން އެމްޑީޕީއަށް އިންތިހާބު ކާމިޔާބު ކުރެވޭނެ ކަމަށް ވިދާޅުވެފަ އެވެ. އަދި މާލޭގެ ގިނަ ވޯޓްލާ ސަރަހައްދުތަކަކަށް އެމަނިކުފާނު ވަޑައިގަތެވެ.
ޕީޕީއެމްއިން ބޭއްވި ނޫސްވެރިންގެ ބައްދަލުވުމެއްގައި ޕީޕީއެމްގެ ކައުންސިލް މެމްބަރު އަހުމަދު ސިއްދީގު ވިދާޅުވީ ރައީސާއި ނަޝީދު ވޯޓު ލެއްވުމަށްފަހު ނޫސްވެރިންނާ ވާހަކަފުޅު ދައްކަވަމުން ނުސީދާކޮށް ކެމްޕެއިން ކުރައްވާފައިވާ ކަމަށެވެ. އެކަން އިދިކޮޅު ކޯލިޝަނުން ކުށްވެރި ކުރާ ކަމަށެވެ.
ރައީސް ނަޝީދުގެ މައްސަލަ ޕީޕީއެމުން ވަނީ އީސީއަށް ހުށަހަޅައިފަ އެވެ. އަދި ރައީސްގެ މައްސަލަ ހުށަހެޅުމުގެ މަސައްކަތް ކުރަމުންދާ ކަމަށް އެ ޕާޓީން ބުނެ އެވެ.
ސިއްދީގު ވިދާޅުވި ގޮތުގައި، ރައީސް ނަޝީދު ވަކި ކުލައެއްގެ ގަމީހެއް ލައިގެން ވޯޓު ފޮށިތައް ކައިރިއަށް ގޮސް ނުސީދާކޮށް ކެމްޕެއިން ކޮށްފައިވާ ކަމެވެ. އަދި، ދައުލަތުގެ މީޑިއާ ބޭނުންކޮށްގެން ނުސީދާ ކެމްޕެއިން ކުރަމުންދާ ކަމަށް ވެސް އޭނާ ތުހުމަތު ކުރެއްވި އެވެ.
"ވަކި ޕާޓީއެއް ޕްރޮމޯޓް ކުރައްވަމުން އެބަ ގެންދަވާ. އެމަނިކުފާނު ވަޑައިގަންނަވާތީ އެއީ ރައްޔިތުންގެ މަޖިލީހުގެ ރައީސް ކަމުގައި ވާތީވެ ދައުލަތުގެ މީޑިއާ ދަނޑަށް ދަގެއްފާނު ދަމާހެން އެބޭފުޅާގެ ފަހަތުން އެބަ ގެންދަވާ،" ސިއްދީގު ވިދާޅުވި އެވެ.
މާފަންނު މެދު ދާއިރާގެ ވޯޓުލާ މަރުކަޒުގެ ކައިރިއަށް ވަކި ޕާޓީއެއްގެ ކުލައިގެ ގޮނޑިތަކެއް ގެންގޮސްގެން ނުސީދާ ކެމްޕެއިންތަކެއް ކޮށްފައިވާ ކަމަށް ވެސް އޭނާ ވިދާޅުވި އެވެ.
ރައްޔިތުންގެ މަޖިލީހުގެ އެމްޑީޕީގެ މެމްބަރުން ވެސް އެގޮތަށް ނުސީދާ ކެމްޕެއިން ކުރައްވާފައިވާ ކަމަށް ސިއްދީގު ވިދާޅުވި އެވެ. އެކަންކަން އީސީން ނުބަލާކަން ވެސް އޭނާ ކަންބޮޑުވުމާއެކު ފާޅު ކުރެއްވި އެވެ.
"އެއް ބަޔަކަށް މި ފުރުސަތު މި ގޮތަށް ހުޅުވާލާފައިވާއިރު އަނެއް ބަޔަކު ޝަކުވާ ކުރިޔަސް އިލެކްޝަންސް ކޮމިޝަނުން އެކަމަށް އަޅައެއް ނުލާ. އިލެކްޝަންސް ކޮމިޝަނަށް އެކަން މައްސަލައަކަށް ނުވޭ،" ސިއްދީގު ވިދާޅުވި އެވެ.
މިހާރު ކުރިއަށް ދާ ލޯކަލް ކައުންސިލްތަކުގެ އިންތިހާބަކީ މިނިވަން އިންސާފުވެރި އިންތިހާބަކަށް ވާނެ ކަމާމެދު ސުވާލު އުފެދޭ ކަމަށް ވެސް އިދިކޮޅުން ބުނެ އެވެ. ނަމަވެސް، އިލެކްޝަން ކޮމިޝަނުން ވަނީ އިންތިހާބު އިންސާފުވެރިކަމުގެ ޔަގީންކަން ދެއްވާފަ އެވެ.
