މާފަންނު ސްޓޭޑިއަމުގައި ޓެންޓް ޖަހައިގެން ހަދާފައި ހުރި ވޯޓު މަރުކަޒަށް މިއަދު ހެނދުނު އަހަރެން ވަނުމުން ފުރަތަމަ ވެސް ނޭފަތުގައި ޖެހުނީ ސެނިޓައިޒަރުގެ ވަހެވެ. އެ ވަސް އަހަރެންގެ ސިކުނޑި އަށް ބުނެދިނީ، މިއަދުގެ ވޯޓުގައި ސިއްހީ ގޮތުން ރައްކާތެރިވާން ޖެހޭ މިންވަރެވެ. ކޮވިޑުގެ ކެރިކަނޑައިގެން ނުދަނީސް އިންތިހާބު ބާއްވަން ޖެހުމަށް ކުރިމަތިވި މަޖުބޫރީ ހާލަތުގައި، ކިރިޔާ ވެސް ރައްކަލެއް އޮތީ މިއަދު ވަރަށް ބޮޑަށް ސަމާލުވެގެންނެވެ. އަބަދު އެ ގޮވަނީ އެ ވާހަކަ އެވެ.
އެކަމަކު ގިނަ މަރުކަޒުތަކުން ފެނުނީ އެ މަންޒަރެއް ނޫނެވެ. ވޯޓުލާން އެތައް ހާސް ބަޔަކު ޖަމާވެ ތިބީ އެ މަންޒަރު ފެންނާނެ ގޮތަކަށް ނޫނެވެ. ވޯޓްލުމުގެ ކުރިންނާއި ވޯޓްލުމަށް ފަހު ވެސް އެންމެން ބޮނޑިވެގެން ބޮޑު ވާހަކައިގައި ތިބި މަންޒަރު އާއްމެވެ.
އިލެކްޝަންސް ކޮމިޝަން (އީސީ) އިން އަމަލުކުރަން އެކުލަވާލި ގައިޑްލައިންގައި ބުނެފައިވާ ގޮތުގައި ވޯޓުލާންދާ އެންމެން ތިބެން ޖެހޭނީ މާސްކު އަޅައިގެން ގައިދުރުކަމުގަ އެވެ. އަދި ވޯޓުލާ މަރުކަޒަށް ވެއްދުމުގެ ކުރިން ހުން ބަލައި ސެނަޓައިޒާއިން އަތް ސާފު ކުރަންޖެހެ އެވެ. ވޯޓުލުމަށް ކޮންމެ މީހަކު ވެސް އަމިއްލަ ގަލަމެއް ގެންދިއުމަށް ވެސް އީސީން އެދުނެވެ. ނަމަވެސް މި ކަންކަމަށް އަމަލުކުރާ ތަނެއް ނުފެނެ އެވެ.
ވޯޓްލުމަށް ބަޔަކު ކިޔޫގައި: ކިޔޫގައި ތިބެނީ ގައިދުރުކޮށެއް ނޫން-- ފޮޓޯ: ހުސައިން ވަހީދު/އަދަދު
ކޮވިޑަކީ ފަސޭހައިން ގައިން ގަޔަށް އަރާ ބައްޔަކަށް ވާއިރު އެކަކު އަނެކަކާ ވީހާވެސް ބައްދަލު ނުވާން ސިއްހީ މާހިރުން ލަފާދެ އެވެ. ނަމަވެސް ވޯޓްލާ މަރުކަޒުތަކުން ފެނުނީ އޭގެ އިދިކޮޅެވެ. އަމިއްލަ ގަލަން ގެންދާތީ ފެނުނީ މަދު ބަޔެކެވެ. ވޯޓުލުމަށް ފަހު ސެނިޓައިޒްކުރާތަން ފެންނަނީ އެއަށް ވުރެ މަދު ބަޔަކެވެ. މާސްކު އަޅައިގެން ތިބުން ނޫން ރައްކާތެރި ކަމުގެ ފިޔަވަޅެއް ނުފެނެ އެވެ. މާސްކު އަޅައިގެން ތިބި ނަމަވެސް ގައިދުރުކަމެއް ނެތުމުން އޭގެ މާނައެއް ނެތް ފަދަ އެވެ.
"އެތެރޭގައި ވެސް މާ ކައިރި ގޮނޑި ޖަހާފައި ހުރިލެއް. ގައިދުރުކަމެއް ނެތް އަސްލު،" ކުރީގެ ދަރުމަވަންތަ ސްކޫލްގައި ބަހައްޓާފައި ހުރި ފޮއްޓަކަށް ވޯޓުލާން ގޮސް ހުރި މީހަކު ބުންޏެވެ.
ވޯޓް ކިޔޫއެއް: ރައްކާތެރިކަމުގެ ފިޔަވަޅުތައް ދަށް-- ފޮޓޯ: ހުސައިން ވަހިދު/އަދަދު
ވޯޓުލައި ނިންމުމަށް ފަހު ސިޔާސީ ފޯރީގައި ވާހަކަ ދެއްކުމަށް ގިނަ ބަޔަކު އެއްވެ ތިބޭ މަންޒަރު ހުރިހާ މަރުކަޒަކުހެން ފެނެ އެވެ. އެހެންކަމުން ގިނަ ބަޔަކު ކޮންޓެކްޓް ވެފައިވާނެ އެވެ. އެހެން ތިބޭއިރު މާސްކް ނަގައިގެން ވެސް އުޅެ އެވެ. ނުވަތަ މާސްކަށް ޖާގަ ލިބެނީ ދަތްދޮޅިންނެވެ. އެ ތިބޭ ތިބުމުގައި އެއްކޮށް ކޮފީ ބޮއެ، ދުފައި، ސިނގިރޭޓް ބޯތަން ފެނެ އެވެ. އިންތިހާބުގެ ވާހަކައިގައި ފޯރީގައި ޖެހިގެން ރައްކާތެރިކަމުގެ މަތިން ހަނދާން ނެތް ކަހަލަ އެވެ.
ސިއްހީގޮތުން ބަލަން ޖެހޭ ވަރަށް ނުބަލައި ވޯޓްލާ މަރުކަޒުތަކުގައި މީހުން އެއްވެ އުޅޭއިރު އެކަންކަން ރަނގަޅު ކުރަން ބުނާނެ މީހަކު އެތަނަކުން ނުފެނެ އެވެ.
ފުލުހުންނާއި އީސީގެ އޮފިޝަލުން ވެސް ބިޒީކޮށް އުޅެނީ ވޯޓުގެ ކަންކަން އިންތިޒާމު ކުރުމުގަ އެވެ.
އާއްމުކޮށް ވޯޓްލުމަށް ކަނޑައަޅާފައިވާ ގަޑި ނިމުމަށް ފަހު ކޮވިޑަށް ޕޮޒިޓިވް ވެފައިވާ މީހުންނާއި ކަރަންޓީންގައި ތިބި މީހުންނަށް ވެސް ވޯޓްލުމުގެ ފުރުސަތު ދޭން ވަނީ ނިންމައިފަ އެވެ. މިހާރު ފެންނަ މަންޒަރުތަކުގެ ސަބަބުން އެ މީހުންގެ ކަންކަން މޮނީޓާ ކުރެވޭނެތޯ ސުވާލު އުފެދެ އެވެ.
