މި އަހަރު ރާއްޖޭގެ އިގްތިސޯދު 18.9 ޕަސެންޓް ކުރިއަރާނެ ކަމަށް އިންޓަނޭޝަނަލް މަނިޓަރީ ފަންޑު (އައިއެމްއެފް) އިން އަންދާޒާ ކޮށްފި އެވެ.
އައިއެމްއެފް އިން އާންމުކުރި އެންމެ ފަހުގެ ވޯލްޑް އިކޮނޮމިކް އައުޓްލުކް ރިޕޯޓަށް ބަލާއިރު، މުޅި ދުނިޔޭން ދެވަނައަށް އިގްތިސޯދީ ރިކަވަރީގެ ދުވެލި އެންމެ ބާރު ވާނެ ކަމަށް ލަފާކުރެވެނީ ރާއްޖޭގެ އެވެ.
ޖީޑީޕީ ނުވަތަ ގައުމީ އުފެއްދުންތެރިކަމުގެ ނިސްބަތަށް އެންމެ ބޮޑު ކުރިއެރުމެއް އަންނާނެ ކަމަށް ލަފާކޮށްފައި ވަނީ ލީބިޔާގެ އިގްތިސޯދަށެވެ.
އެގޮތުން ލީބިޔާގެ އިގްތިސޯދު 131 ޕަސެންޓު ކުރިއަރާނެ ކަމަށް ވަނީ ލަފާ ކޮށްފަ އެވެ. އެކަމަކު ލީބިޔާގައި ހިނގަމުންދާ ދާހިލީ ހަނގުރާމައިގެ ސަބަބުން ލިބެން ހުރި މައުލޫމާތުތަކުގެ ސައްހަކަން ކަށަވަރު ނުކުރެވޭ ކަމަށް އައިއެމްއެފްގެ ރިޕޯޓުގައި ފާހަގަ ކޮށްފައި ވެއެވެ.
އައިއެމްއެފްގެ އިމާޖިން މާކެޓް އެންޑް ޑިވެލޮޕިން އިކޮނޮމީސް: ރިއަލް ޖީޑީޕީ ލަފާކުރުންތަކުގެ ތާވަލު -- މަސްދަރު: އިންޓަނޭޝަނަލް މަނިޓަރީ ފަންޑް
ދެ އަހަރުގެ ތެރޭގައި އިގްތިސާދު ރިކަވާ ވާނެ
އައިއެމްއެފް ގެ އައުޓްލުކް ރިޕޯޓުން ދައްކާ ގޮތުގައި، ކޮވިޑް-19ގެ ބަލިމަޑުކަމާ ގުޅިގެން މިދިޔަ އަހަރު ރާއްޖޭގެ އިގްތިސޯދު ވަނީ 32.2 ޕަސެންޓު ހީނަރުވެފަ އެވެ.
މިއީ މަރުކަޒީ ބޭންކް، އެމްއެމްއޭ އާއި ފިނޭންސް މިނިސްޓްރީގެ އެންމެ ފަހުގެ އަންދާޒާތަކަށް ވުރެ 2.9 ޕަސެންޓު އިތުރު އަދަދެކެވެ.
އިގްތިސޯދު ކުރިއަރާނެ ކަމަށް ލަފާ ކުރާ ދުވެއްޔަށް ބަލާ ނަމަ ކުރިއަށް އޮތް ދެ އަހަރުގެ ތެރޭގައި ރާއްޖޭގެ އިގްތިސޯދު ރިކަވާ ވާނެ އެވެ.
އަދި 2023 ވަނަ އަހަރު އިގްތިސޯދީ ދުވެލި މަޑުޖެހުނު ނަމަވެސް އުފެއްދުންތެރިކަން 5.5 ޕަސެންޓު ކުރިއަރާނެ ކަމަށް ބެލެވެ އެވެ.
ފަތުރުވެރިކަމަށް ބަރޯސާވާ ވާދަވެރި ގައުމުތަކުގެ ތެރޭގައި ހިމެނޭ ޝީޝެލްސް އަދި މޮރިޝަސް ފަދަ ގައުމުތަކުގެ އިގްތިސޯދުތަކާ އަޅާ ކިޔާ އިރު ވެސް ރާއްޖޭގެ އިގްތިސާދީ ރިކަވަރީ ރޭޓް އުޅެނީ މާ ކުރީގަ އެވެ.
އައިއެމްއެފް އިން ލަފާ ކުރަނީ މި ގައުމުތަކުގެ އިގްތިސާދުތައް ރިކަވާ ވާން ގާތްގަނޑަކަށް ތިން އަހަރު ނަގާނެ ކަމަށެވެ.
