ލޯކަލް ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވޯޓުލާން ވީހާވެސް ގިނަ އަދަދެއްގެ ރައްޔިތުން ނުކުތުމަށް ރައީސް އިބްރާހިމް މުހައްމަދު ސޯލިހު މިއަދު އެދިވަޑައިގެންފި އެވެ.
ޖަމާލުއްދީން ސްކޫލުގައި ބަހައްޓާފައިވާ ފޮއްޓަށް ވޯޓު ލެއްވުމަށް ފަހު ނޫސްވެރިންނަށް ރައީސް ސޯލިހު ވިދާޅުވީ، މިފަހަރުގެ އިންތިހާބަކީ ރާއްޖޭގެ ހިންގުމުގެ ނިޒާމަށް ހެޔޮ ބަދަލެއް ގެންނާނެ ނިޒާމެއް ކަމަށެވެ. އެހެން ކަމުން މި ފަހަރުގެ އިންތިހާބަކީ ނުހަނު މުހިއްމު އިންތިހާބަހަކަށް ވެގެން ދާނެ ކަމަށް ވިދާޅުވި އެވެ.
"މިއީ ވަރަށް މުހިއްމު ވޯޓެއް މި ކުރިއަށް ދަނީ. މުޅި ރާއްޖޭގެ ހިންގުމުގެ ނިޒާމަށް ރަނގަޅު ބަދަލުތަކެއް އަންނާނެ އިންތިހާބެއް،" ރައީސް ވިދާޅުވި އެވެ.
އިންތިހާބުގައި ވޯޓު ލާން ނިކުތް މީހުންގެ އަދަދުތައް މިހާތަނަށް މަދު ކަމަށް ފެންނާތީ އެކަމަށް އިޝާރާތްކުރައްވާ ރައީސް ވިދާޅުވީ މިއީ ދަތި އުނދަގޫ ދަނޑިވަޅެއް ނަމަވެސް، ވީހާ ވެސް ގިނަ ބަޔަކު ވޯޓު ލާން ނިކުންނަން އިލްތިމާސް ކުރައްވާ ކަމަށެވެ.
އަދި، މިއަދުގެ މެންދުރުގެ ވަގުތުގައި ގިނަ ބަޔަކު ވޯޓުލާން ނިކުންނާނެ ކަމަށް އުއްމީދު ކުރައްވާ ކަމަށް އެ މަނިކުފާނު ވިދާޅުވި އެވެ.
އިލެކްޝަންސް ކޮމިޝަނުން މިހާތަނަށް ހާމަކޮށްފައިވާ މައުލޫމާތަށް ބަލާ އިރު މި އިންތިހާބުގައި މިހާތަނަށް ވޯޓު ލާން ނިކުތީ ވޯޓު ލުމުގެ ހައްގު ލިބިފައިވާ މީހުންގެ ތެރެއިން 17 ޕަސެންޓެވެ.
